Pwöc Leec Wïc 17 - Wëël Jwøk

¹ Beerra eni ki man bääl thääŋ kwön mo obutö kany mo da bëët-mëër yie, ni kaala paac mo camma rïŋ yie mo yie da pïëm.

² Ŋat tïïc mo jammi tïïe ka leec wïc, tïmö na kwääc nyilaal man wø känni ki lään wïc jï wänni, ni eni jïtö ki gïï wø dööŋ na moe kaamar wäädö aciel dï nyïïmëëe.

³ Gwel-bïrö ki warkey beeye maa thäth ni wø raŋi ki gø, 'ba cwïny dhaanhø, beeye Wuuö Jwøk ni wø raŋ gø.

⁴ Ŋat wø tïïc gïï mo reyø wø wïnynya luup dhøk jøøa reyø, ni ö twöti ni cek ïthe ki luup dhøgi mo räänyö.

⁵ Ŋat wø buu ŋat mo can janynya Jwøk na cwääc ŋatøgø, ni ŋat wø yie mïnni ki gïï wø leth ni wø tägi ba kääŋi ka ajäla.

⁶ Aduda mar jäle beeye nyïïkwaacge, ni ö ajiemmi mar obwöre ni näk wëëe moge.

⁷ Luup ŋat mo cäänö døc jaak mo wïïe raac ba mïërö, ni luum tööt ba mïërö ki man cur dhi kwäärö.

⁸ Jammi mo wø cïp ki piny beege ni wø ŋääth ŋat wø cïp gø, ni ki jïre kany wø ci yie, gïïa manynye di joodø.

⁹ Ŋat wø uum gïn mo obaa dëëre, tïïya mëër, 'ba ŋat wø nøøc luubö pää nyïïawäädi.

¹⁰ Juuk wø dønynya yi cwïny ŋat mo cädö, ni kaala kwör pöödö ma dïpa mo opïï dëër ŋat mo wïïe känni.

¹¹ Dhaanhø mo raac wø manynya ageem keere; 'ba ŋat mo ogäy di jääŋŋö baŋe.

¹² Beerra eni ki man røømmø ki maath kwac mo nyïïe okälö, ni kaala man røømmø ki ŋat mo wïïe känni mo tïïya tïï bøøl.

¹³ Ŋat wø duu gïn mo raac na kar gïna beer, gïn mo raac ba doo aay paare.

¹⁴ Täk wëër caala kany wø tuc adïïra, kiper manøgø nø, pïëm wär laar jook kanyo poode ni kär kadhø.

¹⁵ Ŋat wø ŋun ŋat mo raac, ki ŋat wø ŋøl ŋat mo mare beer wøk, Wuuö Jwøk yie raac ki geni bëët.

¹⁶ ?Aŋø, ŋat mo wïïe känni, ki man ŋeew leec wïc ki gwel moe, agïnaŋø ni kønye, ni eni wïïe bäŋ acaara?

¹⁷ Nyawat wø bëënna mëër cooth, ni ö cöögö ni nywøli kiper køny cäŋ gïï mo leth.

¹⁸ Ŋat mo ba cädö, ree wø di cïbö na dïgïti, ni cïp ree waŋ luubö mar dhaanhø mør.

¹⁹ Ŋat mo mëër ki bääö, mëër ka leny, ni ŋat wø tïŋ ree maal ni dwøŋŋa kare cwöla ränynyö bääte.

²⁰ Ŋat ma acaaye wella luup ba jïti ki bëëtö mo beer, ni ŋat mo dhee bëënna cwøk pätha yïth gïï mo reyø.

²¹ Ŋat wø nywøl nyilaal mo wïïe känni wø bëëdö ni cwïnye opädhö, ni wää nyilaalli mo wïïe raac bäŋ met ec jïre.

²² Cwïny mo leer beeye kïïna mo beer, 'ba pänh cwïny wø duua dwadø dëër dhaanhø.

²³ Ŋat mo raac wø jïëy ki jammi mo wø cïp ki piny ni kuc, nee jïëth ŋøl luup ma adïëri welle.

²⁴ Ŋat mo cädö, nyïme wø løøe baŋ leec wïc, 'ba ŋat mo wïïe känni, waŋe täägö jaak.

²⁵ Nyilaal mo wïïe känni duua kïmmö jï wänni, ni duunne ki keec cwïny jï menni na nywøl gø.

²⁶ Cam jammi jaak bäät ŋat mo mare beer paa gïn mo beer, ni pwöt dhaanhø mo kare dwøŋ kiper bëëtö mare na thïïŋ poot paa gïn mo beer.

²⁷ Ŋat mo okwänynyö, ree wø di gwøø ki luup moe, ni ŋat mo wïïe da acaara ba laar wëër.

²⁸ Këël ŋat mo wïïe känni, ni näk bëëdö ni lïŋö, di kwaanø ni wïïe leer, ni kany wø näk mo dhee ee cïëgö, wø di købø ni wïïe da acaara.