Pwöc Leec Wïc 23 - Wëël Jwøk

¹ Kany wø pïï piny kar cam niï cämï ki ŋat mo kare dwøŋ paare, caar wïïï ki eni ni en nyïmï;

² 'ba ni näk mo cwïnyï iï daadø kiper cam, riï wär joogï.

³ Kär cam mare na met parï, kiper gena caap cwøk.

⁴ Kär niï ööla riï niï jïtï ki jap kwärö; bëëdï ni wïïï leer ni weyï acaara manøgø.

⁵ Kany wø näk mo waŋï këëta bääte, puta aay; kiper kwärö wø laara jïtö ki bwöm, ni tïme kaamar odhuuth ni wø määt maal.

⁶ Kär cam dhaanhø mo cere teek camï, ni ba parï cam mare na met;

⁷ kiper ena ŋat wø cädö kiper cam man wø lwørï, ni eni wø köö, ni «Cämï ni mädhï,» 'ba ba käl cwïnye.

⁸ 'Ba otïmö niï para man ŋööï cam wøk mana thiinh na camï, ni ö waaci moï na met ni cami ya paapi jaak.

⁹ Kär niï cäänna dhaanhø mo wïïe känni, kiper luup leec wïc moï taae taaø.

¹⁰ Kär niï daaga gïr waŋ keew mana nut cøøn, ni ba nyiigï gø yi pwöth ŋat mo bäŋ wänni;

¹¹ kiper Dïkunyi mare teek, ni pïëme ki ïïni kipere.

¹² Cïp cwïnyï køør pwöc, ni cegï ïthï ki luup kwänynyö.

¹³ Kär pwöc joogï ki nyilaal; këël eni diï pwödö ka acwäät, eni ba thøw.

¹⁴ Ni näk mo eni iï pwödö ka acwäät, ï gwøga jwïëy moe ki man ba ci kar bëët jwïëc jøøa no othøw.

¹⁵ Nyie wääda, ni näk miï bëëdö ni wïïï leer, aani, cwïnya tïmö ni met;

¹⁶ ni ö yia ni mïnne kany wø ö dhiï ni caan gïna näk kare.

¹⁷ Kär per bëët jø raay keeyï, 'ba bëëdï niï lwäära Wuuö Jwøk ki yïth cääŋŋe bëët.

¹⁸ Ka adïëri møn, aŋuun bëëtö marï gööya piny ni beer, ni gïna ŋääthï ba ränynyi.

¹⁹ Nyie wääda, wïny pwöc ni lëëny wïïï, ni cïbï cwïnyï øtjööra thïïŋ.

²⁰ Kärï dwätö ki jø meeye, ki jøøa no owär ki cam rïŋö,

²¹ kiper jø meeye ki jø wärö cännö, ni bëët niine marge duua käär nywate jïge.

²² Wïny mar wäru na nywøl ïïni, ni ba taagï meru kany wø jale.

²³ Adïëri manynyï, ni ba dwøgï gø pwödhö, ni manynyï leec wïc ki pwöc ki ŋäc tiet luup.

²⁴ Wää ŋata mare beer yie wø mïnnö døc, ni ö ŋat wø nywøl nyilaal mo wïïe leer ni mïn yie ki gø.

²⁵ Beerra man døøyï yi wäru ki meru mo met, ni mïn yi meru na nywøl ïïni.

²⁶ Nyie wääda, cïp cwïnyï køøra, ni këëllï waŋï jöör bëëtö mara.

²⁷ Kiper dhaagø ma kääbi caala buur mo bäär, ni ö dhaage ma ŋat lugi ni caal buur mo diiny.

²⁸ Eni wø møøra jöö ni kurö kaamar ŋat twëër, ni meet kwään jø wø tïïc gïï mo reyø ki piny.

²⁹ ?Aŋa ni wø guyi? ?Na aŋa ni wø kïmmi? ?Aŋa ni wø pïëmö? ?Na aŋa ni wø ŋuri? ?Aŋa ni wø dëëre jïti ki ŋwiili ki køør gïn mo bäŋ tiere? ?Aŋa ni wø bëëdö ni nyeŋŋe omäthö ni kwaar?

³⁰ ?Patha jø wø ruu ni ge mädhö ki kwøŋ? ?Patha jø wø lägi ni ge manynya køør kwøŋ moa keec?

³¹ Kär waŋï këël køør køøŋø kany wø nëëne ni mïërö, ki kany wø nëëne ni paŋŋi ya awal, kany wø løøye ki yi lwöyï ni pøøth.

³² Kiper aŋuunne eni kääö kaamar thwöl, ni dhee da cïm kaamar olwierø.

³³ Nyeŋŋï kar ni neeta gïï mo patha adïëri, ni ö cwïnyï ni caar wel luup.

³⁴ Ï tïmö kaamar dhaanhø mo leeŋ athaga leeŋŋø dï naama dwøŋ, ni tïmï kaamar dhaanhø mo ena wï lwinh jaath.

³⁵ Køøre ïïno köö, ni «Aana pwötge, 'ba bäŋ ŋwellø mo onieŋ dëëra; ni buthge aani, 'ba bäŋ gïn mo yaa jwørø. ?Aano pääa yi wäne nø, naa määnynya ki køøŋø mør?»