Pwöc Leec Wïc 25 - Wëël Jwøk

Pwöc Leec Wïc Møga Mo Cølöman

¹ Moi thuwø beege pwöc leec wïc mo Cølöman, moa ŋwaal jic Edhekaya piny, eni na nyeny Juuda.

² Ki man bëët Jwøki ni tiet luup møøk ee kanø beeye ajiem jïre, ni ki man many tiet luup beeye ajiem jï nyeye.

³ Acaac nyeye karge bäär ni tietge ba joot, kaawat man wø bëët maalli ni kare bäär, kaawat man wø bëët tiet ŋøømmi ni kare bäär.

⁴ Noo leenyï gwel-bïrö, käl apøk nyal wøk, køøre løny jï dïthädhi ki man tïïe ki gïn mo mïërö ki gø;

⁵ jøøa reyø käl wøk nyïm nyeya, køøre wälu mare tiere okëët piny ki køør bëënynyö.

⁶ Kär dëërï døøc mo dwøŋ nyïm nyeya, ni ba kööï ni da karï dï jøøa kwörge døøŋŋø;

⁷ kiper beerra eni ki man køøi ki ïïni, ni «Dää kany,» ni kaala man dwøk ï piny nyïm ŋata kare dwøŋ. Gïn mo iï nø joot ki waŋï,

⁸ kärï laar läät baŋ løøk ki gø, ?kiper agïnaŋø noo tïïyï ya aŋuunne, kanyo näk mo wadu wïïï ee lääö?

⁹ Caan luubö marï keerï ki wadu, ni ba dhääï luup ŋat mør wøk;

¹⁰ niï ba jøøŋ ŋato wïny gø, ni ö gïna raaci noo caan kiperï ni ba cuŋŋe.

¹¹ Luubö mo caan no orømø mïërö kaamar warkey mo othiiø ni caala nyïïoleem mo ocïp ya athaanh gwel-bïrö.

¹² Juuk mar ŋat mo wïïe leer mïërö jï ïth mo wïnyö, kaawat man wø mïër gwel ïthi mar warkey ki jap mïërö ma warkey.

¹³ Ŋat mo oŋäädhö man wø jääŋŋi caala pïï mo ŋec kany wø tïme na kar kac, kiper jwïëc kwäärö mare wø wëëge duuö.

¹⁴ Ŋat wø buuk muuy mo ba cïbe, caala pøøl ki jamø mo öö mo ba cïpi ki køth.

¹⁵ Cäänö ni cwïny ocïp piny acaac kwäärö wø di wiilø, ni ö leepi mo jööm ni dwøk luubö piny mo teek.

¹⁶ Kany wø jootï maar kïc, cam mana näk orømø keere, 'ba ni näk mo iï puudhö, ï ŋøøk ki gø.

¹⁷ Nook tierï ki wääth po wadu, nee ba jøøme ni männe ki ïïni.

¹⁸ Ŋat wø kïth luum tööt bäät watge tïïya gïn mo leth kaamar opëëllö ka athøc leny ka atheerø mo beth.

¹⁹ Dhaanhø man wø tïïö ki gïï mo reyø ki piny, ki man ŋääth eni cäŋ gïï mo leth caala lëëö mo ocam akøøgø, ni caal tielø mo obäp.

²⁰ Ki man wärö ki dudi jï ŋat mo cwïnye peek caala man wø bëët dhaanhø yi köö na aleeŋŋa mare okäl wøk, ni caala atwøda mo okïthö ki nyïjaa.

²¹ Ni näk mo nyimännï obup, wär mooyï ki cam nee came; ni näk mo ree da riew, wär mooyï ki pïï nee maadhe;

²² kiper noo tïïyï gïnögø, ï cooŋa cuk mo oäpö dï wïïe, 'ba Wuuö Jwøk ïïno cunne.

²³ Da jamø mo kwödö mo wø kännö ki køth, ni leep mo waya nyeŋ wø duua agääde.

²⁴ Ki man bëët dhaanhe thaŋ agööla, beerra eni ni kaala man bëëdö yi øtø aciel ki dhaagø ma ŋat pïëm.

²⁵ Luubö mo nyään mo met mo käla kany mo bäär caala man wø met pïïyi mo ŋec jï ŋat mo oööl ki riew,

²⁶ Ŋat mo mare beer man wø jøøm ni jïëe ki mar ŋat raay, beeye gïn mo raac kaamar pï jøøro mo oduubö.

²⁷ Patha gïn mo beer ki man cam maar kïc ni päl, ni patha gïn mo beer ki man many wödö kiper dëël.

²⁸ Dhaanhø mo dëëre ba jwøe keere caala pääny mo kiir mare onyaa piny.