Pwöc Leec Wïc 12 - Wëël Jwøk

¹ Ŋat wø mëër ki pwöc, mëër ka kwänynyö, 'ba ŋat wø män ki juuk, wïïe bäŋgø.

² Dhaanhø mo beer jïtö ki met ec baŋ Wuuö Jwøk, 'ba ŋat wø caar tïï gïï mo reyø jääle jäälö.

³ Rääö, kar dhaanhø ba tïïe ni teek, 'ba ŋata mare beer tiere ba cööt wøk.

⁴ Dhaagø mo bëëtö mare beer caala aduda jï cwøre, 'ba dhaagø mo kännö ki lään wïc caala atwøda mo odheeth dëër cwøre.

⁵ Acaare mo jøøa marge beer beege adïëri, 'ba pwöc mo jøøa reyø beege cwøk.

⁶ Luup mo jøøa reyø beege luup mo kønynya rem jiy piny, 'ba luup mo jøøa marge thïïŋ, jiy wø piemge piemø.

⁷ Jøøa reyø di raanynyø ni tïmge ni bäŋgø këët, 'ba mïëc jøøa marge beer bëëdö karge ni teek.

⁸ Dhaanhø di pwøø ki køør leec wïc mare, 'ba mar jø adøønne wø di taaø.

⁹ Beerra dhaanhø mo kare thiinh ni da ŋat mo tïnynya gø; eni kaala dhaanhø mo døøya kare mo dwøŋ ni bäŋ gïn came.

¹⁰ Dhaanhø mo mare beer, wø cädö kiper bëët lääy mare, 'ba pänh cwïny mar ŋata raac beeye ki man tïïc gïn mo raac dëër lääy.

¹¹ Ŋat wø puur ŋöömö mare, wø jïtö ki cam mo päl, 'ba ŋat wø rïïŋi køør gïï mo oballe, eni ba cädö.

¹² Ŋat raay cwïnye wø ena køør jap wø twier jø raayi, 'ba ŋata mare beer tiere wø këëta piny ni jïte ki nyïëdi.

¹³ Ŋat mo raac wø pätha ya abïëp ki køør raay mo dhee, 'ba ŋata mare beer wø käla wøk yïth gïïa leth.

¹⁴ Dhaanhø wø jäŋ ki gïï mo beyø ki køør luupe ni wø cur dhee, ni ö tïïe mo wø tïïc dhaanhe ki cere ni duunge jïre.

¹⁵ Ŋat mo wïïe känni wø cädö ni beerra mare keere, 'ba ŋat mo wïïe leer, ïthe wø di ciiø ki pwöc.

¹⁶ Ŋat mo wïïe känni, gootø mare wø laar ka ŋäc, 'ba ŋat mo waŋe riek, lään wïc mare wø di buŋö.

¹⁷ Ŋat wø lam luubö na adïëri, caana mana näk kare, 'ba ŋat wø kat luup wø cara cwøk.

¹⁸ Luup mo laar ka caan ni wïc kär caarø, cööbö kaamar opëëllö, 'ba lëëp jøøa wïthge leer käla køny.

¹⁹ Dhøk mo cara adïëri ruu na bäre bäre, 'ba leep mo cara tööt beeta kany mo thiinh.

²⁰ Cwøk ena cwïny jø wø caar tïï gïï mo reyø, 'ba jø wø pöö ki pwöc bëët-mëër, jïge da met ec.

²¹ Bäŋ gïn mo leth mo päth bäät jøøa marge beer, 'ba jø raay wø bëëdö yïth gïïa reyø.

²² Wuuö Jwøk yie raac ki dhøk mo cara tööt, 'ba yie wø met ka jø wø tïïya adïëri.

²³ Ŋat mo waŋe riek, leec wïc mare wø di kanø, 'ba jøøa wïthge känni wø cara bøøl jaak.

²⁴ Ŋat mo cere rweenhnhi ri tïïc, tïmö ni jiy bëënna eni, 'ba ŋata jääk tïmö na laŋ dhaanhø mør.

²⁵ Kïmmö cwïny dhaanhø wø døøye mo peek, 'ba luubö mo beer yi dhaanhø wø døøye mo met.

²⁶ Dhaanhø mo mare beer bëëtö ma kare wø di nyoodhø jï watge, 'ba jöör ŋata raac jiy wø bwødhe wøk kwöra reyø.

²⁷ Ŋat leth dëël ba kän paac ki rïŋö, 'ba ŋat mo rweenhnhi ri tïïc beeye dhaanhø mo pere leth.

²⁸ Jöör bëënynyö nuta kwøw yie, ni bäŋe thøø øtjööre.