Pïëmme 3 - Wëël Jwøk

Luum Wïth Juurre Moa Dööŋ Nee Jø Icriel Pääri Ki Rege

¹ 'Ba moi beege wïth juurre moa dööŋ na wec Wuuö Jwøki nee jø Icriel pääri ki rege; ni jø Icriel moøgø noo pääri yøø beege moa näk lenye moa këël jø Icrielli ki jø Keenan kucge na bäre.

² 'Ba gïnögø atïïc Wuuö Jwøki kiper nee beenhnhe mo jø Icriel moa näk lenye kucge dïkwøŋ nee kwänyge ki leny.

³ 'Ba wïth juurre moøgø beege kwääri mo jø Pilitin moa näk abïïc ki jicge, ki jø Keenan bëët, ki jø Caydan, ki jø Ëwi moa näk bëëdö buut kïnna cwøl ni Libaanø; ni jø Ëwi moøgø poge tägi ka ri kïnna cwøl ni Baal-Armön këël mana pïïe kanya cwøl ni Libø-Amath.

⁴ 'Ba wïth juurre moøgø awec kiper nee jø Icriel pääri ki rege, nee jø Icriel joot ki man näk mo ciik Wuuö Jwøk gwøkge gwøø, ni beege ciik moa ö Wuuö Jwøki na kööm kwäcge ki ge ki dhi Modhe.

⁵ Kanyøgønø, jø Icriel aput bëëtö dï jø Keenan, ki jø Këth, ki jø Amör, ki jø Përec, ki jø Ëwi, ki jø Jeebuc;

⁶ ni ö jø Icrielli ni nyöömge dëët nyïï jøøgø, ni cïpge nyïïge thuwø nee nywøm wäät jøøgø, ni putge juu mo jøøgø tïnynyö.

Kanya Ö Wuuö Jwøki Na Thïïŋ Götönial Na Pïëmi

⁷ Kanyøgønø, jø Icriel atïïö ki gïï mo nëëni ni reyø ki jï Wuuö Jwøk, ni wïl wïthge ki Wuuö Jwøk na bëëdö na Jwøk marge, ni tïnyge juuga cøøri ni Baal ki Actaröt.

⁸ Køøre Wuuö Jwøk aput wëër døc ki jø Icriel, ni put ge cïp cer Kucan-Ricataym nyeny jø Aram-Naarim; ni ö jø Icrielli ni putge Kucan-Ricataym tïnynyö ki cwiiri abära.

⁹ 'Ba kanya ö jø Icrielli na jwöŋge dëër Wuuö Jwøk, Wuuö Jwøk, Götönial nyikwaar jø Kënec, owää Kalëp mana thiinh, athïïŋe na pïëmi kiper nee jø Icriel pieme.

¹⁰ Kanyøgønø, Jwïëc Jwøk aput ö bäät Götönial, ni put tïmö na pïëmi jï jø Icriel. 'Ba kanya ci baŋ leny, Wuuö Jwøk, Kucan-Ricataym nyeny Aram-Naarim aput cïp cer Götönial, ni put gø böötö.

¹¹ Køøre piny aput nikwöc ni bäŋ lenye ki cwiiri ma pïëraŋween. 'Ba Götönial nyikwaar jø Kënec athøw.

Kanya Ö Wuuö Jwøki Na Thïïŋ Ëwut Na Pïëmi

¹² 'Ba jø Icriel acäŋ tïïö ki gïï mo nëëni ni reyø ki jï Wuuö Jwøk. Ni ö Wuuö Jwøki ni mooc Ëglön nyeny jø Möap ki teek mo kaala teek mar jø Icriel, kiper ge na jø Icriel yøø, gena tïïö ki gïï mo nëëni ni reyø ki jï Wuuö Jwøk.

¹³ 'Ba Ëglön nyeny Möap dëëtge adwalge ki nyïïkwaac Amön ki nyïïkwaac Amalëk; ni cige baŋ leny ni böötge jø Icriel, ni putge päänya näk yie da twöe mac.

¹⁴ Ni ö jø Icrielli ni tïnyge Ëglön nyeny Möap ki cwiiri apaar ka abära.

¹⁵ 'Ba kanya ö jø Icrielli na jwöŋge dëër Wuuö Jwøk, Wuuö Jwøk Ëwut o Gëra athïïŋe na pïëmi jï jø Icriel, ni beeye nyen ma caam jwøk mo käla ri jø tuuŋ Benjamen. Ni ö jø Icrielli ni jääŋge Ëwut, nee jap ajwäk kïth baŋ Ëglön nyeny Möap.

