Pïëmme 9 - Wëël Jwøk

Luum Abimëlëk, Ki Gïna Tägö Yïthakicge Ki Jø Cekam

¹ 'Ba Abimëlëk o Jerubaal aci Cekam baŋ tuuŋ menni, ni cääne ki geni këël jøøa en ri dhi øt kwari wää menni ge bëët, ni kööe,

² ni «Caannu ennø, ni wïnyö jï jø Cekam bëët, ni ‹Jierru mana beerra eni ki baŋu. ?Aŋø, beeye gïn mo beer ki man ö wäät Jerubaal bëët na näk pïërabïriiø ki man bëëtge na kwääri mou, wala beerra dhaanhø aciel ki man bëëde na kwäärö maru?› 'Ba uuni, wïthu wär caarru thuwø ki man näk ma aana dhaanhø ma rem dëëtu naa käla dëëtu.»

³ Køøre tuuŋ menni luup moøgø bëët acaange ni wïnyö jï jø Cekam bëët, ni ge caana dwøre; 'ba cwïnyge aputge løø køør Abimëlëk, kiper gena köö, ni «Eni ena tuuŋø møn.»

⁴ Ni ö geni ni moocge Abimëlëk ki gwet-bïrö ma pïërabïriiø, ni gwel moøgø lwørge yi øt jwøge ma Baal-Berith; ni ö eni ni määnye ki jiy mo patha karge mo wïthge reyø ni tïmge na jø tïïc jïre, ni ö jøøgø ni caathge køøre.

⁵ Køøre Abimëlëk aci dhi øt wänni na en Opara, ni ö uutwänni na näk pïërabïriiø, ni beege wäät Jerubaal, ni put ge ŋarø bäät kïdi aciel mo ena kaace. 'Ba Jötham o Jerubaal na thiinh keere abøth, kiper eni ree akane.

⁶ 'Ba jø Cekam bëët këël jø wø bëëdö Bëëth-Milø bëët na en Cekam kaagø, rege adwalge ni cige ni røønyge Abimëlëk na nyeya buut gïna no ocwöth piny tier jaadha dwøŋ na en Cekam.

⁷ 'Ba kanya caani jï Jötham, ena put aay ni cuŋŋe wï Kïn Geridhan, ni cääne ka aŋaade ni dwøre ee tïŋ maal; ni kööe jï jø Cekam, ni «Wui, u na jø Cekam, cegu ïthu ki luum caana en, nee tïme ni maara lønyø jï Jwøk ki man cek ïthe ki maru.

⁸ Dïcäŋ aciel jenni rege adwalge ni aacge nee röönyge ki nyeya mo käär geni, ni köge jï wädö, ni ‹Tïmï ni ïïna nyeya marwa.›

⁹ «'Ba jaath manøgø aköö jï jenni moøgø, na ‹?Aŋø, maaw mara man ni këël Jwøk ki jiy jïtö ki wöt ki køøre en, daa wiiø ni cøøa kuna tuuŋŋa jenni ni aana wïthge?›

¹⁰ «Køøre jenni aköö jï olaam, ni ‹Ööï ni tïmï ni ïïna nyeya marwa.›

¹¹ «'Ba olaam aköö jï jenni moøgø, na ‹?Aŋø, nyïëdi 'moa ni beyø ni ŋweeth ii, daa wiiø ni cøøa kuna tuuŋŋa jenni ni aana wïthge?›

¹² «Køøre jenni aköö jï omøk, ni ‹Ööï ni tïmï ni ïïna nyeya marwa.›

¹³ «'Ba omøk aköö jïge, na ‹?Aŋø, nyïëdi 'moa ni wø nywøp na køøŋø, ni këël Jwøk ki jiy jïtö ki met ec ki køøre en, daa wiiø ni cøøa kuna tuuŋŋa jenni ni aana wïthge?›

¹⁴ «'Ba na tïme na aŋuudi, jenni bëët aköö jï oŋïrö, ni ‹Ööï ni tïmï ni ïïna nyeya marwa.›

¹⁵ «Ni kö oŋïrö jï jenni moøgø, ‹Ni näk mo u caana adïëri møn naa røønynyu ni aana nyeya maru, ööu ni rïŋŋu tïpö mara; 'ba ni näk mo paa enøgønø, beerra man ö maaci wøk ki røk koodhi 'moa ni waaŋ jer lur Libaanø moa perge leth ni thöör geni.›

¹⁶ «'Ba ennø møn, ni näk gïna nø tïïyu enø, na røønynyu Abimëlëk na nyeya, ni näk tïïyu na adïëri ka acaara ma kare, nou cädö nou tïïya gïn mo beer kiper wära ma Jerubaal këël dhi øde bäre, nou coola gïna nø tïïe na beer møn, beerra man bëëdu ni ïthu met.

