Pwöc Leec Wïc 24 - Wëël Jwøk

¹ Kär per bëët jøøa reyø keeyï, ni ba päl cwïnyï ki man bëëdï ki geni;

² kiper cwïnyge wø caara bëët dïwït, ni dhøkge wø cara luup gïï mo reyø.

³ Dhaanhø paare wø di käärö ki køør leec wïc, ni këël gø piny ki køør acaara;

⁴ ki køør kwänynyö yïth uudi moe wø päŋ ki jammi mo perge leth mo duunnö ki met ec.

⁵ Dhaanhø mo wïïe leer wø bëëdö ni teek, ni dhaanhø mo wïïe da kwänynyö, teek mare wø di meedø;

⁶ kiper ki køør pwöc mo beer, leny marï thura kare, ni kany mo da jiy mo thööth mo pöö, jiy böödö.

⁷ Leec wïc kare bäär døc no opöödhö ki wï ŋat mo wïïe känni, ni teeŋ ŋatøgøøni dhee bäŋ wø jaale kar acooŋa.

⁸ Ŋat wø cädö nee tïïe ki gïï mo reyø wø cwøl ni ŋat riek waŋ mo raac.

⁹ Gïï wø caar ŋat mo wïïe känni beege raay, ni ö jiyi ni raac yïthge døc ki ŋat abuua.

¹⁰ Ni näk mo ceŋŋï nilwak kany wø enï yïth gïï mo leth, nyootha gø ni teek marï thiinh.

¹¹ Jø wø käl ni kïtha baŋ thøø, piem geni, ni piemï jiy mo cäädhi ni ge näännö mo kïtha baŋ näk.

¹² Ni näk miï köö, ni «Neenï, bäŋ gïn mo ŋäcwa kiper gïnögø,» ?aŋø, Jwøk na ŋäc cwïny jiy, ba løny jïre ki man caar gø? ?A eni ni wø gwøk jwïëy moï, gïnögø kuue? ?Eni ba løny jïre ki man cun ŋati man nø ki køør gïna tïïe?

¹³ Nyie wääda, beeye gïn mo beer ki man camï maar kïc, ni dhiï oŋwëënhnhi ki maar kïc mana näk tëëma.

¹⁴ Wär ŋäyï thuwø ni leec wïc bëëdö na enøgønø ni ŋweeth jïrï; ni näk mo iï joodø, aŋuun bëëtö marï gööya piny ni beer, ni gïna ŋääthï ba ränynyi.

¹⁵ Wui ï na ŋat raay, kär niï ööa töök paac mar ŋata mare beer ki man tïïyï gïn mo raac, kär niï raanynya kar bëëtö mare;

¹⁶ kiper ŋata mare beer këël doo pädhö kwöre abïriiø, eni wø cäŋa duu maal, 'ba ŋata raac wø puta pädhö na bäre bäre yïth gïï wø leth ni wø pïï bääte.

¹⁷ Kär iï mïnnö kany wø päth nyimänni marï, ni kär cwïnyï døøc mo met kany wø cwany tiere;

¹⁸ nee gïna tïïyï ba tïme ni raac jï Wuuö Jwøk noo neen gø, ni paany wëër mare bäät ŋatøgø.

¹⁹ Kär wïïï kierï ka acaara kiper bëët jøøa reyø, ni ba keeyï per bëët jø raay;

²⁰ kiper ŋat raay, aŋuun bëëtö mare gööya piny ni raac, ni tïm jøøa reyø ni caala lamba mo cäätha baŋ thøø.

²¹ Nyie wääda, lwäär Wuuö Jwøk ki nyeya, ni ba dwätï ki jø wø many ageem;

²² kiper gïï mo leth ocwöp dëëtge, ?Aŋa ni ŋäc ränynyö mano ööi ki baŋ Wuuö Jwøk ki nyeya?

²³ Moi thuwø beege luup pwöc mo jøøa wïthge leer: Ki man ŋøl luup mo rege da ajeeny ba beer.

²⁴ Ŋat wø köö jï ŋat raay, ni «Marï beer,» eno cien jiyi, ni jääli ya lwaaki bäre;

²⁵ 'ba jø wø jääl jøøa reyø, otïmö ni beer jïge, ni ö gwïëthi mana beer ni en bäätge.

²⁶ Ŋat wø dwögi ki luubö ma adïëri wø nyootha mëër mare mana näk kare.

²⁷ Jiiŋ dëërï dïkwøŋ kiper tïï lak paac, ni jiiŋŋï pwödhö marï, køøre nø, paac marï ogeerï.

²⁸ Kär luubö mo bäŋ tiere kïth bäät wadu kar løøk, ni ba maaŋŋï wïth jiy ki luup mo ocur dhiï.

²⁹ Kär niï köö, na «A tïïö dëëre ki gïrpiny kaa mana tïïe dëëra, naa coola gø dëëre ki køør mana tïïe dëëra.»

³⁰ Aana cør buut pwöth beel mar ŋata dëëre leth, ki buut pwöth omøki mar ŋata näk ba cädö,

³¹ ni neena pwöth no otuy ki koodhi bäre, ni dï pwödhö bäre ouum akatanyøŋŋi, ni kiir kïdi mana en lakge opädhö.

³² Køøre aneena ni caara gø døøc ki cwïnya, ni raŋa tiere ni jïta ki pwöc.

³³ Ï ni wø laar butö ki nyi kany mo thiinh, ni wø laarï narø ki nyi kany mo thiinh; ï ni wø laar thäänhö ki ceŋŋï nee riï jwömï ki nyi kany mo thiinh,

³⁴ bëët can ööa bäätï kaamar kuu, ni pïïc ränynyö bäätï kaamar ŋat twëër.