Pwöc Leec Wïc 18 - Wëël Jwøk

¹ Ŋat wø kul dëëre wø manynya mare keere, ni eni wø jøøŋŋa luup leec wïc bëët.

² Ŋat mo wïïe känni, yie ba met ki ŋäc tiet luup, 'ba eni wø nyøtha acaara mare keere.

³ Kany wø ö rääö, ajøøŋ wø cäädhö køøre, ni ö räny nyeŋŋi ni cäädhe ka ajaany ciel.

⁴ Luup mo wø cur dhi dhaanhø wø nyootha acaac yie na caal kut, ni ena jøøro mar leec wïc.

⁵ Ajeeny paa gïn mo beer ki man ci løø ŋat mo raac, wala ki man daaŋ luup ŋat mo mare adïëri kar løøk.

⁶ Leep ŋat mo wïïe känni wø kännö ki pïëm, ni dhee wø cøøra pöödö keere.

⁷ Dhi ŋat mo wïïe känni beeye ränynyö mare keere, ni leebe beeye abïëp jwïëy moe keere.

⁸ Luup dïwääc nyeŋ caala cam mo met, ni wø dønynya yi cwïny dhaanhø bäre.

⁹ Ŋat mo nweenna ceŋŋe ki tïïc, ena nyawat ŋat mo mare aranya.

¹⁰ Wuuö Jwøk beeye kiir mo teek, ni ŋata mare beer wø reŋŋa yie ni bëëde no ogwøø.

¹¹ Jap kwärö mo dhaanhø caala pääny mo ogeerø ni teek ki jïre, ni ee caarø ni beeye kiir mo bäär mo gwøga eni.

¹² Kany wø poot dhaanhe ni kär ränynyö, cwïnye wø da atöör, 'ba kany wø bëët dhaanhe ni mwöl, wø jïtö ki wödö.

¹³ Ŋat wø dwøk luubö ni tier luubö poot käre wïnynyö, nyootha dïkät wïc mare, ni duunnö ki lään wïc bääte.

¹⁴ Dhaanhø mo cwïnye ee maaø, täw wø di jïënyö, ?'ba dhaanhø mo cwïnye opädhö, ree omak gø nidïï?

¹⁵ Ŋat mo cwïnye da acaara jïtö ki kwänynyö, ni ŋat mo wïïe leer, ïthe wø di ciiø ki kwänynyö.

¹⁶ Gïn wø cïp dhaanhe, jöör dhaanhø wø di jabø, ni dhaanhø wø käle nyïm jiy mo døøŋŋø.

¹⁷ Ŋat wø kwøŋ mare caan, mare wø nëënö kee adïëri, kanyo poode ni poot bäŋ ŋato pëëny gø.

¹⁸ Nyuuthe mo wø tïïc ni nyootha gïrpiny, pïëm wø di jooø, ni ŋøl luubö yïthakic jiy mo teek.

¹⁹ Døøn kanya ciel ki cöögö mo da gïn mo obaa dëëre teek døc ni kaala mac kiir mo teek, ni män mo tägö yïthakic jiy teek døc kaamar nywïëny wø dëët dhi kiir ki gø.

²⁰ Dhaanhø wø jäŋ ki køør luupe mo wø cur dhee, ni jääŋe ki gïï wø cur leebe.

²¹ Kwøw ki thøø ena cer leep, ni jø wø mëër ki cäänö ojäŋ ki gïï wø duu leepi.

²² Ŋat wø nyöömmi ki dhaagø, wø joota gïn mo beer, ni jïte ki met ec baŋ Wuuö Jwøk.

²³ Ŋat mo can wø cäänö ni kwaaya ree, 'ba ŋat mo okwär wø dwugö ni teek.

²⁴ Da jiy mo manynya køør nyïïawäädi mo thööth, ni ge wø pätha yi ränynyö, 'ba da teeŋ nyawat mo gööga ri dhaanhø døc ni kaala cöögö.