¹⁷ Kiper wära akëëdö kiperu, ni cïp dëëre këël mana piem uuni ceŋ jø Midien.

¹⁸ 'Ba gïna tïïyu dïcäŋi en, maru beeye ööny maal ni maru män ki dhi øt wära; kiper wääte ma pïërabïriiø anø 'nägu bäät kïdi aciel kaace, ni røønynyu Abimëlëk na nyeya maru, u na jø Cekam, ni beeye wääde na nywøl dhaaŋŋa näk ŋat tïïc jaak, kiper mana näk eni na Abimëlëk enø, ena tuuŋu.

¹⁹ 'Ba ni näk gïna nø tïïyu enø, tïïyu na adïëri ka acaara ma kare, nou cädö nou tïïya gïn mo beer kiper wära ma Jerubaal këël dhi øde bäre dïcäŋi en, beerra man bëëdu ni yïthu met ka Abimëlëk, ni ö Abimëlëki ni bëëde ni yie met ki uuni thuwø.

²⁰ 'Ba ni näk mo paa enøgønø, beerra man ö maaci wøk ki ra Abimëlëk ni thöör uuni, u jø Cekam këël jø wø bëëdö Bëëth-Milø na en Cekam kaagø; ni ö maaci wøk thuwø ki rou, u jø Cekam ki jø Bëëth-Milø, ni thöör Abimëlëk.»

²¹ Køøre Jötham ree akwale ni reeŋe, ni ci paana cwøl ni Bëër, ni put bëëtö kaace, kiper mana lwäye ko owänni ma Abimëlëk.

²² 'Ba Abimëlëk abëëdö ki cwiiri adäk ni jø Icriel moa en kaace ena cere.

²³ Køøre Jwøk acaare mo reyø ajääŋŋe yïthakic Abimëlëk ki jø Cekam; ni ö jø Cekammi ni cätge ki man tïïge ki gïn mo raac dëër Abimëlëk.

²⁴ 'Ba gïnögø atïïc Jwøki ni coola kwör ki køør thøø mana raac na tïïc dëët wäät Jerubaal na näk pïërabïriiø; ni ö kwör remø marge ni tïme ni ena bäät owääge ma Abimëlëk na dïïr wïthge, ki jø Cekam moa cøk eni nee uutwänni nääe.

²⁵ Køøre jø Cekam jiy atïïcge nee møørge piny bäät kïte moa en kaace ni marge ageem ka Abimëlëk; ni ö jøøgø ni twierge jiy bëët mo wø cør øtjöö mana en buutge kaace; 'ba luubö manøgø awïnyö baŋ Abimëlëk.

²⁶ Kanyøgønø, Gäl wär Ebet aöö ki tuuŋge ni pïïcge Cekam; ni ö jø Cekammi ni putge ŋäädhe marge kïth bäät Gäl.

²⁷ Køøre jø Cekam aci yïth pwöth ni putge kwany ki nyïïomøki, ni biicge ge, ni nywøpge gø na køøŋø, ni tïïge ka ajwöm met ec; ni dønyge yi øt jwøk marge, ni beeye jwøk man wø wøørge, ni cämge ni mäthge, ni täkge ki man jøøŋge Abimëlëk.

²⁸ Køøre Gäl wär Ebet aköö, «?Aŋø, Abimëlëk aŋa? ?Cekam thuwø tiere agïnaŋø, ni tïme ni ø bëënna Abimëlëk en? ?Aŋø, Abimëlëk paa o Jerubaal na bëëde? ?A Dhëbul, paa kar waŋ mare? Beerra man bëëdø ni ø bëënna jøøa käl ri Eemör wää Cekam. ?'Ba aperŋø nø, ni tïme ni ø bëënna Abimëlëk en?

