Pwöc Leec Wïc 21 - Wëël Jwøk

¹ Acaare mo wø en cwïny nyeya ena cer Wuuö Jwøk, ni løny jï Wuuö Jwøk ki man bwøth geni ni caala man wø bwøth pïï ki jöörge.

² Ŋati man nø øtjöör tïïc mare wø nëënö ni thïïŋ ki jïre, 'ba Wuuö Jwøk wø neeta cwïny jiy.

³ Ki man tïïc gïn mo beer ki gïn ma adïëri beeye mana met yi Wuuö Jwøki ki gø ni kaala olämi.

⁴ Nyeŋ mo raŋa jiy piny, ki cwïny mo töödö, ki gïï wø tïïcge bëët beeye raay.

⁵ Acaac dhaanhø mo rweenhnhi ri tïïc duua rudø, 'ba ŋat wø lac tïïc jaak wø pätha yi can.

⁶ Jap kwärö mo wø joot ki køør tööt caala rwöc ni wø laar aay, ni caala abïëp mo duunnö ki thøø.

⁷ Jøøa reyø otuut dïwïti marge wøk, kiper man wø kwierge tïïc gïn ma adïëri.

⁸ Jïëth tïïe mo dïbääc luup oköömmö, 'ba jøøa waany, bëëtö marge thïïŋ.

⁹ Ki man bëët dhaanhe thaŋ agööla beerra eni ni kaala man bëëdö yi øtø aciel ki dhaagø ma ŋat pïëm.

¹⁰ Ŋata raac, cwïnye wø ena køør gïï mo reyø, ni nyawatge bäŋ wø raŋe ki waŋ mo beer.

¹¹ Kany wø jääl ŋat abuua, ŋata näk acaara mare thiinh wïïe lëënynyö, 'ba kany wø pwöny ŋata wïïe leer, eni wø jïtö ki kwänynyö.

¹² Jwøk na näk mare adïëri wø neeta gïï wø tïïc po ŋata raac, ni kïth ŋatøgø ni raac enø yi ränynyö.

¹³ Ŋat wø dhïŋ ïthe ki jwøk dhaanhø mo can, eni ki dëëre ojwöŋi ni mare ba wïnynyi.

¹⁴ Muuy mo cïp ni kuc, wëër wø di raanynyø, ni jammi mo cïp ka piny wëër mo teek wø di jooø.

¹⁵ Kany wø ŋøl luup na karge, yïth jøøa marge beer wø mïnnö, 'ba wø duua kwany dëël jï jø wø tïïc gïïa reyø.

¹⁶ Ŋat wø gaa wøk ni wec jöör leec wïc, ree ojwöme kar jøøa no othøw.

¹⁷ Ŋat wø mëër ki bëët ŋedhø cännö, ni ŋat wø mëër ki køøŋø ki maaw ba kwär.

¹⁸ Ŋata raac beeye noo wiil ŋata mare beer ki gø, ni ö ŋat wø tïïc gïï mo reyø ki piny ni läw kar ŋata mare thïïŋ.

¹⁹ Ki man bëët dhaanhe paap beerra eni ni kaala man bëëdö ki dhaagø ma ŋat pïëm ma aguni.

²⁰ Maaw ki jap kwärö mo perge leth wø ena po dhaanhø mo wïïe leer, 'ba dhaanhø mo wïïe känni jape wø laare ka thöör.

²¹ Ŋat wø løp køør adïëri ki mëër man wø ba jøøl, jïtö ki kwøw ki bëënynyö ki wödö.

²² Dhaanhø mo wïïe leer wø päära yi pääny jøøa teek, ni tøk kwöra teek ni wø ŋääthge.

²³ Ŋat wø gwøk dhee ki leebe, gwøga jwïëye yïth gïï wø leth.

²⁴ Ŋat mo töödö mo taaga jiy wø cwøl ni ŋat abuua, ni eni jammi wø tïïe ka atöör mo dwøŋ.

²⁵ Ŋat leth dëël onäk parri mare keere, kiper mana wec ceŋŋe ni ba tïïö.

²⁶ Eni wø bëënna par keere ki yi cäŋ bäre, 'ba ŋata mare beer wø cïpö ni cere ba jøør ŋääe.

²⁷ ?Ni näk mo Jwøk yie raac ko olämi mar ŋata raac, a rääye onäk nyïëdi nø kanyo cïp gø ki cwïny mo raac?

²⁸ Ŋat wø kat luup ränynyö, 'ba ŋat wø wïny luubö ni beer, luup wø di lamø ni ba jook.

²⁹ Ŋat mo raac, waŋe wø døøye mo teek, 'ba dhaanhø mo mare thïïŋ, uutjïëth tïïe moe wø di caarø keere.

³⁰ Leec wïc ki ŋäc tiet luup ki pwöc, bäŋgø mo kaala Wuuö Jwøk.

³¹ Okweeny wø di jiiŋŋø kiper cäŋ leny, 'ba böödö wø ena baŋ Wuuö Jwøk.