Pïëmme 13 - Wëël Jwøk

Kanya Lwaarø Ki Camcøn

¹ 'Ba jø Icriel acäŋ tïïö ki gïï mo nëëni ni reyø ki jï Wuuö Jwøk, ni ö Wuuö Jwøki ni cïp geni ceŋ jø Pilitin ki cwiiri ma pïëraŋween.

² 'Ba da nyen mør ma nyï Dhöra mo käla ri jø tuuŋ Daan mo nyeŋŋe Manöa; 'ba cïïe beeye dhaagø ma bwøc ni bäŋ obwöre mo ee nywølø.

³ Køøre Wuuö Jwøk ree anyoodhe kaamar nyïïatwiel maal jï nyijøøgø ni kööe jïgø, «Neenï, ïïni, ïïna dhaagø ma bwøc mo bäŋ obwöre mo iï nywølø; 'ba ïïno jïti ki dhaanhø ni lwaarï ki gø na dïcwøø.

⁴ 'Ba ennø, gwøk riï ni ba mädhï ki køøŋ nyïïomøki wala teeŋ køøŋø mør, ni ba cämï ki gïïa no ocaanø ni ba waany.

⁵ Kiper ka adïëri møn, ïïno jïti ki dhaanhø ni lwaarï ki gø na dïcwøø; 'ba eni wïïe bäŋ doo lielø, kiper nyilaal manøgø otïmö na ŋat Nadhir no ocïp kur keere jï Jwøk ki mano täge ni ena ec; 'ba eno tägi ki man piem jø Icriel ceŋ jø Pilitin.»

⁶ Køøre nyijøøgø aöö ni caan luummögø jï cwøre, ni kööe, ni «Da dhaanhø ma dhaanh Jwøk mo ree ee nyoodhø jïra, mo bëëtö mare caala nyïïatwiel maal mar Jwøk, ni di lwäyö ki eni. 'Ba kanya käl yie kära pëënynyö, këël nyeŋŋe thuwø käre caanø jïra.

⁷ 'Ba ena köö jïra, ni ‹Neenï, ïïno jïti ki dhaanhø ni lwaarï ki gø na dïcwøø; 'ba ennø, kärï mädhö ki køøŋ nyïïomøki wala teeŋ køøŋø mør, ni ba cämï ki gïïa no ocaanø ni ba waany, kiper nyilaal manøgø otïmö na ŋat Nadhir no ocïp kur keere jï Jwøk ki mano täge ni ena ec këël aŋuun thøø mare.› »

⁸ Køøre Manöa Wuuö Jwøk akwaae ni kööe, ni «Wui Kwäärö, a kwaya ïïni, beerra man ö dhaanhnhï na kwøŋï jääŋŋö, ni cäŋï gø jääŋŋö baŋwa nee wa pwönynye ki gïna dewa tïïö kiper nyilaal mano jootwa noo lwaarø ki gø.»

⁹ 'Ba Jwøk dwør Manöa aleŋe; ni ö Jwøki na nyooth ree kaamar nyïïatwiel maal ni cäŋ ree nyoothø jï nyijøøgø kanya bëëde ni eno pï piny yi pwödhö; 'ba Manöa cø nyijøøgø poot tøørø buute.

¹⁰ Kanyøgønø, nyijøøgø alaar reeŋø ni caan gø jï cwøre ni kööe jïgø, ni «Neenï, ŋata cäŋa öö na nyooth ree jïra, ree acäŋ nyoothø jïra ennø.»

¹¹ Køøre Manöa aput päny maal ni cäädhe køør cïïe; 'ba kanya pïïe baŋ ŋatøgø ena köö jïgø, ni «?Beeye ï ŋata cäänö ki nyijøøi?» Ni kö ŋatøgø, ni «Beeye aani.»

¹² Kanyøgønø, Manöa aköö, ni «Ennø, kanyo tïm luupï moa carï ni thura karge, ?agïnaŋø noo bëëdö na ciik kiper bëëtö mar nyilaal manøgø? ?A teeŋ tïïc mo nyïëdi noo tïïe?»

