Pwöc Leec Wïc 30 - Wëël Jwøk

Luup Moa Car Aguurri

¹ Moi beege luup moa perge leth moa car Aguurri o Jake, ena köö, «Wui Jwøk, aano ööl, aano ööl møn, ni bäŋ gïn mo løny jïra.

² Ka adïëri møn, aani, aana tïmö naa kaala jiy bëët ni bäŋ gïn mo ŋääa, ni bäŋ acaara jïra kaamar jiy bëët.

³ Aani, leec wïc kära kwanyø, ni mana daa ŋääö kiper Jwøa en kur keere kuua.

⁴ ?Ŋata aa maal ni duu piny aŋa? ?Ŋata mak jamø ki cere aŋa? ?Ŋata bäc pï naama dwøŋ ka aleeŋŋa mare aŋa? ?Ŋata tïïc piny ni teek këël teegi moe aŋa? ?Nyeŋŋe aŋa? ?A nyeŋ wääde aŋa? Ni näk mo ŋäyï, caanï jïra.

⁵ «Luup Jwøk bëët oraŋø ni joodi na adïëri; ena kwöt leny jï jø wø kan røkge buute.

⁶ Kär niï mëëta bäät luup moe, niï ba jääle ni tïm tööti marï ni ŋäc.

⁷ «Wui Wuuö Jwøk, a kwaya ïïni ki jammi ariiø; kär niï mäna geni ki aani kanyo pooda naa kär thøw.

⁸ Cwøk ki tööt tïïc karge ni bäär ki aani, ni ba wëëgï aani can wala ni ba wëëgï aani kwärö; cïp cam jïra mana näk orømø ki aani,

⁹ kiper naa ba jääŋa ni mooŋa ïïni, ni kööa, ni ‹?Wuuö Jwøk aŋa?› wala naa ba tïma naa can ni kwäta, naa raanynya nyeŋŋï, ï na Jwøk mara.»

¹⁰ Kär niï waya nyeŋ ŋat tïïc nyïm kwäärö mare, niï ba ciene, ni jïtï ka ajäla.

¹¹ Da jiy mo wëëkge wø päcge gïï mo reyø, ni mëëkge ba pwøcge.

¹² Da jiy mo cädö ni ge waany ki jïge, kaamane ge poot kär tïmö ni waany yïth raay moge.

¹³ Da jiy mo wø raŋa jiy piny, na atöör marge wø di joodø nyeŋge.

¹⁴ Da jiy mo lakge otïïö ni beth kaamar opëëllö, ni nyämme moge otïïö ni caala caakïïne, nee jøøa can ki jøøa näk ocaarø løønyge yïthakic jiy bäät piny.

¹⁵ Da nyïëdi ariiø jï cwiiø, mo wø jwöŋö, ni «Wa mooc, wa mooc.» Da gïïpinyi adäk mo ba jäŋ, ni ŋweerge ba maar köö, ni «Aana rømø.»

¹⁶ Ni gïïögø beege kar bëët jwïëc jøøa no othøw, ki dhaagø ma bwøc, ki ŋøøm mo ba røm ki pïï, ki maac ni wø ba maar köö, ni «Aana rømø.»

¹⁷ Ŋat mo waŋe ena dëër wänni ni buua gø, ni taak ciik mo menni, nyeŋŋe ogöön agääe wøk moa en ya agäm-kïte, ni cami ya cøre.

¹⁸ Da gïïpinyi adäk mo yia ege thääŋö døc, ni ŋweerge tiere ba ci wïïa;

¹⁹ ni gïïögø beege jöör odhuuth ni wø määt maal nyeŋ pøøl, ki køør thwöl man wø cør bäät kïdi, ki jöör baabuur kany wø cäädhe yi naama dwøŋ, ki jöör dïcwøø ki dhaagø man wø mëëre ki gø.

²⁰ Man beeye bëët dhaagø ma kääbi; eni wø käbö ni pooc dhee, ni kööe, ni «Bäŋ gïn mo raac mo yaa tïïö.»

²¹ Da gïïpinyi adäk mo piny yie othäŋŋö ki ge, ni ŋweerge ba løny ki käärö jïre;

²² ni gïïögø beeye kany wø tïm laŋŋø na nyeya, ki kany wø jäŋ ŋat mo wïïe raaci ki cam,

²³ ki kany wø jït dhaagø mo okweeyø ki dïcwøø, ki kany wø läw dhaage ma ŋat tïïc kar nyijø wø tïnynye.

²⁴ Da gïïpinyi aŋween mo therø bäät piny, 'ba wïthge leer døc:

²⁵ ŋiinynyi beege wï twöŋö mo dëëtge ba teek, 'ba caammi moge wø poot cooŋge piny kany wø ciek caammi.

²⁶ Athinaaki beege lääy mo jïge bäŋ teek, 'ba ge wø poot tïïö ki uudi yïthakic kïte.

²⁷ Bäänyö bëëdö ni bäŋ nyeya jïge, 'ba geni bëët wø poot cäädhö na lwaae.

²⁸ Dïgwey beeye gïn mo magï maaø ki cerï jaak, 'ba eni wø poot di joodø paan dwøŋ.

²⁹ Da gïïpinyi adäk, ni kany wø cääthge, ge naayyø, ni ŋweerge cäädhi ni naayyø døc;

³⁰ ni gïïögø beeye ŋuu na teek døc dï lääy bëët, ni ŋääe bäŋ wø løøe ki gïrpiny jaak;

³¹ ki thwønh gwienø, ki nywø ateea, ki nyeya man wø cäädhi ki jø leny moe.

³² Ni näk mo ïïno bëëdö ni wïïï raac, ni dëërï iï tïŋ maal, wala ïïno bëëdö niï caara acaare mo reyø, cïëk dhiï ki cerï.

³³ Kiper wëër mo di tuuŋŋö duunnö ki wëër mo dwøŋ, kaawat man wø puuc caak ni pääre ki maaw, ni ö ummi mo di dwiinynyø ni cwïëre ki remø.