Pwöc Leec Wïc 16 - Wëël Jwøk

¹ Dhaanhø wø cädö ki yi cwïnye kiper luubö mano caane, 'ba gïno beer ni wø dwøk leebe käla baŋ Wuuö Jwøk.

² Uutjïëth tïïe bëët mo dhaanhø beyø ki jïre, 'ba Wuuö Jwøk beeye ni wø raŋ cwïny dhaanhø.

³ Cïp tïïe moï cer Wuuö Jwøk, køøre acaare moï othur karge ni këëtge piny.

⁴ Wuuö Jwøk jammi bëët ee cwääö kiper tïïe moge, ni ŋata raac cøøa yi ränynyö cäŋ gïïa leth.

⁵ Wuuö Jwøk yie raac ki jiy bëët moa näk cwïnyge da atöör; ka adïëri møn, geni, ge ba bøth ka ajäla.

⁶ Ki køør bëët-mëër ki bëët adïëri, gïï wø bayi di wiiø, ni ki køør man lwäär Wuuö Jwøk, dhaanhø ree wø di løø ni kwiera gïïa reyø.

⁷ Kany wø näk mo jïëth tïïe mo dhaanhø duua met ec jï Wuuö Jwøk, Wuuö Jwøk cïpö ki bëët-mëër, këël yïthakic dhaanhø ki nyïïmän moe.

⁸ Bëët dhaanhø mo jape nøk ni mare adïëri beerra eni ni kaala bëët ŋat mo jape thööth mo joot ka jöö mo patha kare.

⁹ Dhaanhø wø cädö kiper øtjöör tïïc mare, 'ba Wuuö Jwøk beeye ni wø bwøth eni ki jööre.

¹⁰ Jwøk ŋøl mana näk kare wø cïbe dhi nyeya, nee dhee ba gaa wøk kany wø ŋøl luup.

¹¹ Rumi ma adïëri ena baŋ Wuuö Jwøk, këël jap røm bëët mo wø tïï jiyi ki ge.

¹² Ki man tïï nyeye ki gïï mo reyø beeye gïn mo ec raac ki gø, kiper wälu marge wø këët piny ka køør bëët adïëri.

¹³ Nyeye yïthge wø mïnni ka jø wø caan adïëri, ni ge wø mëër ka jø wø caan luup mo thïïŋ.

¹⁴ Wëër mar nyeya caala thøø mo ööa bäät dhaanhø, 'ba dhaanhø mo wïïe leer, cwïny nyeya wø dwøge piny.

¹⁵ Leec täärnyïm mar nyeya beeye kwøw jï jiy, ni met ec mare caala man wø ö pøølli ni wø käl køth mar dhi køth.

¹⁶ A teeŋ beer mo nyïëdi ki man joot leec wïc ni kaala warkey! Naa teeŋ beer mo nyïëdi ki man jier ŋäc tiet luup ni kaala gwel-bïrö!

¹⁷ Jöör jøøa marge thïïŋ wø ŋäätö ki buut gïïa reyø, ni ŋat wø koor jööre gwøga jwïëye.

¹⁸ Atöör wø bwøtha maal, køøre ki ränynyö, ni ö koorrø ni bwøth maal, køøre ki pädhö.

¹⁹ Ki man dwøk røk piny ni bëëdö ki jøøa can beerra eni ni kaala man nywaak jap twëër ki jø atöör.

²⁰ Ŋat wø cek ïthe ki pwöc jïtö ki bëëtö mo beer, ni gwïëth wø ena jï ŋat wø bëëdö ni ŋäätha Wuuö Jwøk.

²¹ Ŋat mo wïïe leer di cwølø ni ŋat mo wïïe da acaara, ni luubö mo met wø wëëga pwöc ciin cwïny jiy.

²² Ŋäc tiet luup beeye jøøro mar kwøw jï ŋata en jï gø, 'ba pwöny jiy mo wïthge känni beeye bøøl jaak.

²³ Acaac dhaanhø mo wïïe leer wø bëëdö ni pwönynya leebe, ni wëëga pwöc man wø caane ciin cwïny jiy.

²⁴ Luup mo ec met ki ge caala maar kïc ma tëëma, ni ŋweeth marge duunnö ki met ec jï dhaanhø ki jööt dëël.

²⁵ Da jöö mo wø nëënö ni mïërö jï dhaanhø, 'ba aŋuunne coonya baŋ thøø.

²⁶ Käc, dhaanhø wø di pwönynyö ki tïïc, ni dhaanhø wø pee baŋ puur.

²⁷ Dhaanhø mo wïïe raac cädö kiper tïï gïï mo reyø, ni dhee caala maac ni wø raany piny.

²⁸ Ŋat wø wel luup ŋeela mäne, ni dïwääc nyeŋŋi wø pää nyïïawäädi mo oŋïyö døc.

²⁹ Ŋat okiera wï watge wø di maaŋŋø, ni watge wø di bwødhø ki øtjöö mo ba beer.

³⁰ Ŋat wø niiŋ waŋe wø caara luup cwøk, ni ŋat wø cuul dhee wø nyootha raay mo ee nø caar ki cwïnye.

³¹ Jïër ma lwaar beeye adun ajiem jï dhaanhø mo dwøŋ, ni wø joot ki køør bëët adïëri.

³² Ŋat wø ba laar wëër beerra eni ni kaala ŋat mo oteeø, ni ŋat wø mak cwïnye beerra eni ni kaala ŋat wø mak pääny ki tøŋ.

³³ Nyuuthe mo wø tïïc ni nyootha gïrpiny wø di tïïö, 'ba ŋøl luup mana näk adïëri käla baŋ Wuuö Jwøk.