Pilipay 1 - Wëël Jwøk

Määdhe

¹ Aana Pøøl ki Timöthi, wa na laak Krictø Jecu. Wa määtha uuni na jø Jwøk bëët ni en dëër Krictø yi Pilipay, ki jø wø raŋ acooŋ Jwøk, ki jø wø tïny acooŋa.

² Met ec bëëde bäätu, ki bëët-mëër man wø ööi ki baŋ Jwøk na näk Wääø ki Kwäärö ma Jecu Krictø.

Pøøl Dwøga Met Ec Mare Jï Jwøk

³ 'Ba Jwøa wø pwøa pwøø kany wø para gïru

⁴ ki yïth laam 'moa bëët, naa wø lämö cooth ni yia met.

⁵ Ni met ec mara wø dwøga dwøgø kiper na dwätu ki aani ri luumma nyään na met, ki mana täge ki dïcäŋa wïnynyu gø yie, këël kawaane en.

⁶ 'Ba ŋääa ni eni na nø tägö ki tïïc mo beer dëëtu, oput tïïö këël mano thur kare dïcäŋo näk cäŋ Jecu Krictø.

⁷ Wøp jïra ki mana caara gïnögø kiperu bëët. Kiper gïru ena cwïnya u bëët, kaawat mana dwätu ki aani ri met yi Jwøk, këël ki yi twöc mara, ki piem luumma nyään na met nee cuŋŋe ni teek.

⁸ Kiper Jwøk beeye ni ŋäc mara, naa lääŋŋa uuni døc ki mëër mana en jï Krictø Jecu.

⁹ 'Ba a wø kwaya Jwøk nee mëër maru pälle cooth, ka acaara ki man ŋäyu gïno beer ki gïno raac,

¹⁰ kiper nou jïëyu ki gïïa beyø, ni putu bëëtö ni cwïnynyu tar ni bäŋ ajäla dëëtu dïcäŋo duu Krictø,

¹¹ nou bëëdu ni cwïnynyu päŋ ki nyïï bëënynyö mo wø ööi ki køør Jecu Krictø, nee Jwøk jiem ni pwøi ki køøru.

Bëët Kwøw Beeye Krictø

¹² Nyïïmera, a manynya uuni man ŋäyu gø ni gïna tägö dëëra atïmö møn ni tïïya luumma nyään na met ni nyaai.

¹³ Ni puti ya dïkuye moa kurö ŋäc, këël jø møga bëët, naa twöc kaper Krictø.

¹⁴ Ni ö thööth nyïïmëëe ni tëënge ki ri Wuuö kiper twöc mara, ni tïmge ni ge teek døc ki man caange luum Jwøk ni bäŋ lwär.

¹⁵ 'Ba jø møøk gïr Krictø køpge kaper gwön ki pïëm na en cwïnyge, ni ö jø møøki ni køpge gø ni cwïnyge leer jaak.

¹⁶ 'Ba jø wø køp gïr Krictø ni cwïnyge leer wø tïïcge ka mëër, ni ŋäcge ni aano kïth kany kiper luumma nyään na met ni wø caana.

¹⁷ 'Ba jø gwön ki jø pïëm moøgø, gïr Krictø wø køpge kaper dëëtge keerge, ni yïthge da atade, 'ba ege caarø noo lïnhnhi jïra, a ni en øt twöc en.

¹⁸ ?Agïnaŋø noo caana nø? Beeye aciel keere. Nee cwøk wala adïëri, gïr Krictø wø di købø ki yïth moøgø bëët. Ni beeye ni mïn yia en ki gø. 'Ba ka adïëri møn, yia omïnni,

¹⁹ kiper ŋääa ki cwïnya ni cuŋ gïn en otïmö ni beeye pïëm man piem aani ki gø, ki køør laam mou, ki køny mar Jwïëc Jecu Krictø.

²⁰ Kiper yaa ŋäädhø døc ni wïïa ba doo lää bäre bäre, 'ba cwïnya yaa maa døc kawaane kaawat man wø bëëda cooth, nee Krictø wøør ki dëëra, nee mara kwøw wala thøø.

²¹ Kiper ni näk maa kwøw, a bëënna Krictø, 'ba ni näk maa thøw, beeye beenynye eni.

²² 'Ba ni näk beeye kwøw ki dëël man en, a doo tïmö naa tïïö ki tïïc mo beer. 'Ba mano jiera kuua.

²³ Gïï na ariiø ii a ege diyø døc. 'Ba a doo naa manynya man aa ni cøøa buut Krictø, kiper beeye mana beerra eni døc.

²⁴ 'Ba ki man bëëda naa kwøw ki dëël man en, beer kaperu.

²⁵ 'Ba gïnögø ŋääa døc, ni ŋääa ni aano ruu naa bëëdö dïïu, kiper nou tëënnu, nee yïthu mïnge ri ŋäädhe man,

²⁶ kiper manøgønø, nou jïtu ki jöö man mïn yïthu ki gø dëër Krictø Jecu ki køøra, kiper mano duua baŋu.

²⁷ 'Ba man caana jïïu keere nø, bëëdu ni bëëtö maru orømø ki luumma nyään na met mar Krictø. Kiper ni näk maa duua baŋu ni neena uuni, wala a ba ö baŋu, nee wïnynya ki man näk mou cuŋŋö nou teek ki cwïny aciel, ni döötu aciel, nou tïïö døc ni dëëtu you maa karubëët, kiper ŋäädhe mar luumma nyään na met.

²⁸ 'Ba kär nou lwäyö ki gïï wø tïïc jø wø män ki uuni bëët. Kiper manøgøøni beeye nyuudhi jïge mar ränynyö marge, 'ba ki jïïu beeye pïëm man piem uuni ki gø, ni beeye man wø cïp Jwøki.

²⁹ 'Ba ocïbö jïïu kiper nyeŋ Krictø, ki man jwørru gïï mo leth kipere, ni paa man jïëyu ni ŋääthu eni keere.

³⁰ 'Ba uuni, u ena yi gïn mo teek mo keda leny, mo caala mana kwøŋu gø joot dëëra ca, ni cäŋu gø wïnynyö kawaane naa poot ena yie en.