Pilipay 3 - Wëël Jwøk

Luum Bëënynyö Mana Näk Adïëri

¹ 'Ba mana dööŋ keere nø, nyïïmera, yïthu mïnge ki ri Wuuö. Aani, a ba ööl ki man gööra gïïa kwøŋa göör jïïu, ni beeye gïn mo beer kiperu.

² Gwøgu rou kiper guu, ni gwøgu rou ki jø wø tïïc raay, ni gwøgu rou ki jø wø pöö ki pwöc mo patha adïëri kiper luum daŋ.

³ Kiper øøni, øøna jøøa daŋ na adïëri, ni wø wøør Jwøk ki ri Jwïëy, ni ø töödö ka ri Krictø Jecu, ni ø ba ŋääth mo dëël na bäre bäre.

⁴ Kiper aani ki dëëra doo mïërö jïra ki man ŋäädha dëëra. 'Ba ni näk da dhaanhø mo ee caarø ni mïërö jïre ki man ŋääth dëëre, kadha mara.

⁵ Kiper aana daŋ ri bäc nïne, ni aana thwønh ki yi Icriel, ni aana nyï dhi øt Benjamen, ni aana ŋat Ibaru, naa nywöli ni aana Ibaru. 'Ba nee kiper Ciik Jwøk, aana ŋat Paricith.

⁶ Nee kiper tïïc mana tïïa ki cwïnya bäre, aana gëëmö ka acooŋ Jwøk. 'Ba ni näk mo beeye kiper bëënynyö man wø en køør Ciik Jwøk, bäŋ ajäla dëëra.

⁷ 'Ba aani, gïïögø bëët na wara beyø jïra ataa kiper nyeŋ Krictø.

⁸ Ni jammi bëët ataa møn, kiper mana beerra eni døc beeye ki man ŋääa Krictø Jecu na näk Kwääya. Ni beeye kipere na taaa jammi bëët, ni neeta geni kaamar juu mo owetø, kiper nee Krictø ci jïra,

⁹ kiper naa joot naa ena dëëre, naa ba en dëëre kaper bëënynyö mana näk mara keera ni wø en ri ciik Jwøk, 'ba beeye bëënynyö man wø joot ki køør ŋäädhe ki ri Krictø, ni beeye bëënynyö man wø ööi ki baŋ Jwøk na näk ogöök ri ŋäädhe,

¹⁰ kiper naa tïma naa ŋäya eni, ki teek duunne wøk ki yi thøø, naa tïma naa nywaaga gïïa leth na jwøre, ni tïma kaamare ri thøwe;

¹¹ naa ŋäätha gø ni løny ki man duua wøk ki yi thøø.

¹² Naa ba caan gø ni moøgø bëët onø ö jïra, wala aano nø thur kara. 'Ba dëëra yaa maa, nee tïïa na mara, kiper Krictø Jecu aana nø tïïe na mare.

¹³ Nyïïmera, paa yaa caarø ni manøgø yaa maa bäre. Ba gïrpiny aciel keere man wø tïïa, wïïa bäŋ wø para kiper gïïa no opöödhö, 'ba cwïnya yaa mïnnö kiper gïnö ni en nyïma ice.

¹⁴ Ni dëëra yaa maa, naa pïïa kanya manynyi, kiper nee muuy mana cwøl aani kipere maal ki ri Krictø Jecu, nee cïp jïra.

¹⁵ 'Ba ø ni døøŋŋø ii, beege gïïögø na døø lääŋŋö ki cwïnynyø. 'Ba ni näk gïïögø poot ba røm cwïnynyu, onyooth Jwøki jïïu thuwø.

¹⁶ 'Ba beerra man putø mana nø joodø mak na adïëri.

¹⁷ Nyïïmera, ŋwaallu mara, u bëët. Ni neetu jø wø bëëdö ki teeŋ bëëtö mana jootu baŋwa.

¹⁸ Kiper kaawat man wø caana jïïu cooth, naa cäŋa gø caannø jïïu kawaane naa jwöŋö en, jiy mo thööth atïmö ni ge män ki jaadha no odëëdö mar Krictø.

¹⁹ 'Ba cuŋ marge beeye ränynyö, ni jwøge beeye ec, ni lään wïc marge ege tïïö na ajiem, ni cwïnyge ege cïp køør jap piny.

²⁰ 'Ba øøni, pøø beeye maal, ni ø koora Pïëmi no ööi ki yie, na näk Kwäärö ma Jecu Krictø,

²¹ ŋato wiil dëëtø moi ni reyø ii, ni tïïc ge ni caala dëëre na näk dëër ajiem, ki køør teek man wø en jïre ki man tïïc jammi bëët ni leŋa mare.