Pïëmme 16 - Wëël Jwøk

Luum Camcøn Kanya En Geedha

¹ 'Ba Camcøn aci Geedha ni jïte ki dhaagø ma kääbi kaace, ni ci baŋ gø na dhaagø.

² 'Ba kanya caani jï jø Geedha, na købi, ni «Camcøn anø ö kany,» geni deŋ kaagø bäre aputge mar, ni koorge eni ki dïwäänögø bäre ni geno pï piny dhi kiir mar päänyögø. Ni putge bëëtö ni geno nikïïl ki dïwäänögø bäre, ni köge, ni «Putø eni koor këël mano ö tiet øwi, køøre nø, eno putø näk.»

³ 'Ba Camcøn aput but buut dhaagø manøgø këël kanya tïm pinynyi na dhöör dïwäär; 'ba ki dhöör dïwäänögø ena päny maal ni cøøe ni mak odhuulu mar dhi kiir mar päänyögø, ni ö cööthe mo odhuulu na näk ariiø ni put ge puth wøk, ni puth wøk na aciel ka dïdëët bëët; køøre aput tïŋ göönne ni käär gø këël mana kïth gø wï kïdi mana näk dïët ki Keeprön.

Luum Camcøn Ki Delila

⁴ 'Ba na tïme na køør manøgø, Camcøn atïmö ni mëër ki dhaagø mør mo nyeŋŋe Delila mo bëëdö goor Cörëëk.

⁵ Køøre kwääri mo jø Pilitin aö baŋ nyaanøgø, ni köge jïgø, ni «Many yie ka atade, ni jootï teek mare manøgø ni dwøŋ enø ki man näk mo tiere käl kaa ŋø, këël jöö man böötwa teek mare ki gø, nee tïme ni løny jïwa ki man twöcwa eni ni caarwa gø. Køøre nø, ŋati man nø dëëtwa cïpö jïrï ki gwet-bïrö ma dïpe apaar kurciel.»

⁶ Kanyøgønø, Delila aköö jï Camcøn, «A kwaya ïïni, caan teek marï manøgø ni dwøŋ enø jïra, ki man näk mo tiere käl kaa ŋø, ni caanï jöö mo løny ki man twöc ïïni ki gø niï caari.»

⁷ 'Ba Camcøn aköö jï nyaanøgø, «Ni näk maa ege twöö ki kaae abïriiø mo poot thec mo kär tal, aani, a tïmö naa jääk, ni tïma kaamar jiy møga jaak.»

⁸ Køøre kwääri mo jø Pilitin akännö jï nyaanøgø ki kaae abïriiø mo poot thec mo kär tal, ni ö nyaanøgø ni twöc Camcøn ki kaae moøgø.

⁹ 'Ba nyaanøgø da jiy mo ee kanø thääŋ øtø maya, mo bëëdö ni ge kurö kaace. Køøre ena köö jï Camcøn, «Wui Camcøn, jø Pilitin aö baŋï.» 'Ba Camcøn kaae moøgø aput cöötö jaak, ni putge tïmö kaamar thøør waarø mo ogut maaci. Kanyøgønø, teek mare kanya käl yie kär joodø këët.

¹⁰ Køøre Delila aköö jï Camcøn, ni «Neenï, aana nø cøøgï ni cäänï ki tööt. Ennø, akwaya ïïni, caanï jïra; ?gïn mo løny ki man twöc ïïni ki gø agïnaŋø?»

¹¹ 'Ba Camcøn aköö jï nyaanøgø, «Ni näk maa ege twöö ki thøøli mo poot nyärö mo bäŋ gïn mo otïïö ki ge, aani, a tïmö naa jääk, ni tïma kaamar jiy møga jaak.»

¹² Kanyøgønø, Delila thøøli mo poot nyärö alwøre ni twöc Camcøn ki ge. Køøre ena köö jï Camcøn, «Wui Camcøn, jø Pilitin aö baŋï.» 'Ba kar kaagø, jiy opï piny ni ge kurö thääŋ øtø maya. 'Ba Camcøn thøøli moøgø aput cöötö ni jööt jaak ceŋŋe ni caala waarø.

¹³ Køøre Delila aköö jï Camcøn, ni «Këël kar kany ennø, ï bëëdö niï cøøga aani, niï cara tööt. Ennø, caanï jïra; ?gïn mo løny ki man twöc ïïni ki gø agïnaŋø?» 'Ba ena köö jï nyaanøgø, «Ni näk mo jïëya moi no odwøø na abïriiø ii, iï kuurö ki waare mo teek, ni cwääï jïër moøgø røk teegi mo wø cwää abïïe rege ni iï nyiiŋø ni teek, aani a tïmö naa jääk, ni tïma kaamar jiy møga jaak.»

¹⁴ Kanyøgønø, Camcøn abutö, ni ö Delila ni cwääc jïëc Camcøn na näk odwøø na abïriiø ni ee kuurö ki waare mo teek, ni cwää jïër moøgø røk teegi mo wø cwää abïïe rege ni ee nyiiŋø ni teek; ni kööe jïgø, «Wui Camcøn, jø Pilitin aö baŋï.» 'Ba Camcøn aput pääö, ni ö gïn wø cwäc dëëre ka abïï, këël teegi ki gïr nyiiŋ ni put gø puth wøk na aciel.

¹⁵ Køøre Delila aköö jï Camcøn, «?Ï kööï kiper ŋø, niï mëër ki aani, ni ïïni ki dëërï kiree cwïnyï tøør baŋa? Kiper ïïni, aana nø cøøgï kwöre moi na adäk ii, ni bäŋ gïn mo iï caanø jïra ki man näk mo teek marï en kaa ŋø.»

