Pïëmme 14 - Wëël Jwøk

Luum Nywöm Mar Camcøn Ki Nyi Jø Temna

¹ 'Ba Camcøn aci pääny mana cwøl ni Temna ni joot dhaagø mør Timna ma nyi jø Pilitin.

² Køøre Camcøn aduu paac ni caan gø jï wänni ki menni, ni kööe, ni «Aani dhaagø mør ma nyi jø Pilitin ajooda Temna; ennø, a manynya gø nee nywømmu jïra na dhaagø.»

³ 'Ba wänni ki menni aköö jïgø, na «?Aŋø, bäŋ dhaagø dï nyïï tuuŋu wala dï jø pøø, ni kööï niï nyöömmö ki dhaagø ri jø Pilitin moi ni kär daŋø ii?» 'Ba Camcøn aköö jï wänni, ni «Nywømï jïra, kiper dhaagø manøgø nëëni ni mïërö ki jïra.»

⁴ 'Ba wänni ki menni kucge ni Wuuö Jwøk nut ri luummögø, ni da gïn mo manynye manynyø nee tïïe dëët jø Pilitin. Kiper kar kaaca, jø Icriel bëënna jø Pilitin.

⁵ Køøre Camcøn aci Temna ni eni aay ka wänni ki menni, ni pïïcge pwöth omøki mo jø Temna; ni ö cïgïï ŋuu ni put rïŋ baŋ gø ni märö.

⁶ Kanyøgønø, Jwïëc Wuuö Jwøk aput ö bäät Camcøn ni teek døc, ni ö Camcønni ni put ŋuu pääö ki dï gø ni bäŋ gïrpiny cere, ka teeŋ man wø ö dhaanhe wø pää nyidiel ki dï gø. 'Ba Camcøn gïna tïïe käre caanø jï wänni ki menni.

⁷ Køøre Camcøn acøø ni cääne ki dhaagø manøgø; 'ba dhaaŋŋøgø poot nëëni ni mïërö jïre.

⁸ 'Ba kanya cäŋ Camcønni døø kuna nywøm dhaaŋŋøgø, ena gaa thääŋ jöö kuna raŋ dëër ŋuu mana nääe; 'ba kïc ajoode no otïïö ki maaw dëër ŋuu.

⁹ Køøre ena cøø ni thööth maar kïc cere, ni cäädhe ni cämö waŋjöö. 'Ba kanya ö Camcønni na pïïe baŋ wänni ki menni, ena cïpö jïge ni camge gø; 'ba käre caanø jïge ni maar kïc thöödhe dëër ŋuu.

¹⁰ Køøre wää Camcønni aci po dhaaŋŋøgø, ni ö Camcønni ni tïïe ka ajwöma kaace, kiper beeye teeŋ gïn mo tïïc wøpe tïïö cooth.

¹¹ 'Ba kanya ö jøøgø na jootge Camcøn gena kännö ki jak ma tïëŋ ki eni ma pïëradäk nee bëëtge buute kaagø.

¹² Køøre Camcøn aköö jï jagøgø, «Nee leer mør kany para jïïu; 'ba ni näk mo ŋeyu ŋiiø ni caannu tiere jïra na kare, ki yïth nïri na abïriiø na mo ajwöma ii, aani, a cïpö jïïu ka aleeŋŋe mo beyø ma pïëradäk, ka abïïe mo beyø ma pïëradäk mo wø røø dëël.

¹³ 'Ba ni näk mo ba løny jïïu ki man caannu tiere jïra, u cïpö jïra ka aleeŋŋe mo beyø ma pïëradäk, ka abïïe mo beyø ma pïëradäk mo wø røø dëël.» Køøre jagøgø aköö jïre, ni «Par leer marï, nee wïnywa nø.»

¹⁴ Kanyøgø Camcøn aköö jïge, ni «Orogwanynyaŋø, gïn mo di camø ajoot ri dïcämi, ni ö gïn mo ŋweethi ni joodi ro oteeø.» 'Ba kär løny jï jagøgø ki man ŋecge tier leer manøgø, këël mana tïm nïne na adäk.

¹⁵ 'Ba na tïme na ri ŋweer nïne, jagøgø gena köö jï cï Camcøn, ni «Many yi cwørï ka atade, kiper nee tier leer manøgø nee caane; ni näk ba tïïyï na enøgønø, ï waaŋwa waaŋø ki øt wäru bäre. ?Aŋø, wa cwøllu kaper nee wa twierru? ?Beeye per manøgø møn?»

¹⁶ Kanyøgønø cï Camcøn ajwöŋö dëër Camcøn ni kööe, ni «Ï män ki aani cøøn, ï ba mëër ki aani; ïïni, leer anø ŋeyï jï jagøgø na jø powa yøø, ni kärï tier gø caanø jïra.» Køøre Camcøn aköö jïgø, ni «Neenï, këël wära ki mera kiree, tier leer manøgø kära caanø jïge. ?Aŋø, ocaana gø jïrï nidïï?»

¹⁷ Kanyøgønø, dhaaŋŋøgø ajwöŋö dëër Camcøn ki nïra näk abïriiø na beet ajwöma. 'Ba kanya tïme na ri bïriet nïne, Camcøn tier leer acaane jïgø, kiper mana ö dhaaŋŋøgø na cwaat yi gø døc. Køøre dhaaŋŋøgø tier leer aput caan jï jagøgø na jø poge yøø.

¹⁸ 'Ba kanya tïme na ri bïriet nïne ni cäŋ pätha piny, jø päänyögø aköö jï Camcøn, «?Aŋø, da gïn mo ŋweeth mo kaala maar kïc? ?A da gïn mo teek mo kaala ŋuu?» Køøre ena köö jï jagøgø, «Doo na cïïa käru tïïö kaamar nyi dhieŋ man wø purö ki gø, uuni, tier leer mara ba dou joodø.»

¹⁹ Køøre Jwïëc Wuuö Jwøk aput ö bäät Camcøn ni teek døc, ni put ci pääny jø Pilitin mana cwøl na Ackelön, ni nääe ki jiy ma pïëradäk røk jøøgø, ni put abïïkge gööny wøk dëëtge. Ni ööe ka abïïe moøgø, ni cïp geni jï jøøa caan tier leer. Ni put wëër døc, ni aae ni døø po wänni.

²⁰ 'Ba cï Camcøn acïp jï lwömme aciel røk tïëŋge moa bëëdö buute kaagø.