Pwöc Leec Wïc 22 - Wëël Jwøk

¹ Beerra wïny nyeŋ mo beer ni kaala man bëët dhaanhe no okwär, ni beerra pwøc mo beer ni kaala man bëët dhaanhe ni jïre da warkey ki gwel-bïrö.

² Gïn mo rwöpa ŋata can ki ŋat mo okwär beeye en: geni bëët cwääya Wuuö Jwøki.

³ Ŋat mo waŋe riek gïna raac wø di joodø ni kan ree, 'ba ŋat ma acaara mare thiinh wø pätha yi gø, ni jwør gïï mo leth.

⁴ Mööl ki lwär man lwäär Wuuö Jwøk duunnö ki kwärö ki wödö ki kwøw.

⁵ Koodhi ka abëëbe wø ena jöör ŋat wø wel luup, 'ba ŋat wø gwøk dëëre obëëdö ni kare bäär ki geni.

⁶ Pwöny nyilaal ki jöör bëëtö mano put wääth ki gø, ni kanyo døøŋŋe, eni ba gaa wøk ki yie.

⁷ Jøøa no okwär, jøøa can wø ena tietge, ni ö ŋat wø mäyi ni en tier ŋat wø mäye baŋ gø.

⁸ Ŋat wø piith raay, gïï mo leth okaae, ni ö teek mar wëërri mare ni ränynye.

⁹ Ŋat wø nyooth mëër jï jiy wø di gwïëdhö, kiper man wø cïpe ri cam mare jï ŋat mo can.

¹⁰ Noo riemï ŋat abuua wøk, pïëm ränynyö, ni ö wëërri ki räny nyeŋ ni cuŋge.

¹¹ Ŋat wø mëër ki cwïny mo waany, ni luup mo wø cur dhee met, teeŋ ŋatøgø tïmö na nyawat nyeya.

¹² Waŋ Wuuö Jwøk wø bëëdö ni gwøga luup kwänynyö, 'ba luup ŋat wø tïïc gïï mo reyø ki piny wø di raanynyø.

¹³ Ŋat leth dëël cwïnye wø di thwølø, ni kööe, ni «Da ŋuu wøk kaace. A di camø no cøøa wøk øtjöö.»

¹⁴ Dhi dhaagø ma kääbi caala buur mo bäär, mo ŋata näk wëëc Jwøk ena bääte pätha yie.

¹⁵ Bëët dïkät wïc onieŋ cwïny nyilaal, 'ba beeye acwäät pwöc noo riem gø wøk cwïnye.

¹⁶ Ŋat wø møt dhaanhø mo can nee jap kwärö moe meede, ki ŋat wø cïpi jï jøøa näk okwär, wø pätha yi can.

Luup Pwöc Mo Jøøa Wïthge Leer

¹⁷ Cek ïthï, ni wïnynyï luup jøøa wïthge leer, ni këëllï wïïï ri pwöc 'moa;

¹⁸ kiper duunnö ki met ec jïrï ni näk mo ge iï kan cwïnyï, ni ge bëëdö ni nut dhiï ge bëët.

¹⁹ Ïïni ki dëërï ïïna pwönynya dïcäŋ man en, nee ŋäädhe marï bëëde ni ena ri Wuuö Jwøk.

²⁰ Aani, da luup mo perge leth mo yaa göörö jïrï, mo yïthge da pwöc ki luup kwänynyö,

²¹ niï pwönyge ki gïna beer ki luup ma adïëri, nee lønye jïrï ki man dwøgï luubö ma adïëri jï ŋata jääŋ ïïni.

²² Kär niï twiera ŋata can kiper na cane, ni ba thielï luubö piny mar ŋata näk jïre bäŋ teek kar løøk;

²³ kiper ge ŋun Wuuö Jwøki ŋunnö, ni käl jwïëc jø wø twier geni.

²⁴ Kärï dwätö ki dhaanhø mo laara wëër, ni ba cäädhï ki dhaanhø ma ŋat wëëye,

²⁵ nee uutjïëth tïïe moe ba kwanyï, niï määnynya dëërï keerï ka abïëp.

²⁶ Kärï tïmö niï ena dï jø wø cïp dëëtge na dïgïti, jø wø cïp rege nyeŋ pïït jø møøk.

²⁷ ?Ni näk bäŋ gïn cudï ki gø, pëët niine moï owëëgï gø käl jaak kiper ŋø?

²⁸ Kär niï daaga gïr waŋ keew mana nut cøøn, mana tïïc kwäyu.

²⁹ ?Dhaanhø mo rëëm tïïc ajootï? Eni wø bëëdö ni tïnynya nyeye, ni eni jiy jaak ba tïnynye.