Pïëmme 7 - Wëël Jwøk

Kanya Ö Gidien Na Bööt Jø Midien

¹ Køøre Jerubaal, ni beeye Gidien, ki jø leny moa en buute bëët, gena päny maal ka amöölla cøøn ni cige ni tïïcge twïër marge buut jøøro mar paana cwøl na Aaröt. 'Ba twïër mar jø Midien ena jï kuna en wï-piny ki geni; ni twïër manøgø ena buut kïdi mana cwøl ni Mörë na en dï gool mana cwøl ni Jedhriel.

² 'Ba Wuuö Jwøk aköö jï Gidien, ni «Jø leny moøgø ni buutï yøø, atïmö ni thööth døc ki man cïba jø Midien ceŋge, kiper kanymør jø Icriel ŋwöö jaak ni köge, ni ‹Waani, jø Midien aböötwa ki teek marwa keerwa.›

³ 'Ba ennø, gøø awaaci piny ni wïnyö jï jø leny bëët, ni kööï, ni ‹Ŋat mo olwäyö ni dëëre miel, løk ree ni døø paac, ni tïŋŋi ka bäät kïdi man na Gelät en.› » Kanyøgønø, jø leny ma kume ma pïërariiø ka ariiø aput døø paac, ni dööŋ jiyi ma kume apaar.

⁴ Køøre Wuuö Jwøk acäŋ köö jï Gidien, ni «Jø leny moøgø poot thööth døc. Ennø, løøc piny ki geni ni cou bäät jøøro nee ge jiera jïrï. 'Ba ŋat wäro caana jïrï, ni ‹Ŋati en doo aay ki ïïni,› wär ŋatøca aae ki ïïni; 'ba ŋat wäro caana jïrï, ni ‹Ŋati en ba doo aay ki ïïni,› ŋatøca kär aay ki ïïni.»

⁵ Kanyøgønø, Gidien aput løøc piny ki jø leny ni cige bäät jøøro. Køøre Wuuö Jwøk aköö jï Gidien, ni «Pääŋ jø leny moo mäthi ki pïï ki ceŋge kaawat mano ö gwöki o gat pïï, ni kïthï geni kur keerge, ni iï pääŋŋö ki jø wø puthi ki pïï ni cøŋge ege këël piny.»

⁶ 'Ba kwään jiy moa mäthö ki pïï ki ceŋge ni ge kïtha dhøkge, beege jiy ma dïpe adäk keerge. 'Ba lwaa dhaanhø bäre cøŋge akëëlge piny ni puthge ki pïï.

⁷ Køøre Wuuö Jwøk aköö jï Gidien, ni «Uuno piema ceŋ jø Midien ki ri jø leny moøgø na dïpe adäk yøø, na maath pïï ki ceŋge, ni cïba jø Midien ceŋŋu. 'Ba ennø, jø leny møga bëët døøkge nø, ni ŋati man nø døøa kar bëëtö mare.»

⁸ 'Ba jø leny moa näk dïpe adäk, caammi ki tuŋi moa en ceŋ jøøgø alwørge. Ni ö Gidienni ni wëëk jø Icriel moøgø bëët wääth nee ŋati man nø døø kar bëëtö mare. 'Ba ena dööŋ ki jøøa näk dïpe adäk keerge; ni twïër mar jø Midien nëënö jïre ni ena piny dï gool kaace.

⁹ 'Ba ni poot na dïwäänögø, Wuuö Jwøk aköö jï Gidien, ni «Ööu maal, ni løøyu piny ni tugu twïër jø Midien, kiper ge yaa nø cïp ceŋŋu.

¹⁰ 'Ba ni näk miï lwäär ki man løøyï piny baŋ leny, ïïni ki ŋat tïïc marï ma Pura wäru løøyu piny twïër jø Midien.

¹¹ Køøre gïïo car jø Midienni owïnynyï; køøre cään nø, ïïno jïti ki teek nee tïme ni løny jïrï ki man løøyï piny ni tugï twïër manøgø.» Køøre Gidien ki ŋat tïïc mare ma Pura gena løøc piny ni pïïcge buut jø leny mo jø Midien moa en deŋ twïër.

¹² 'Ba jø Midien ki jø Amalëk ki jø wø bëëdö jï løø kur tuul-cäŋ, dï gool manøgø bäre ege gääbö, ni kwäänge thööth døc kaamar lwaa bäänyö; këël athïrööle moge ba løny ki kwaan, kiper ge thööth døc ni kwäänge caala nyeŋ akwöny deŋ naama dwøŋ.

