Pwöc Leec Wïc 27 - Wëël Jwøk

¹ Kärï ŋwöö kiper gïno tïïyï diøø, kiper gïno tägi yi cäŋ mar diøø kuyï.

² Beerra man tïme niï pwøya ŋat mørri, ni paa ï ki dhiï keerï, ni beerra man tïmï niï pwøya ŋat mo pathi, ni paa ï ki leebï keerï.

³ Ŋäc ni kïdi peek, na akwöö peek thuwø, 'ba amena mar ŋat mo wïïe känni kaala gïïögø karge riet.

⁴ Wëër cïïmma tïïc gïï mo reyø ni räänyö kaamar jwïïö. ?'Ba aŋa ni maar cuŋŋö nyïm ŋat mo cwïnye okëënynyö?

⁵ Juuk mo onyoodhø beerra eni ni kaala mëër mo juuk mare kär nyoodhø.

⁶ Wat wø tïïya adïëri kany wø pwöny ïïni ki pwöc mo jwørï jwørø, 'ba nyimän, këël dhøk dee nuumö, mare cwøk.

⁷ Ŋat mo ojäŋ wø kweer ki maar kïc, 'ba ki jï ŋat mo obup, këël gïn mo keec wø tïmö ni ŋweeth.

⁸ Ŋat wø wïdi jaak ni wec paare caala wenyø man wø wec øde ni määde jaak.

⁹ Maar riia ki gïn wø jïye ŋwääi ni met, cwïny wø døøcge mo met; kaawat manøgø thuwø, pwöc nyawat ec wø døøye mo met.

¹⁰ Kär niï weya nyawadu ki nyawat wäru, ni kany wø enï yïth gïï mo leth, kärï many køny baŋ cöögu na kare bäär; theemma wat mo kare cään ni kaala cöögö mo kare bäär.

¹¹ Nyie wääda, bëëdï ni wïïï leer, ni døøyï cwïnya mo met, kiper nee lønye jïra ki man dwöga ki luubö jï ŋat wø jøøŋ aani.

¹² Ŋat mo waŋe riek, gïna raac wø di joodø ni kan ree, 'ba ŋat ma acaara mare thiinh wø pätha yi gø, ni jwør gïï mo leth.

¹³ Ŋat mo ojïëy na kar ŋat pïïdö marï ma wëëllö, abïïne wär lwørï, ni magï eni na dïgïti kanyo cïp ree na kar dhaanhø mo path.

¹⁴ Ŋat wø laar pää ki bäc øw ni gwïëth watge ni dwøre ee tïŋ maal, mare di kwaanø na acïëni.

¹⁵ Dhaagø ma ŋat pïëm kännö ki öölö kaamar øtø mo cwïër dïcäŋ wø bëët køthi ni pädhö.

¹⁶ Ki man jook dhaagø ma ŋat pïëm nëëna man jook jamø, ni caala man mec maaw ki cenø.

¹⁷ Nywïënyö wø paak ka nywïënyö watge; kaawat manøgø thuwø, dhaanhø wø bëënynyi ka ri watge.

¹⁸ Ŋat wø gwøk olaam, nyïï gø came camø, ni ŋat wø gwøk kwäärö mare jïtö ki wödö.

¹⁹ Kaawat man wø nëën täärnyïm dhaanhø na kare ki yïth pïï, cwïny dhaanhø thuwø wø nyootha bëëtö mar dhaanhø.

²⁰ Kaawat man wø bëët kar bëët jwïëc jøøa no othøw ni ba jäŋ ki jiy, waŋ dhaanhø thuwø ba jäŋ ki jap bäät piny.

²¹ Gwel-bïrö ki warkey beeye maa thäth ni wø raŋi ki gø; ni mana en cwïny dhaanhø wø raŋ ka køør man wø pwøc eni.

²² Ŋat dïkät wïc këël diï wälö ki leek yi pany kaamar beel, bëët bøøl mare bäŋ doo aay dëëre.

²³ Bëëdï ni bëët dïëk moï ŋäyï na wøp, ni këëllï wïïï dëët dhäk moï,

²⁴ kiper jap kwärö bäŋ wø bëëdö na bäre bäre, ni dööŋ kar mar dhaanhø bäŋ wø bëëdö ni nut ki yïth beenhnhe bëët.

²⁵ Kany wø waaŋ luummi, ni ö mana nyäänni ni lødhe, ni nyaar luum mana en lak thuuri, ni cooŋi piny kiper dhäk,

²⁶ ïïni, ï jïtö ki dum dëërï ki røk rööm moï, ni ö atëëe moï ni duunge ki gät pwödhö.

²⁷ Ni bëët caa atëëe no orømø kiper cam marï ki paarï bäre, këël kiper jø tïïc moï thuwø.