²⁹ 'Ba ennø møn, doo na jøøi ii ena cera, eni na Abimëlëk enø daa rïëma wøk. A doo köö jïre, ni ‹Ö wøk ni lwaa leny marï iï tïïö ni päl, nee ø këëdö.› »

³⁰ 'Ba kanya ö Dhëbul, ŋata no ocïbö na kar waŋ paac manøgø, na wïny luup moa caan Gäl wär Ebet, ena put wëër ki cwïnye døc.

³¹ Ni jääk baŋ Abimëlëk ki jiy, ni jääŋŋe ka piny mëëth, ni kööe, ni «Neenï, Gäl wär Ebet ki tuuŋge anø ö Cekam kany; ennø, geni dï paac manøgø bäre ege nø ŋeel ki nyeŋŋï.

³² 'Ba ennø, ïïni ki jø leny moøgø ni buutï yøø, pänynyu maal ki wäär, ni ööu ni butu piny yi pwöl leny ni rou you kanø.

³³ 'Ba kanyo tïme na amöölla, ni cäŋ tuulö, wäru laaru päny maal ni tugu pääny man; køøre nø, kanyo tïme ni Gäl ki jøøgø ni buute yøø, ge ööa wøk baŋu nee këëtge ki uuni, gïno løny jïïu ki man tïïyu gø dëëtge jaak, wäru putu tïïc.»

³⁴ Køøre Abimëlëk ki jø leny bëët moa en buute, gena put päny maal ki wäär, ni cige ni butge piny yi pwöl leny mana en buut Cekam kaace ni gena dhøgi aŋween.

³⁵ 'Ba Gäl wär Ebet aci dhi kiir mar pääny manøgø, ni cuŋŋe kaace; 'ba Abimëlëk ki jø leny moa en buute, gena put päny maal ki kanya näk rege ege kanø yie.

³⁶ 'Ba kanya ö Gälli na lwïthe, jø leny moa cäädhö ka Abimëlëk ajoode, ni kööe jï Dhëbul, ni «Neenï, da jiy mo cäädhö ni ge löönynya piny ki bäät kïte.» 'Ba Dhëbul aköö jïgø, ni «Bäŋgø; ï neeta tïpö mar kïte, kiper nëëni kaamar jiy.»

³⁷ 'Ba Gäl acäŋ cäänö ni kööe, ni «Ka adïëri møn, da jiy mo cäädhö ni ge löönynyi ka kanya en maal na en dï ŋöömö kaace, ni dhøk aciel cäädhö ni cura jöö mana en buut jaadha dwøŋ na näk mar jø adïëda.»

³⁸ Køøre Dhëbul aköö jï Gäl, na «?Age ŋwøc marï nø, na kööï, na ‹?Abimëlëk aŋa, ni bëënnø eni en?›? ?Aŋø, paa jøøa taagï na bëëde yøø? Ci wøk baŋge ennø, ni këëdï ki geni.»

³⁹ Ni ö Gälli ni put ci wøk ni nëënö jï dïbwöthe mo jø Cekam ni këëde ka Abimëlëk.

⁴⁰ 'Ba ena bööt Abimëlëki ni put reeŋø ni ŋwieya gø; ni ö jiye mo thööth ni put dëëtge jïtö ki ŋwiili ni päänhge ni geno këët dhi kiir.

⁴¹ Køøre Abimëlëk aput bëëtö Aruma. 'Ba Dhëbul, Gäl ki tuuŋge aput riem wøk nee ba bëëtge Cekam këët.

⁴² 'Ba na tïme na amöölla maya jø Cekam aci wøk yïth pwöth, ni ö gïnögø ni wïnynyi ya Abimëlëki.

⁴³ Køøre Abimëlëk aay ki jø leny moe ni pääŋ geni na dhøgi adäk, ni butge piny yi pwöl leny ni dëëtge ege kanø; 'ba kanya lwïthe na joot jiy ni ööa wøk ki yi pääny, gena put päny maal ni 'näkge jøøgø.

