Pïëmme 18 - Wëël Jwøk

Luum Mikiya Ki Jø Tuuŋ Daan

¹ 'Ba ki yïth nïrögøøni, jø Icriel bëëdö ni bäŋ nyeya jïge; ni kar kaaca, jø tuuŋ Daan määnyö ki ŋøøm mo dööŋ jïge na kurge kiper nee bëëtge yie, kiper këël kar kaaca, ŋöömö mana doo dööŋ jïge na kurge yïthakic wïth tuŋi mo jø Icriel poot kär ci ceŋge.

² Kanyøgønø, jø tuuŋ Daan ajäägö ki jiy abïïc, mo jierra røk kwään jø tuuŋge bëët, ni jøøgø beege jø leny moa teek mo ge käla Dhöra ki Ëctaöl, kiper nee jïtge ki ŋøøm ni marge lïëw thuwø. Køøre jø tuuŋ Daan aköö jï jagøgø, ni «Cou määnynyu ki ŋøøm.» Køøre gena aay ni pïïcge mïëya en bäät kïte na en kur jø tuuŋ Ipariem, ni gaage po Mikiya, ni putge but kaace.

³ 'Ba kanya tïmge ni karge cään ki po Mikiya, jø tuuŋ Daan moøgø dwør nyï tuuŋ Libay manø ni poot na wøp enø aŋecge; køøre gena gaa baŋ gø kaace ni köge jïgø, na «?Aŋa na käl ï kany? ?A agïnaŋø ni tïïyï kany? ?Ï bëënnï ŋø kany?»

⁴ Ni løk gø jïge, ni «Mikiya da gïï mo ee tïïö kipera; a ee mooø ki tïïc ni tïma na aana dïlämi kipere.»

⁵ Køøre gena köö jïre, «Beerra man pëënynyï Jwøk kiper jööro caathwa, ki man näk mo da gïn mo beer mo jootwa joodø, nee ŋäcwa.»

⁶ Ni ö nyenøgø na dïlämi enø ni løk gø jïge, no «U cäädhö ni dëëtu jööt; jööro caathu enø, onø jiiŋ Jwøki nyïmmu.»

⁷ Køøre jagøgø na abïïc yøø atïŋŋö ki kaace, ni aacge ni pïïcge pääny Laaic, ni jootge jøøa bëëdö yie ni ge bëëdö ni bäŋ gïn caarge kiper leny, ni ge bëëdö ka teeŋ bëët jø Caydan ni wø bëëdö ki bëët-mëër ni bäŋ gïn caarge kiper leny; ni kwäärö marge bëëdö ni bäŋ gïn mo raac mo ee tïïö dëëtge. 'Ba ge bëëdö ni karge bäyö ki jø Caydan, ni bäŋ gïn mo gääba geni ki jø møøk.

⁸ 'Ba jø tuuŋ Daan moa liew ŋøøm, kanya duuge baŋ tuuŋge moa en Dhöra ki Ëctaöl, gena pëëny tuuŋge ni köge, ni «?Bëëde nidïï nø? ?Da gïn maa jootu?»

⁹ Ni løkge gø jïge, ni «Ö maal nø, waa cøø baŋge nøø këëdø ki geni, kiper ŋøøpge ajootwa; 'ba ka adïëri møn, beeye ŋöömö mo beer døc. ?Aŋø, u poot bëëdö ni uuno pï piny jaak? Käru ruu ki man cou yie kun mayu ŋöömmögø.

¹⁰ 'Ba kanyo cou, u pïï baŋ jiy mo bëëdö ni bäŋ gïn caarge kiper leny, mo jïge da ŋöömö mo päl; 'ba Jwøk, ŋöömmögø ee nø cïp ceŋŋu, ni beeye kany mo bäŋ gïn tøør yie røk jammi bëët moa en bäät piny kany.»

¹¹ Køøre ki ri jø tuuŋ Daan, jø leny ma dïpe abïciel mo ceŋge da jap leny, gena tïŋŋö ki Dhöra ki Ëctaöl.

¹² Ni aacge ni tïïcge twïër marge buut Kiriat-Jeerim na en Juuda. Kiper manøgønø, nyeŋ kaagø aput cwøl ni Twïër Jø Tuuŋ Daan këël dïcäŋi en; ni kaagø ena jï løø kur pänh-cäŋ ki Kiriat-Jeerim.

¹³ Ni pööthge ki kaace ni cige mïëya en bäät kïte na en kur jø tuuŋ Ipariem, ni pïïcge po Mikiya.

¹⁴ Kanyøgønø, jøøa näk abïïc na kwøŋ ci kuna liew ŋööm Laaic aköö jï nyïïmëëkge, na «?Aŋø, ŋäyu ni røk uutögø, da øtø aciel mo yie da ëëput ki juuga cøøri na terapim, ki kït gïn mo otieŋø ki kït gïn mo oleenyø, ni beege gïï wø lam? Kiper manøgønø ennø, cädu kiper gïno tïïyu nø.»

¹⁵ Køøre jøøgø na abïïc yøø, gena gaa kaace ni cige øt nyï tuuŋ Libay, nyena näk poot na wøp na en po Mikiya, ni määthge gø.

