Pwöc Leec Wïc 20 - Wëël Jwøk

¹ Køøŋ omøki dhaanhø wø døøye ŋat abuua, ni ö køøŋe mo keec ni døøc dhaanhø ŋat dïtat, ni ŋat wø gaa wøk ki køørge wïïe ba leer.

² Lwär man wø ööi ki køør wëër mar nyeya caala lwär man wø ööi ki køør wëëc ŋuu, ni ŋat wø raany cwïny nyeya nyääga jwïëye keere.

³ Beeye gïn mo duua wödö jï dhaanhø ki man døøc kare mo bäär ki pïëm, 'ba ŋat mo wïïe känni, cwïnye wø piew ki wëër.

⁴ Ŋat leth dëël bäŋ wø purö ki dhi køth, 'ba kany wø tïme na kar kac, bäŋ gïn mo joode.

⁵ Acaare moa en cwïny dhaanhø wø ena yie na caal kut, 'ba ŋat mo wïïe da acaara tiet luup wø käle wøk.

⁶ Jiy mo thööth wø köö ni ge mëër ki jiy ki mëër mo ba jøøl, ?'ba aŋa no jïti ki ŋat mo oŋäädhö?

⁷ Ŋata mare beer ni wø bëëdö ni mare adïëri, obwöre moe ogwïëth ki køøre.

⁸ Nyeya kany wø pï bäät wälu ni ŋudö ki luup, gïïa reyø bëët wø di piedhø ki waŋe.

⁹ ?Aŋa ni maar köö, ni «Aani, cwïnya bëëdö ni tøŋ, naa bëëdö naa waany, ni bäŋ raay dëëra»?

¹⁰ Gïï røm ma teeŋi ki rumme ma teeŋi, Wuuö Jwøk yie raac ki geni bëët.

¹¹ Këëlla nyilaal wø di ŋääö ki køør tïïe moe, ki man näk mo bëëtö mare beer na kare.

¹² Ïth mo wïnyö ki waŋ mo räŋö ge tïïya Wuuö Jwøki karge riet.

¹³ Kärï bëëdö niï mëër ki niine, niï ba cännï; nyeŋŋï bëëtge ni lwieny, niï bëëdï ni jïrï da cam.

¹⁴ Ŋat ŋïëw wø pïëmö, ni «Gät gïrpiny raac raac,» 'ba no nø ŋeew gø, eni wø aay ni ŋwöö.

¹⁵ Wø da warkey ki jap mïërö mo thööth mo perge leth, 'ba dhøk man wø car luup kwänynyö caala jammi moa perge leth døc.

¹⁶ Ŋat mo ojïëy na kar ŋat pïïdö marï ma wëëllö, abïïne wär lwørï, ni magï eni na dïgïti kanyo cïp ree na kar dhaanhø mo path.

¹⁷ Cam mo joot ka jöör cwøk ŋweeth jï dhaanhø, 'ba aŋuunne dhee otïmö ni päŋ ka gii.

¹⁸ Acaac tïïe wø bëëdö karge ni teek ki køør mano joot ki ri pwöc; ni leny wø di bwødhø ki køør acaara mo beer.

¹⁹ Ŋat wø wïdi jaak ni waya nyeŋ, wø dhäänynya luup mo okanø; kiper manøgø nø, kärï dwätö ki ŋat mo waya luup jaak.

²⁰ Ŋat mo janynya wänni ki menni, tïmö kaamar lamba mo othøw yi muudhö.

²¹ Jap wø dööŋ mo wø laar lwør ni karge poodi, bäŋ gwïëth mo pïï bäätge.

²² Kärï niï köö, ni «Kwör gïna raac na tïïc dëëra coola coolø;» 'ba bëëdï niï koora Wuuö Jwøk; ïïno pieme.

²³ Gïï røm ma teeŋi, Wuuö Jwøk yie raac ki ge, ni rumi mo mudö ba beer.

²⁴ Jöör bëët dhaanhø ena cer Wuuö Jwøk; ?a dhaanhø, øtjööre a dee gø ŋääö keere nidïï?

²⁵ Ki man laar dhaanhe kööŋ jï Jwøk ni wïïe käre caarø, otïmö na abïëp jïre kanyo caar wïïe kiper na kööŋe jaak.

²⁶ Nyeya mo wïïe leer jøøa reyø wø piedhe wøk kaamar lethø, ni tïïc gïï mo leth dëëtge.

²⁷ Cwïny beeye lamba mana cïp Wuuö Jwøki jï dhaanhø, man wø meeny yi dhaanhø bäre.

²⁸ Mëër man wø ba jøøl ka adïëri nyeya wø gwøkge gwøø, ni ö wälu mare ni këët piny ni teek ki køør bëët-mëër.

²⁹ Ajiem mar wøpe wø ööi ka ri teek dëël marge, ni ö wödö mar jø døøŋŋø ni käl ri lwaar moge.

³⁰ Acwäät mo duunnö ka atwøt gïïa reyø wø puue wøk, ni ö pöödö ni peny cwïny dhaanhø.