⁴⁴ Køøre Abimëlëk ki jø leny moa näk dhøk aciel na en buute, gena put rwädhö ni cige ni cuŋge dhi kiir mar pääny manøgø; ni ö jø lenynyi moa näk dhøgi ariiø ni rwäthge baŋ jiy moa en yïth pwöth ni putge ge 'näk.

⁴⁵ 'Ba Abimëlëk aput këëdö ki jøøa en pääny manøgø ni thöör dïcäŋ manøgø bäre, ni put gø mac ni 'näk jiy moa en yie kaagø; køøre pääny manøgø araanynye ni jør acäbö yie na nyuudhi.

⁴⁶ 'Ba kanya ö gïnögø na wïnynyi jiyi bëët moa näk bëëdö yi øt pööki mana dwøŋ na bäär na en Cekam, gena put reŋ dï øt jwøge ma El-Berith, kanya no otïïö ni teek na kar gwøk røk.

⁴⁷ 'Ba awïny Abimëlëki ni jiy bëët moa näk bëëdö yi øt pööki mana dwøŋ na bäär na en Cekam wïthge anø kuurge kanya aciel.

⁴⁸ Kanyøgønø, Abimëlëk ki jø leny moe bëët, gena aay ni putge eth maal bäät kïnna cwøl ni Jaalmön; ni ö Abimëlëki ni lwør ley ni ŋøt bat jaath, ni tïŋ gø maal ni gøø gø göönne. Køøre ena köö jï jø leny moa en buute kaagø, ni «Gïna tïïa na nø neennu ennø, laaru tïïc nou ŋwaala gø.»

⁴⁹ Ni ö jøøgø bëët ni putge ŋutö thuwø ni ŋati man nø ŋunna ree ki bat jaath, ni putge wääth køør Abimëlëk, ni cige ni jääŋge bäädi mo jenni moøgø dëër øda no otïïö na kar gwøk røk, ni putge gø nyep ki maac ni ge nyïpa bäät jøøa en yi ødøgø. Ni ö jiy bëët moa näk bëëdö yi øt pööki mana dwøŋ na bäär na en Cekam ni putge thøø, ni gena jiy mo jïtö ki kuma, ni beege cwøw ki mään bëët.

⁵⁰ 'Ba na tïme na køøre cään, Abimëlëk ki jø leny moe apööth Tëbët, ni tïïcge twïër marge buut Tëbët ni këëtge ki jø paanøgø, ni putge gø mac.

⁵¹ 'Ba da øt pööki mo dwøŋ mo bäär mo ogeerø ni teek mo ena dï pääny manøgø, ni ö jø paanøgø bëët, ni beege cwøw ki mään ki dïbwöthe bëët, ni putge reŋ yie ni putge dhi ødøgø dëët bäätge, ni cige ni ethge maal wï pööki manøgø.

⁵² Kanyøgønø, Abimëlëk aput pïï buut pööki manøgø ni këëde ki jøøa en yie, ni ö buut dhi øt pööki manøgø nee nyebe ki maac.

⁵³ 'Ba dhaagø aciel røk jøøa en wï pööki, kïn guur alëëŋe ki maal ni leeŋ gø wï Abimëlëk, ni ö akwaan wïïe ni put ŋedhø.

⁵⁴ 'Ba Abimëlëk, ŋat tïïc mare man wø käär jap leny alaar cwøl ni kööe jïgø, ni «Wöth opëëllö marï wøk ni 'nägï aani, nee ba køp, ni ‹Ena 'näk dhaagø jaak.› » Ni ö nyenøgø ni put Abimëlëk cwøp ni put Abimëlëki thøø.

⁵⁵ 'Ba kanya nø jooti ya jø Icrielli na Abimëlëk athøw, jøw aput keethø ni ŋati man nø døøa kar bëëtö mare.

⁵⁶ Kanyøgønø, gïna tïïc Abimëlëki na raac, ni beeye gïna tïïe dëër wänni na nyääk jwïëc uutwänni moa näk pïërabïriiø, gïnögø acool Jwøki dëëre.

⁵⁷ Këël gïïa reyø bëët na tïïc jø Cekammi adwøk Jwøki wïthge thuwø, ni ö luupi moa car Jöthammi o Jerubaal ni keda luup acïëni ni put pïï bäätge møn.