Pwöc Leec Wïc 10 - Wëël Jwøk

Pwöc Leec Wïc Mo Cølöman

¹ Moi beege pwöc leec wïc mo Cølöman. Nyilaal mo wïïe leer duua met ec jï wänni, 'ba nyilaal mo wïïe känni duua pänh cwïny jï menni.

² Jammi mo joot ki køør tïïe mo reyø bäŋ gïn duuge, 'ba bëët bëënynyö beeye ni wø käl dhaanhø wøk cer thøø.

³ Wuuö Jwøk jøøa marge beer ba wëëk käc, 'ba par mar jø raay wø di raanynyø.

⁴ Ceŋ mo okut käw wø duua bëët can, 'ba ceŋ mo rweenhnhi ri tïïc wø duua bëët kwär.

⁵ Ŋat wø cooŋ caape ka arïïa wïïe leer, 'ba ŋat wø bëën niine kany wø tïme na kar kac duua lään wïc.

⁶ Gwïëth en bäät ŋat wø mare beer, 'ba dïwït mar dhi ŋat raay wø døøa dëëre keere.

⁷ Par wïc ki gïr jøøa marge beer beeye gwïëth, 'ba nyeŋ jøøa reyø rwäänyö.

⁸ Ŋat mo wïïe leer, ciik wø jïëe jïëö, 'ba ŋat mo wïïe känni ni wø car oballe pätha yi ränynyö.

⁹ Ŋat wø cäädhi ki jöö mo thïïŋ wø cäädhö no ogwøø, 'ba ŋat wø cäädhi ki uutjïëthe mo oköömmö, eni wø di joodø.

¹⁰ Eni ni wø niiŋ waŋe wø duua gïï mo reyø, 'ba ŋat mo wïïe känni ni wø car oballe pätha yi ränynyö.

¹¹ Dhøk mar ŋata mare beer beeye jøøro mar kwøw, 'ba dïwït maar dhi ŋat raay wø døøa dëëre keere.

¹² Män cïïmma wëëye yïthakic jiy, 'ba mëër wø rïëpa gïï wø bayi bëët.

¹³ Luup leec wïc wø joota dhi ŋat wø ŋäc gïna beer ki gïna raac, 'ba ŋat wø ba cädö wø rømi ka acwäät keere.

¹⁴ Jø wø wïthge leer, kwänynyö wø kange cwïnyge, 'ba dhi ŋat mo wïïe känni kare cään ki ränynyö.

¹⁵ Jap kwärö mo dhaanhø caala kiir mo teek jïre, 'ba bëët can duua ränynyö bäät ŋata can.

¹⁶ Öölö mar jøøa marge beer duua bëëtö mo beer, 'ba gïn wø duu tïïe mo jøøa reyø beeye ajäla.

¹⁷ Ŋat wø gwøk pwöc cäädha øtjöör kwøw, 'ba ŋat wø kwier juuk, eno gaa wøk.

¹⁸ Ŋat wø kaan män, dhee da tööt, ni ŋat wø ŋeel waac nyeŋ wïïe ba leer.

¹⁹ Kany wø cään dhaanhe ki luup mo thööth, bääyö ba kääŋi, 'ba ŋat wø gwøk leebe, wïïe leer.

²⁰ Luup dhaanhø mo mare beer perge leth ni caala gwel-bïrö mana tøŋ, 'ba acaara mar ŋat raay bäŋ gïn kønye.

²¹ Cäänö mar jøøa marge beer jiy mo thööth kønye kønyø, 'ba jøøa wïthge känni othøw kiper bäŋ acaara.

²² Gwïëth mar Wuuö Jwøk beeye wø duunni ki kwärö, ni kïmmö bäŋ wø meet bääte.

²³ Ŋat mo wïïe känni, gïï mo reyø tïïe kaamar gïr kwääk jaak, 'ba ŋat wø ŋäc tiet luup, yie wø mïnni ka bëët leec wïc.

²⁴ Gïn wø lwäär ŋata raaci ki gø opïï bääte, 'ba gïn wø many ŋata beerri oci jïre.

²⁵ Kany wø pööth atuunne, ŋata raac ba joot këët, 'ba ŋata beer bëëdö ni tiere okëët piny na bäre bäre.

²⁶ Kaawat man wø bëët gïn mo waci ki lak, ki man wø bëët jïrö ki waŋ, gïnögø thuwø caala ŋat mo dëëre leth jï ŋat wø jääŋ gø.

²⁷ Ki man lwäär Wuuö Jwøk nïr kwøw di meedø, 'ba cwiic kwøw mo jøøa reyø oŋuudi ni nøk.

²⁸ Aŋuun ŋäädhe mar jøøa beyø beeye met ec, 'ba ŋäädhe mar jøøa reyø beeye ränynyö.

²⁹ Jöör Wuuö Jwøk beeye kar gwøk røk jï jøøa marge thïïŋ, 'ba beeye jöör ränynyö jï jø wø tïïc gïï wø reyø.

³⁰ Jøøa marge beer tietge ba cööt wøk na bäre bäre, 'ba jø raay ba ruu wïth ŋøøm.

³¹ Dhi ŋata mare beer wø cïpa leec wïc, 'ba leep mo wella luup ŋula wøk.

³² Ŋata mare beer wø ŋäya caan gïn mo beer, 'ba dhøk jøøa reyø wø ŋäya wel luup.