¹⁶ 'Ba jø tuuŋ Daan moa näk dïpe abïciel na näk ceŋge da jap leny, gena cuŋŋö dhi kal.

¹⁷ 'Ba jøøa na abïïc na kwøŋ ci kuna liew ŋöömmögø, gena døny yi øtø ni kälge gïï wø lam, ni beege gïna no otieŋø na kït gïrpiny, ki ëëput, ki juuga cøøri na terapim, ki gïna no oleenyø na kït gïrpiny. 'Ba kar kanyøgø, dïlämi manøgø cuŋŋö dhi kal buut jø leny moa näk dïpe abïciel na näk ceŋge da jap leny.

¹⁸ 'Ba kanya døny jøø na abïïc yøø yi øt Mikiya, na kälge gïna no otieŋø na kït gïrpiny, ki ëëput, ki juuga cøøri na terapim, ki gïna no oleenyø na kït gïrpiny, nyenø na dïlämi enø aköö jïge, na «?Aŋø, agïnaŋø ni tïïyu enø?»

¹⁹ 'Ba jagøgø aköö jïgø, ni «Lïŋï, cïëk dhiï; ö baŋwa nøø aa na aciel, kiper niï tïmï ni ïïna ŋat mo owøørø ni ïïna dïlämi jïwa. ?Aŋø, theemma eni jïrï ki man bëëdï ni ïïna dïlämi jï dhaanhø aciel, wala ki man tïmï ni ïïna dïlämi jïwa, wa na wï tuuŋ aciel røk wïth tuŋi mo jø Icriel ii?»

²⁰ Kanyøgønø, dïlämi manøgø yie aput tïmö ni met; køøre eni, ëëput ki juuga cøøri ni terapim ki kït gïna no otieŋø akäle, ni put aa dï jøøgø.

²¹ Køøre jø tuuŋ Daan aput tïŋŋö ki kaace, ni mään moge ko obwöre, këël lääc paac ki gïïa perge leth bëët ege cöör nyïmge.

²² 'Ba kanya aacge na pïïcge kany mo bäär mëëth ki po Mikiya, jøøa en ya atut aciel ki Mikiya rege acwølge ni läpge køør jø tuuŋ Daan ni makge geni.

²³ Køøre geni jø tuuŋ Daan arwaacge; ni ö jø tuuŋ Daan ni løkge nyïmge, ni köge jï Mikiya, «?Ï manynyï ŋø baŋwa, ni rïïŋu ni rou you dwalø en?»

²⁴ Ni kö Mikiya, ni «Uuni, juu 'moa na tïïa, këël dïlämi mara, akällu ni aayu ki ge. ?Agïnaŋø nø na dööŋ jïra këët? ?Aŋø, u cäŋu köö jïra këët, ni ‹?Ï manynyï ŋø baŋwa?›?»

²⁵ 'Ba jø tuuŋ Daan aköö jï Mikiya, ni «Kär dwørï wïnywa këët nø; kanymør jø mo cwïnyge keec, ïïni ki jø paarï bëët u 'näkge nääö.»

²⁶ Kanyøgønø, jø tuuŋ Daan aput aay ki wääthge na caathge; 'ba kanya ö Mikiya na joot jøøgø ni ge teek døc ni ba løny jïre, eni ree aløøe ni døø paare.

²⁷ 'Ba kanya nø ö jø tuuŋ Daan na kälge gïïa no otïïc Mikiya, ki dïlämi mare mana en jïre, gena aay ni pïïcge pääny Laaic baŋ jøøa näk bëëdö ka bëët-mëër ni bäŋ gïn caarge kiper leny. Ni ö jø tuuŋ Daan ni 'näkge jøøgø ko opëëlle; ni putge pääny mar jøøgø nyep.

²⁸ 'Ba bäŋ ŋat mo ö kuna køny jø päänyögø, kiper päänyögø kare bäär ki pääny jø Caydan, ni bäŋ gïn mo gääba geni ki jø møøk. 'Ba päänyögø na Laaic enøgø, ena piny yi ŋöömma näk ree ee päärö na en buut Bëëth-Reyap. Ni ö jø tuuŋ Daan ni cäŋge päänyögø geerrø ni bëëtge yi gø.

²⁹ Ni cwølge nyeŋ päänyögø ni Daan ki køør nyeŋ kwarge ma Daan wär Icriel; 'ba nyeŋ päänyögø mana dïkwøŋ beeye Laaic.

³⁰ Køøre nyïïkwaac jø tuuŋ Daan gïna no otieŋø acwöthge piny kiper dëëtge nee wø wøørge. 'Ba Jönathan nyikwaar Gërcöm, ni beeye Gërcöm o Modhe, eni, këël wääde ki nyïïkwaaye, aput bëëtö na dïlämme jï jø tuuŋ Daan këël dïcäŋa ö jøøa bëëdö yi ŋöömmögø bëët na maai ki tøŋ.

³¹ Køøre nø, kït gïna no otieŋø na näk tïïya Mikiya, aput bëëtö ni ege cwöth piny kiper dëëtge Daan kaagø, ki yïth nïne bëët moa bëëde ni Øt Jwøk ena Cëëlö.