¹³ 'Ba kanya ö Gidienni na pïïe twïër mar jø Midien, ka adïëri møn, da dhaanhø mo pädö ki lääk jï nyawatge, ni kööe, ni «Neenï, aana lägö keda da dääpö mo tïïc ki møk bëëlö mana cwøl ni gäbci mo oŋïël yi twïër marø, ø na jø Midien, ni pïïe ro oduŋkaany kwääc lwaak, ni gøøc gø këël mana pädhe, ni ö oduŋkaara ni put gø jal ni luk wï gø piny, ni put pädhö no oninyaŋŋa.»

¹⁴ Ni løgi ya nyawatge jïre ni kööe, ni «Manøgø paa gïn mør na bäre bäre; beeye opëëllö mar Gidien o Jöac nyï Icriel, kiper Jwøk, jø Midien ki twïër marge bäre, ee nø cïp cer Gidien.»

¹⁵ 'Ba kanya ö Gidienni na wïny lääk mana par ki tier gø mana løk, eni cøŋŋe aput këël piny ni pwøc Wuuö Jwøk. Køøre ena duu twïër mar jø Icriel ni kööe, ni «Ööu maal, kiper Wuuö Jwøk jø Midien këël twïër marge ee nø cïp ceŋŋu.»

¹⁶ Ni ö Gidienni ni pääŋ jø leny moa näk dïpe adäk na dhøgi adäk, ni cïp ceŋ jøøgø bëët ki tuŋi ki dääe mo yïthge ŋammø, ni yïth dääe moøgø da ameethi.

¹⁷ Køøre ena köö jïge, ni «Neennu jïra, ni ŋwallu gïno tïïa. Ennø, kanyo pïïa deŋ twïër mar jø Midien, gïno tïïa kaace wär putu tïïc thuwø.

¹⁸ Aani ki jøw en buuta bëët kanyo koothwa tuŋi, uuni thuwø tuŋi mou wär koothu ki deŋ twïër manøgø bäre, ni kwöŋŋu ni kööu, ni ‹Beeye per Wuuö Jwøk ki Gidien.› »

¹⁹ Køøre Gidien ki jø leny moa näk dïpa na en buute, gena öö ni pïïcge deŋ twïër mar jø Midien kanya tïme na dï wäär ni jø wø kurö ri riet koor, ge wïïnnö. 'Ba kanya pïïcge, tuŋi aputge kooth ni putge dääe moa en ceŋge 'näk.

²⁰ 'Ba kanya ö jø lenynyi moø na dhøgi adäk yøø, na koothge tuŋi na 'näkge dääe; geni ameethi aputge mak ki cämge ni makge tuŋi ki cwïcge kiper nee koothge, ni putge kwöŋŋö, ni «Leny man beeye per Wuuö Jwøk ki Gidien.»

²¹ Ni ö ŋati man nø ni put cuŋŋö kare ni twïër bäre ege wïrö; 'ba jø leny bëët moa en twïër jø Midien kaagø, gena put bwøk, ni ge göö ko oduuru kanya rïïŋge.

²² 'Ba kanya ö jø lenynyi mo jø Icriel moa näk dïpe adäk na koothge tuŋi, Wuuö Jwøk jø leny mo jø Midien atïïe nee rege 'näkge keerge ko opëëlle moge, ni put gïnögø tägö dï twïër bäre; ni ö jø Midienni ni putge reeŋø këël mana pïïcge Bëëth-Cita na näk dïët ki Dherera, këël mana pïïcge deŋ Abël-Mööla na en buut Thabet.

²³ 'Ba jø leny mo jø Icriel moa käl røk jø tuuŋ Naptali ki jø tuuŋ Acer ki jø tuuŋ Maneeca, gena cwøl, ni öge ni ŋwiecge køør jø Midien.

²⁴ 'Ba Gidien ajääk baŋ jø Icriel moa näk bëëdö mïëya en bäät kïte bëët na en kur jø tuuŋ Ipariem, ni kööe, ni «Ööu piny baŋ jø Midien ni kwøŋu dhøk wäädhi mak këël mano pïïyu Bëëth-Bara ki Naam Jördan.» Køøre jø leny mo jø tuuŋ Ipariem bëët gena put öö ni putge dhøk wäädhi mak këël mana pïïcge Bëëth-Bara ki Naam Jördan.

²⁵ 'Ba jø leny mo jø tuuŋ Ipariem, kwääri mo jø Midien ariiø amakge, ni beege Orëëp ki Dhëëp. Ni 'näkge Orëëp buut kïdi, ni cak nyeŋ kïnnögø no Orëëp; ni 'näkge Dhëëp buut kany wø biic nyïïomøki yie, ni cak nyeŋ kaace ni Dhëëp. Ni putge läp køør jø Midien. 'Ba køøre cään, wï Orëëp ki wï Dhëëp akälge baŋ Gidien kanya en yie løø Naam Jördan løøga.