Pwöc Leec Wïc 26 - Wëël Jwøk

¹ Kaawat man wø bëët peyi ki öörö, ni bëët køthi ni kär rømø ki kar kac, wödö thuwø kär rømø ki ŋat mo wïïe känni.

² Acïëni mo bäŋ tiere ba pïï bäät dhaanhø; tïmö ni caala man wø määt adhieŋŋi ka agweec jaak.

³ Acwäät rømi ka ŋat mo wïïe känni, ni caala man bëëde na alaŋŋa rømi ko okweeny, ni kaw rømi ka arëën.

⁴ Kär niï dwøga luum ŋat mo wïïe känni ki køør luup bøøl moe, niï ba tïmï niï caala eni.

⁵ Dwøk luum ŋat mo wïïe känni no orømø ki luup bøøl moe, nee ba kööe ni wïïe leer ki jïre.

⁶ Ŋat wø jääŋ dwøl ki dhaanhø mo wïïe känni, wø ŋøra tiete keere, ni maath ränynyö kaamar pïï.

⁷ Pwöc man wø cur dhøk jøøa wïthge känni caala tier dhaanhø ma puuth man wø lïëri jaak.

⁸ Ŋat wø wøør ŋat mo wïïe känni caala ŋat wø twöö baarø ro okwat leethïk nee ba reeŋe.

⁹ Pwöc man wø cur dhøk jøøa wïthge känni caala koodhi mo wø käär ŋat mo omeerri ki cere.

¹⁰ Ŋat wø kïth ŋat mo wïïe känni yi tïïc ni wø røøth ŋat mo cäädhö jöö jaak nee kïth yi tïïc, caala ŋat mo thöödhö jaak ka athëëre ni mooc dëët jiy ki ŋwiili.

¹¹ Ŋat mo wïïe känni man wø nøøc bëët bøølø mare, caala gwök ni wø døø baŋ ŋwøge.

¹² ?Dhaanhø mo köö ni wïïe leer ki jïre ajootï? Da ŋäädhe mo thiinh kiper ŋat mo wïïe känni ni kaala teeŋ ŋatøgø.

¹³ Ŋat leth dëël cwïnye wø di thwølø ni kööe, ni «Da ŋuu øtjöö, ni da ŋuu dï thwørø.»

¹⁴ Ŋat leth dëël wø bëëdö ni løøŋŋa ree kar niine mare, kaawat man wø ö balbala wø løøŋ ree kare.

¹⁵ Ŋat leth dëël cere wø rwaage ya awal baŋ kwön, 'ba eni dëëre jääk ki man kïth cere dhee.

¹⁶ Ŋat leth dëël ki jïre ni leerra wïïe keere ni kaala jiy abïriiø mo luup wø dwøkge ni ege caarø.

¹⁷ Ŋat wø dier pïëm mo paa mare caala ŋat mo maga gwök mo path ki ïth gø.

^18-19 Ŋat wø cøøk watge, ka aŋuudi ni kööe, ni «Mara kwääk jaak,» caala dhaanhø ma bøøl man wø thöödhö ki dhøk jenni mo rege da mäc, ka athëëre, ki gïï wø duunni ki thøø.

²⁰ Kany mo bäŋ dïwääc nyeŋ yie, pïëm wø døøa piny yie, kaawat man wø thøw maaci kany wø thum jer maaci.

²¹ Ŋat pïëm, pïëm wø di nyebø kaamar maac, kaawat man ö belli ni wø tïïcge cuk ni kwayø, ni ö jenni ni wø tïïcge maac ni liel.

²² Luup dïwääc nyeŋ caala cam mo met, ni wø dønynya yi cwïny dhaanhø bäre.

²³ Ŋat mo dhee cara mëër ni cwïnye raac caala dak mo jøørra dï ŋääe keere ki warkey.

²⁴ Nyimän luupe wø di tøøtø ki dhee, 'ba cwïnye wø kaanna jap cwøk.

²⁵ Kany wø cääne ni luup ee døøc mo met, kär niï ŋäätha gø, kiper da gïïpinyi abïriiø yi cwïnye mo ec raac ki ge døc.

²⁶ Këël män mare dee kanø ki køør cwøk mare, rääö mare tïmö ni ŋäc dï acooŋa bäre.

²⁷ Ŋat wø koony buur kiper watge, eni ki dëëre pätha yie, ni ŋat wø cöör kïdi bäät watge, oduu bääte keere.

²⁸ Leep mo cara tööt män ki jiy moa näk ee caannø, ni dhøk mo tøøta luup wø wëëga jiy ränynyö.