¹⁶ 'Ba Delila yi Camcøn aput cwaat døc, ni put gø ööl ki luup mo wø care ki yïth nïne cooth, ni ööl Camcønni døc ka acaara këël mana tïme ni manynya thøø.

¹⁷ Kanyøgønø, Camcøn gïïa en cwïnye bëët aput caan jï Delila, ni kööe jïgø, ni «Wïïa poot kär lielø na bäre en, kiper aani, aana ŋat Nadhir ni aano cïp kur keera jï Jwøk ki mana täge naa ena yi mera. 'Ba ni näk mo wïïa olielø, teek mara puta aay dëëra, ni tïma naa jääk, ni tïma kaamar jiy møga jaak.»

¹⁸ 'Ba kanya jooti Delila ni Camcøn gïïa en cwïnye bëët ee nø caan jïre, ena jäägö ki dwøl nee kwääri mo jø Pilitin öge, ni kööe, ni «Ööu yie man keere nø, kiper gïïa en cwïnye bëët anø caane jïra.» Køøre kwääri mo jø Pilitin aput ö baŋ Delila, ni gwel käärge käärö ki ceŋge.

¹⁹ 'Ba Delila Camcøn atïïe nee bute kööre, ni cwöte ki dhaanhø, ni ö ŋateca ni liel jïëc wï Camcøn na näk odwøø na abïriiø; ni put Delila tägö ki man tïïe ki gïn mo raac dëër Camcøn, ni ö teeki mar Camcøn ni put aay.

²⁰ Kanyøgønø, Delila aköö, «Wui Camcøn, jø Pilitin aö baŋï.» Køøre Camcøn apäy ni kööe, ni «Aani, thøøli cööta cöötö kaawat man wø tïïa obëëde, naa dønynya wøk.» 'Ba kuc Camcønni ni Wuuö Jwøk dëëre ee nø paany buute.

²¹ Køøre jø Pilitin Camcøn aputge mak ni göölge nyeŋŋe wøk; ni aacge ki gø ni peege eni Geedha, ni twöcge gø ki tiimme mo tïïc ka nywïënyö ma jwïël. Køøre ena put bëëtö øt twöc kaace ni mare guur ki caammi.

²² 'Ba jïëye na näk ogwäär wøk acäŋ tägö ki man tucge.

Luum Thøw Camcøn

²³ Køøre kwääri mo jø Pilitin rege acooŋge ni cïpge ki lääy mo thööth no olämi jï jwøge ma Dagön, ni jïtge ki met ec, ni köge, ni «Jwøk marwa, Camcøn ŋata bëëdö na nyïïmän marwa acïp ceŋwa.»

²⁴ 'Ba kanya ö jø Pilitinni na jootge Camcøn, geni jwøge aputge pwøc, ni köge, ni «Jwøk marwa, ŋata bëëdö na nyïïmän marwa acïp ceŋwa; ni beeye ŋata raany powa, ŋata thöör jiy mo thööth dëëtwa ki thøø.»

²⁵ 'Ba kanya ö jøøgø na tïm yïthge ni met, gena köö, ni «Camcøn cwøl nee ööe, nee kwääge ni døøc yïthø mo met.» Kanyøgønø, Camcøn aputge cwøl kanya en yie øt twöc, ni ö Camcønni ni put kwääk nyïmge kaagø. Køøre ena tïïcge nee cuŋŋe yïthakic were.

²⁶ Køøre Camcøn aköö jï nyena näk poot na wøp na piec eni, ni «Beerra man nyoothï were moa näk øtø cuŋŋi kaperge, nee guda, nee dëëra jääŋa ki geni.»

²⁷ 'Ba kar kaagø, øtø päŋ ki jiy, ni beege cwøw ki mään bëët; këël kwääri mo jø Pilitin bëët ena kaagø. 'Ba da jiy møøk ma kume adäk, ni beege cwøw ki mään, mo ena bäät øtø maal, ni ge neeta Camcøn kanya kwääge ni tïïc yïthge ni met.

²⁸ Køøre Camcøn alämö jï Wuuö Jwøk ni kööe, «Wui Kwäärö Wuuö Jwøk, a kwaya ïïni, par wïïï ki aani, ni tïïyï aani naa teek yie man keere nø. Wui Jwøk, køny aani nee kwör coola dëët jø Pilitin kiper nyeŋŋa karge riet na göölge wøk.»

²⁹ 'Ba Camcøn were moa näk ariiø na en dï øtø na näk øtø cuŋŋi kaperge, aput mak ni jääŋ dëëre ki geni, na aciel ee maaø ki cwïïe ni maya ee maaø ki caame.

³⁰ Kanyøgønø, Camcøn aköö, ni «Beerra man thøøa ki jø Pilitin na aciel.» Ni ö Camcønni ni put were moøgø thiel ki teek mare bäre, ni put øtø päth bäät kwääri ki jø Pilitin bëët moa en yi gø kaagø. 'Ba kanyøgø, jiy moa 'näk Camcønni ri thøwe atïmö ni thöötha geni døc ki jiy moa nääe kanya bëëde ni eni kwøw.

³¹ Køøre nyïïmenni ki tuuŋ wänni bëët, gena put öö ni lwørge dëër Camcøn, ni kälge gø ni koonyge gø yïthakic Dhöra ki Ëctaöl yi kään kïdi mar wänni ma Manöa. 'Ba beeye cwiiri ma pïërariiø na beet Camcønni ni ena pïëmi mar jø Icriel.