Pïëmme 19 - Wëël Jwøk

Luum Nyï Tuuŋ Libay Ki Dhaaŋŋa Bëëde Ki Gø Na Näk Akwanya

¹ 'Ba yïth nïra beet jø Icrielli ni bäŋ nyeya jïge, da nyen mør ma nyï tuuŋ Libay mo bëëdö na wëëllö paana en teegø na en mïëya en bäät kïte na en kur jø tuuŋ Ipariem; ni nyenøgø jïre da dhaagø ma akwanya mo joode Bethelem na en Juuda.

² 'Ba dhaaŋŋøgø na akwanya enø, awëër ki nyenøgø, ni put aay ni døø po wänni yi Bethelem na en Juuda, ni put bëëtö kaace ki dwäde aŋween.

³ Køøre cwøre aö maal ni läp køøre nee cääne ki gø mëëth ki luup mo mïërö, nee tïme ni løny ki man dwøk gø paare; 'ba nyenøgø cäädhi ka ŋat tïïc mare ka arëëni ariiø. 'Ba kanya pïïcge, nyaanøgø nyï tuuŋ Libay manøgø aput kïth po wänni; 'ba kanya ö wää nyaanøgø na joot nyenøgø, yie aput tïmö ni met, ni pänh gø døc.

⁴ Ni ö wää cïïe ni put kar nyenøgø jiiŋŋø nee pï piny, ni put bëëtö buute kaagø ki nïne adäk, ni ge cämö ni ge mädhö, ni buude kaagø.

⁵ 'Ba na tïme na ŋweer nïne, gena päny maal ka amöölla cøøn, ni ö nyenøgø ni jiiŋ ree ki man tïŋŋe; ni kö wää nyaanøgø jï cø nyaare, ni «Cam mo thiinh en, camï nee dëërï neethïk; køøre nø ïïno tïŋŋi.»

⁶ Kanyøgønø, gena pï piny karge riet, ni cämge ni mäthge. Køøre wää nyaanøgø aköö jï nyenøgø, ni «Aani, a kwaya ïïni niï cäŋï but kany dïwääni, ni bëëdï ni yiï met.»

⁷ Køøre nyenøgø aö maal nee tïŋŋe, 'ba ena kwaac wää cïïe døc këël mana cäŋ but kaagø dïwäänögø.

⁸ 'Ba na tïme na bïï nïne, nyenøgø apäny maal nee tïŋŋe ka amöölla cøøn, ni kö wää nyaanøgø, ni «Aani, a kwaya ïïni, kïth dhiï ki gïn cam nee dëërï neethïk, ni kurï nee tïme niï tïŋŋï ki kur abøøya.» Ni ö geni karge riet ni putge cam jaak.

⁹ 'Ba kanya päŋ wääthi, ni nyenøgø manynya tïŋŋö ki cïïe ki ŋat tïïc mare, wää cïïe aput köö jïgø, «Neenï, ennø, piny anø pöödhö; a kwaya ïïni ki man putï but kany wääni keere. Wui neenï, cäŋ oløny ni thiinh; put but kany wääni keere nø, ni bëëdï ni yiï met. Køøre nø, diøø ïïno päny maal ka amöölla cøøn, ni aayï niï cøøa paarï.»

¹⁰ 'Ba nyenøgø kär jïëy ki man cäŋ but kaagø, ni put ö maal ni tïŋŋe, ni pïïe kany mo dïët ki Jeebuc ni beeye Jerucalem. 'Ba arëëni moe na näk ariiø nutö ni käädö ko opïri; këël cïïe nut ni cäädhi ka eni na aciel.

¹¹ 'Ba kanya tïm karge ni cään ki Jeebuc, piny onø pöödhö kiree; ni kö ŋat tïïc mar nyenøgø jïgø, «A kwaya ïïni, beerra man gaaø pääny jø Jeebuc nee ø butø yie kaace.»

¹² 'Ba nyenøgø aköö jï ŋat tïïc manøgø, ni «Øøni, ø ba gaa pääny juurre møøk jaak mo paa jø Icriel. Øøni, ø puta wääth këël mano pïïø Giba.»

¹³ 'Ba ena cäŋ köö jï ŋat tïïc mare, ni «Ö maaø røø, nee ø pïïø Giba wala Reema, nøø jïtø ki paac aciel mo butø yie røk mïëri moøgø.»

¹⁴ Kanyøgønø, gena put pöödhö ni cääthge, ni ö cäŋŋi ni put pädhö bäätge kanya enge buut Giba na en kur jø tuuŋ Benjamen.

¹⁵ Ni öge ni putge gaa Giba, ni dønyge yi kiir nee butge kaagø. 'Ba kanya dønyge yi kiir, gena put pï piny bura mar pääny manøgø ni bëëtge jaak, kiper bäŋ dhaanhø mo ö baŋge nee ge käle ki man butge paare.

¹⁶ Køøre nø, dhaanhø ma jaal mo käla yi pwödhö baŋ tïïc aöö ni piny oløny no ojïl. 'Ba ŋatøgø poge ena mïëya en bäät kïte na en kur jø tuuŋ Ipariem; 'ba eni bëëdö na wëëllö Giba kar kaagø, ni jøøa bëëdö paanøgø beege jø tuuŋ Benjamen.

