Pwöc Leec Wïc 19 - Wëël Jwøk

¹ Beerra eni ki man bëët dhaanhe ni can mo caatha jöö mo thïïŋ, ni kaala ŋat mo wella luup mo wïïe känni.

² Paa gïn mo beer ki man many gïrpiny døc ni bäŋ kwänynyö, ni ŋat wø jalli, jööre wø di baaø.

³ Kanyo ö bëët dïkät wïci noo kïth dhaanhø jöör ränynyö, dhaanhø cwïnye wø di keeyø ki Wuuö Jwøk.

⁴ Jap kwärö wø kännö ki nyïïawäädi mo thööth, 'ba ŋat mo can wø wec nyawati wiiø.

⁵ Ŋat wø kat luup ba kääŋi ka ajäla, ni eni ni wø car tööt ba bøth.

⁶ Jiy mo thööth ŋat mo kare dwøŋ wø mwøthge mwødhø, ni jiy bëët manynya nyawat ki ŋat mo cere jööt ki cïp jammi.

⁷ ?Ni näk ŋat mo can, nyïïmenni omännö ki eni, a nyïïawäädi moe nø, a bäc kar mo nyïëdi nø ki eni? Këël eni doo rïïŋö køørge ni kwaaya geni, ge bäŋ dee joodø.

⁸ Ŋat wø jïti ki leec wïc wø bëëdö ni mëër ki dëëre, ni ŋat wø gwøk acaara mare jïtö ki gïn mo beer.

⁹ Ŋat wø lam luubö ni paa kare ba kääŋi ka ajäla, ni eni ni wø car tööt ränynyö.

¹⁰ Patha orømø ki man bëët ŋat mo wïïe känni kar ŋedhø, ni patha orømø ki man bëët laŋŋø ni kwääri ena tiere.

¹¹ Leec wïc dhaanhø wø di kønyø nee ba laar päth ri wëër, ni tïme na gïr ajiem jïre kany wø wec gïna baac dëëre.

¹² Wëër mar nyeya caala man wø wëër ŋuuwi, 'ba met ec mare caala man wø ö thööyi ni wø øc tiet beel.

¹³ Nyilaal mo wïïe känni duua ränynyö dëër wänni, ni ö dhaage ma ŋat pïëm ni känne ki öölö kaamar gïn mo cwïër cooth.

¹⁴ Paac ki jap kwärö wø joot dhaanhe baŋ wänni, 'ba dhaagø mo wïïe da acaara wø cïpa Wuuö Jwøki.

¹⁵ Leth dëël duua niine mo thööth jï dhaanhø, ni dhaanhø mo ceŋŋe ee kut kööre wø bup cooth.

¹⁶ Ŋat wø gwøk ciik Jwøk, gwøga jwïëy moe, 'ba ŋat wø ba cädö kiper jïëth tïïe moe thøw.

¹⁷ Ŋat wø nyooth mëër ni wø cïpi jï jøøa can mooya Wuuö Jwøk; eni cun Wuuö Jwøki cunnö kiper gïna beer na tïïe.

¹⁸ Pwöny wäädï kanyo poode ni da ŋäädhe kipere, ni kär niï päya eni thøø.

¹⁹ Dhaanhø ma ŋat wëëye jap wø ŋøl bääte dee coolø e keere, kiper ni näk mo iï kønyø, ï meeta bëëtö mare na raac.

²⁰ Wïny köömmö ni jïëyï pwöc, niï bëëdï ni wïïï leer yïth nïr kwøw moï.

²¹ Da acaare mo thööth cwïny dhaanhø, 'ba pwöc mar Wuuö Jwøk bëëdö kare.

²² Gïn mo cwïny dhaanhø doo ena køøre beeye bëët mëër man wø ba jøøl, ni beerra eni ki man bëët dhaanhe ki can ni kaala man bëëde ni ena twöt.

²³ Ki man lwäär Wuuö Jwøk bwødha jiy baŋ kwøw, ni dhaanhø bëëdö ni yie met jaak, ni bäŋ gïn mo raac mo gut gø.

²⁴ Ŋat leth dëël cere wø rwaage ya awal baŋ kwön, 'ba këël ki man duu cere wøk nee kïth dhee dhäthö.

²⁵ Noo pwötï ŋat abuua, ŋata näk acaara mare thiinh waŋe tïmö ni riek; noo joogï ŋat mo cädö, eni jïtö ki kwänynyö.

²⁶ Ŋat mo caara wänni ni riem menni beeye ŋat mo käla lään wïc ki räny nyeŋ.

²⁷ Nyie wääda, ki man wïnynyï pwöc ni cäŋï gø weyø, beeye gaan wøk keere ki ri luup kwänynyö.

²⁸ Ŋat wø kat luup mo wïïe raac, ŋøl ma adïëri ee tïïö na gïr kwääk jaak, ni ö dhi ŋat mo raaci ni jïëc gïï mo reyø.

²⁹ Ajäla onø jiiŋŋø kiper jø abuua, ni ö acwääti ni jiiŋŋi kiper jøøa wïthge känni.