¹⁶ 'Ba Ëwut atïïö ko opëëllö ma mare, mo lage karge riet beth, ni bär mare caala rumi mar cenø ma gööyö aciel; ni ö Ëwuti ni twöö opëëllö manøgø ääme mana en bäät cwïïe tier abïïne.

¹⁷ Ni aae ni cïp jap ajwäk jï Ëglön nyeny Möap. 'Ba Ëglön beeye dhaanhø mo dëëre dwøŋ mo olør døc.

¹⁸ 'Ba kanya ö Ëwuti na nø thöör jap ajwäk ki cïp, eni jøøa käär jap ajwäk awëëk wääth nee døøkge.

¹⁹ 'Ba eni ki dëëre kiree, ena duuö ki kanya näk yie da kïte mo otieŋø buut Gëlgela, ni duu baŋ Ëglön ni kööe, «Wui nyeya, aani da luubö mo pere leth mo daa caanø jïrï keerï.» Køøre nyeya aköö ki jøøa en buute, ni «Uuni, paanynyu rou di turu.» Ni ö jiyi moa en buute kaagø ni putge aay.

²⁰ Kanyøgønø, Ëwut aput ci baŋ Ëglön øda ŋec na bëëde yi gø na e keere bäät øtø maal. Køøre Ëwut aköö, ni «Aani, da luubö mo käla baŋ Jwøk mo daa caanø jïrï.» 'Ba Ëglön aput ö maal ki bäät wälu mare.

²¹ Ni ö Ëwuti ni put cere mana näk caame rwaak baŋ opëëllö, ni wöth gø wøk ki kanya en yie bäät ääme mana en bäät cwïïe, ni put Ëglön cwøp ki yi gø.

²² 'Ba opëëllö aput thum yi Ëglön këël jaadhe bäre, ni ö maar yie ni put opëëllö uum, kiper Ëwut opëëllö käre wöth wøk këët; 'ba opëëllö atuny wøk ki yïthakic tiet Ëglön.

²³ Køøre Ëwut adøny wøk ya agööla, ni put dhøk øda en maal bäät øtø na en Ëglönni yie cïëgö, ni dëët geni ki wøk.

²⁴ 'Ba kanya nø døny Ëwuti wøk, jø tïïc mo Ëglön aöö ni jootge dhøk øda en maal no odëëdö; køøre gena köö, ni «Kanymør ni eni ena kar laac manø ni en yi ødø ni ŋec enø.»

²⁵ Køøre gena kurö këël mana tïm wïthge ni laay; 'ba Ëglön dhøk ødøgø käre jabø. Kanyøgønø, geni muktää alwørge ni japge dhøk øtø; 'ba kwäärö marge aputge joot no opädhö dï øtø no nø thøø.

²⁶ 'Ba Ëwut areeŋø kanya poode ni jøøgø ogallø, ni kaal kanya näk yie da kïte mo otieŋø, ni put pïï kanya cwøl ni Cëëra.

²⁷ 'Ba kanya pïïe ennø, tuuŋ aput kooth mïëya en bäät kïte kaagø, ŋöömma näk onø cïp na kur jø tuuŋ Ipariem, ni eni cwøla jiy kiper leny; ni ö jø Icrielli ni putge aay ki eni na aciel ni ge tïŋŋi ki mïëya en bäät kïte kaagø, ni eni bwøtha maal nyïmge.

²⁸ 'Ba ena köö jïge, ni «Caathu køøra, kiper Wuuö Jwøk nyïïmännu ma jø Möap ee nø cïp ceŋŋu.» Køøre jø Icriel gena put wääth køøre ni ge løøya piny, ni putge dhøk wäädhi mo Naam Jördan kanya näk dïët ki Möap mak, ni mänge jø Möap nee bäŋe dhaanhø mo kath løøga.

²⁹ 'Ba kar kaaca jø Icriel, jø Möap mo jïtö ki kume apaar aputge näk, ni beege jiy mo dëëtge døøŋŋø mo teek ki leny; ni bäŋ dhaanhø aciel dëëtge mo obøth.

³⁰ 'Ba kar kaaca jø Möap wïthge aput døø piny, ni putge tïmö ni ge ena tiet jø Icriel. Køøre piny aput nikwöc ni bäŋ lenye ki cwiiri ma pïërabära.

Luum Camgar Kanya Piem Jø Icriel

³¹ 'Ba kanya tïme na køør Ëwut, Camgar wär Anath athïïŋ na pïëmi. 'Ba eni jø Pilitin ma dïpe abïciel anääe ki gïn mo caala apïïdhi, ni piem jø Icriel.