Pïëmme 4 - Wëël Jwøk

Kanya Thïïŋ Diböra Na Pïëmi Ni Cige Ki Barak Ni Böötge Cicara

¹ 'Ba jø Icriel acäŋ tïïö ki gïï mo nëëni ni reyø ki jï Wuuö Jwøk køør thøw Ëwut.

² Ni ö Wuuö Jwøki ni cïp geni cer Jabin nyeny jø Keenan, ŋata bëën paana cwøl na Adhör; 'ba kwääc lwaa leny mare beeye Cicara nyen mo bëëdö paana cwøl na Aröcët-Agöyim.

³ 'Ba Cicara jïre da jïëthe mo wø tut okwëënyi ma dïpe abïŋween mo tïïc ka nywïëny, ni put jø Icriel caannø døc ki cwiiri ma pïërariiø. Ni ö jø Icrielli ni jwöŋge dëër Wuuö Jwøk.

⁴ 'Ba kar kaaca nyikuŋ Jwøk ma Diböra cï Lapidöt, bëëdö ni luup ŋøla eni jï jø Icriel.

⁵ 'Ba eni wø pïïa piny tier tuunna cwøl ni tuun Diböra na en yïthakic Reema ki Bëthël na en mïëya en bäät kïte na en kur jø tuuŋ Ipariem; 'ba jø Icriel wø ööa baŋe kaace nee luup moge nee wø ŋøle.

⁶ Kanyøgønø, Diböra ajääk baŋ Barak wär Abiniem paana bëëde yie na cwøl ni Këdëc na en yi ŋööm Naptali nee ööe, ni kööe jïgø, ni «Ennø, Wuuö Jwøk, Jwø Icriel, ïïna nø köömme, ni kööe, ni ‹Kwänyï ki jø leny mo jïtö ki kar kume apaar, ni lwørï røk jø tuuŋ Naptali ki jø tuuŋ Dhebulan, ni cou nou cäädhi na athwöe, ni cooŋŋu rou bäät kïdi mana cwøl ni Tabör.

⁷ Ni ö Cicara kwääc lwaa leny mar Jabin, ki jïëthe moe mo wø tut okwëënyi, ki jø leny moe mo thööth døc, ni käla ge wøk baŋï, ni køøla geni bäät naama cwøl ni Kicön, ni puta eni cïp cerï.› »

⁸ Køøre Barak aköö jï Diböra, «Ni näk miï aay ki aani, løny ki man cøøa; 'ba ni näk miï ba aay ki aani, a ba cii.»

⁹ Ni kö Diböra, ni «Ka adïëri møn, aani, a aay ki ïïni; 'ba ajiem mano joot ri leny manøgø, ki køør jöö mana jierï enø, ba doo tïmö na marï, kiper Wuuö Jwøk Cicara cïbe cer dhaagø.» Køøre Diböra ree ajiiŋŋe nee aacge ki Barak ni ge cøøa Këdëc.

¹⁰ 'Ba Barak jø tuuŋ Dhebulan ki jø tuuŋ Naptali acwøle nee cige Këdëc ki eni na aciel, ni beege jø leny mo jïtö ki kar kume apaar. 'Ba Diböra thuwø aay ki eni.

¹¹ 'Ba kar kaaca, Eber nyï Këën ree ee nø daak buut jø Këën møga, ni beege nyïïkwaac Obap wää cï Modhe na daak ree buutge. 'Ba eni ree adaae ki jiye, ni cige kany mo bäär, ni gur oduŋkaara mare piny buut jaadha dwøŋ na en Dhaynanim na en buut Këdëc.

¹² 'Ba awïny Cicara ni Barak wär Abiniem anø aa bäät kïnna cwøl ni Tabör.

¹³ Ni ö Cicara ni cwøl jïëthe moe mo wø tut okwëënyi bëët, ni beege jïëthe mo wø tut okwëënyi ma dïpe abïŋween mo tïïc ka nywïëny, ki jø leny moe bëët moa en buute, ni öge wøk ki yi Aröcët-Agöyim ni cige bäät Naam Kicön.

¹⁴ 'Ba Diböra aköö jï Barak, «Ö maal, kiper man beeye dïcäŋ mano ö Wuuö Jwøki noo cïp Cicara cerï yie; ennø, Wuuö Jwøk anø pööth maal nyïmï.» Køøre Barak aput løøc piny ki bäät kïdi mana cwøl ni Tabör, ni jø leny moe moa näk kume apaar cäädha køøre.

¹⁵ 'Ba kanya tïme na ri leny, Wuuö Jwøk Cicara ki jïëthe mo wø tut okwëënyi ki jø leny moe bëët atïïe nee bwøkge nyïm Barak, ni thøw jic Cicara mo thööth døc; ni ö Cicara ni päny piny ki bäät jääy mare man wø tut okweenynyi ni put reeŋø ki tiete.

¹⁶ 'Ba Barak aput reŋ køør jïëthe mo wø tut okwëënyi ki jø leny mo Cicara, këël mana pïïcge Aröcët-Agöyim; ni ö jø leny bëët mo Cicara ni putge thøø ri leny, ni bäŋgø mo obøth, këël aciel.

¹⁷ 'Ba Cicara aput reeŋø ki tiete këël mana put pïï ro oduŋkaany Jaël cï Eber nyï Këën. Kiper kar kaaca da bëët-mëër yïthakic Jabin nyeny Adhör ki jø dhi øt Eber nyï Këën.

¹⁸ Køøre Jaël aci wøk nee røømge ki Cicara, ni ko Jaëlli jï Cicara, ni «Gääï, kwäärö, gää baŋa; kärï lwäyö.» Ni ö Cicara ni put gaa baŋe yo oduŋkaara, ni ö Jaël ni rïëp Cicara ka abïï rïëp.

¹⁹ Køøre Cicara aköö, na «A kwaya ïïni, mooc a ki pïï mo thenh nee maadha, kiper aano näk riewi.» Kanyøgønø, Jaël dho opïr pïën mo yie da caak ajabe ni wëëk gø eni ni mäthe; køøre ena cäŋ rïëpö.

²⁰ Køøre Cicara aköö jï Jaël, ni «Ci cuŋŋï dho oduŋkaara; 'ba ni näk mo da dhaanhø mo ööi ni pëënynya ïïni, ni kööe, ni ‹?Da dhaanhø mo orïŋ paarï kany?› køøre wärï kööï jï ŋatøca, ni ‹Bäŋgø.› »

²¹ 'Ba Jaël cï Eber alwötö ki dïnöök mar oduŋkaara, ni lwør dïgudi ki cere maya, ni ci baŋ Cicara mëëth, ni put dïnöök gur ki thääŋŋe këël mana put dïnöök këët piny yïth ŋøøm; kiper Cicara obutö døc ki niir öölö. Ni ö Cicara ni put thøø.

²² 'Ba kanya ö Baraki na läp køør Cicara, Jaël aö wøk nee røømge ki gø, ni kööe jïgø, ni «Ööï, nee ŋatøgø ni manynyï enø nee nyoodha jïrï.» Køøre Barak aput døny yo oduŋkaara ki Jaël, ni joot Cicara no othøw piny ni dïnöök poot ena thääŋŋe.

²³ 'Ba dïcäŋeca, Jwøk wï Jabin nyeny jø Keenan aput dwøk piny nyïm jø Icriel.

²⁴ 'Ba jø Icriel, Jabin nyeny jø Keenan ki jiye acaarge, ni ö teeki mar jø Icriel ni tïme ni cäätha maal bäätge, këël mana raanyge geni.