¹⁷ 'Ba kanya ö jaal manøgø na lwïthe, jøøa näk käla jöö ajoode no opï piny bura mar pääny kaagø, ni kööe, «?Uuno käla kaa ŋø? ?U cou kaa ennø?»

¹⁸ Køøre nyenøgø aköö jï jaal manøgø, ni «Waani, wa käla Bethelem na en Juuda, ni wa cøøa paana en teegø na en mïëya en bäät kïte na en kur jø tuuŋ Ipariem; kiper aani, a käla kunece; 'ba aana aay ni cøøa Bethelem na en Juuda. 'Ba ennø, mara beeye døøn paara. 'Ba kanya pïïa kany, bäŋ ŋat mo ö baŋa naa kïth paare.

¹⁹ 'Ba waani, jïwa da luum ki cam mar lääy mo orømø kiper arëëni mowa. Aani thuwø da cam ki køøŋø mo orømø kipera, këël kiper nyaanøgø na cïïa enø ki ŋat tïïc manøgø ni buutwa enø; waani bäŋ gïn mo canwa.»

²⁰ Køøre jaal manøgø aköö, ni «Cïbu cwïnynyu piny. Ennø, gïno manynyu jaak tïïa tïïö jïïu. Uuni, u ba but bura kany.»

²¹ Kanyøgønø, jaal manøgø jøøgø aput kïth paare, ni mooc arëëni ki gïï wø cam lääyi, ni ö jøøgø ni lwøkge tietge ni cämge ni mäthge.

²² 'Ba kanya bëëde ni jøøgø bëëdö ni yïthge met, cwøw mo päänyögø, ni beege jiy moa wïthge reyø, gena put öö ni marge øtø ni pöötge dhi øtø; ni cäänge ki jaara dwøŋ na näk wää paaci ni köge, ni «Nyena ö paarï kany käl wøk nee wa butwa ki gø.»

²³ Køøre jaarøgø na wää paaci enø, aci wøk baŋge ni kööe jïge, ni «Nyie jaay nyïïmera, a kwaya uuni nee gïno ni raac enø nee ba tïïyu. Nyenøgø anø ö paara møn; 'ba kär nou tïïya teeŋ gïnögø ni raac ni määnö ki man tïïi enø.

²⁴ Neennu, nyaara mo dëëre poot kuc dïcwøø, ki cï nyenøgø, ge nutö. A kwaya uuni nee ge käla wøk baŋu nou cou baŋge na mään, ni tïïyu gïna manynyu ki ge jaak. 'Ba kär teeŋ gïnögø ni raac ni määnö enø tïïyu dëër nyenøgø.»

²⁵ 'Ba jagøgø yïthge kärge kam cek ki dwør jaarøgø, ni ö dhaaŋŋa näk akwanya ni käli wøk ni cïbi jï jøøgø. Ni ö jagøgø ni putge nyaanøgø gøyø ki piny ni raanyge gø ki dïwäär bäre këël mana tïm pinynyi na amöölla. Køøre kanya tïm tiet øwi ni tuulö, ena wecge nee aae.

²⁶ 'Ba kanya tïm pinynyi na amöölla nyaanøgø aöö ni put pädhö dhi øt jaarøgø kanya en cwøre yie, ni bëëde no opädhö kaace këël mana tuul cäŋŋi.

²⁷ 'Ba kanya päny cø nyaanøgø maal ka amöölla, na jap dhi øtø nee døny wøk ni manynya man tïŋŋe nø, ka adïëri møn, cïïe aput joot dhi øtø no opädhö ni ceŋŋe ee rum bäät thudhi mana en dhi øtø.

²⁸ Køøre nyenøgø aköö jï cïïe, ni «Ö maal nøø aaø nø.» 'Ba bäŋ dwøl mo odwøk nyaanøgø, kiper eno nø thøø. Kanyøgønø, nyaanøgø aput kwany ni kïth gø bäät arëën; ni put tïŋŋö ni cøøa paare.

²⁹ 'Ba kanya pïïe paare, ena døny yi øtø ni lwør caakïïn ni lwør dëër cïïe ni ŋøør gø na kwöre apaar kurriiø, ni ŋøøre ka nyeŋ cuu, ni ö kwöra ŋøøri yøø ni put gø jääŋŋö dï Icriel bäre.

³⁰ 'Ba nyenøgø jiy moa jääŋŋe aköömme ni kööe jïge, ni «Wäru kööu jï ŋat Icriel man nø, na ‹?Aŋø, teeŋ gïn ma ennø, dagø mo otägö cøøn, ki mana ö jø Icrielli wøk ki yi ŋööm Ijep këël dïcäŋi en? Cädu bääte, ni kuurru dhøgu, ni caannu maru.› » 'Ba kar kaaca, jiy bëët moa joot gïnögø ge puta köö, ni «Bäŋ teeŋ gïn mo caala manøgø mo okwøŋ tägö na bäre bäre.»