¹³ 'Ba Wuuö Jwøk na nyooth ree kaamar nyïïatwiel maal aköö jï Manöa, ni «Beerra man ö nyijøøgø ni këël wïïe ri luup bëët moa caana.

¹⁴ Eni ba doo mädhö ki køøŋ nyïïomøki wala teeŋ køøŋø mør, ni ba cäme ki gïn mo käla ri jaadhøgø, ni ba cäme ki gïïa no ocaanø ni ba waany. 'Ba beerra man ö nyijøøgø ni gwøk jammi bëët moa köömma eni ki ge.»

¹⁵ Køøre Manöa aköö jï Wuuö Jwøk na nyooth ree kaamar nyïïatwiel maal, ni «Wa kwaya ïïni, beerra man bëëdï dïturu nee nyidiel jiiŋwa na cam jïrï.»

¹⁶ 'Ba Wuuö Jwøk na nyooth ree kaamar nyïïatwiel maal aköö jï Manöa, «A këël doo bëëdö dïturu, aani cam marï ba daa camø, 'ba ni näk miï jiiŋŋa gø, jiiŋŋï no olämi man wø waaŋ bäre, ni cïpï gø jï Wuuö Jwøk.» 'Ba kuc Manöa ni manøgø beeye Wuuö Jwøk na nyooth ree kaamar nyïïatwiel maal.

¹⁷ Køøre Manöa aköö jï Wuuö Jwøk na nyooth ree kaamar nyïïatwiel maal, ni «?Nyeŋŋï aŋa? Kiper kanyo tïm luupï moa carï ni thura karge niï wøørwa.»

¹⁸ 'Ba Wuuö Jwøk na nyooth ree kaamar nyïïatwiel maal aköö jïgø, na «?Aŋø ni pëënynyï nyeŋŋa en? Kiper tiere ba maar joot.»

¹⁹ Kanyøgønø, Manöa nyidiel ki muuy mar beel aput lwør ni cïp geni no olämi jï Wuuö Jwøk bäät kïdi mana en kaace, ni ö Wuuö Jwøki na nyooth ree kaamar nyïïatwiel maal ni put tïïö ki gïï mo rëëma ec ni nëënö jï Manöa ki cïïe.

²⁰ Kiper kanya tïme ni leep maac cäätha maal ki bäät kïnna cïp olämi bääte, Wuuö Jwøk na nyooth ree kaamar nyïïatwiel maal aput tïmö ni cäätha maal ni ena dï maac manøgø. 'Ba kanya ö Manöa ki cïïe na jootge gïnögø, rege aputge leeŋ piny ni kuulge wïthge piny.

²¹ 'Ba Wuuö Jwøk na nyooth ree kaamar nyïïatwiel maal ree käre cäŋ nyoothø këët jï Manöa ki cïïe. Køøre Manöa aput ŋäc møn ni manøgø beeye Wuuö Jwøk na nyooth ree kaamar nyïïatwiel maal.

²² Kanyøgønø, Manöa aköö jï cïïe, ni «Ka adïëri møn, ø thøw ennø, kiper Jwøk anø neenø.»

²³ 'Ba cïïe aköö jïgø, ni «Doo na Wuuö Jwøk manynya gø nee ø nääe, eni olämi man wø waaŋ bäre ki muuy mar beel na cïbø ba dee jïëö, ni eni thuwø gïï bëët ii ba dee nyøthø jïëö, këël eni ø ba dee tïïö nee luup moi ii wïnynyö kar kany ennø.»

²⁴ Køøre nyijøøgø alwaar ki dhaanhø ma dïcwøø ni cak nyeŋ gø ni Camcøn; ni ö nyilaalli manøgø ni døøŋŋe ni bëëdö ni eno gwïëth Wuuö Jwøki.

²⁵ 'Ba Jwïëc Wuuö Jwøk atägö ki man tïïe ri Camcøn yi twïër jø tuuŋ Daan, na en yïthakic mïëri moa cøøri ni Dhöra ki Ëctaöl.