Pïëmme 1 - Wëël Jwøk

Kanya Ö Jø Icrielli Na Këëtge Ki Jø Keenan Moa No Odööŋ

¹ 'Ba kanya tïme na køør thøw Jøcua, jø Icriel Wuuö Jwøk apëënyge, ni köge, na «?A jø tuuŋe mane dïwa noo kwøŋ ci baŋ jø Keenan, nee këëtge ki geni?»

² 'Ba Wuuö Jwøk aköö, ni «Jø tuuŋ Juuda beege noo cii; ka adïëri møn, ŋöömö manøgø yaa nø cïp ceŋge.»

³ Køøre jø tuuŋ Juuda aköö jï nyïïmëëkge ma jø tuuŋ Cimien, ni «Ø aay na aciel nøø këëdø ki jø Keenan moa en yi ŋöömö mana cïp jïwa ki køør ŋïïce mo wø tïïc ki ri kwääk ki baw; køøre nø, øøno cäŋ aay ki uuni nee ø këëdø ki jiy moa en yi ŋöömö mana cïp jïïu ki køør ŋïïce mo wø tïïc ki ri kwääk ki baw.» Køøre jø tuuŋ Cimien aput aay ki jø tuuŋ Juuda.

⁴ 'Ba kanya ö jø tuuŋ Juuda na këëtge ki jø Keenan, Wuuö Jwøk jø Keenan ki jø Përec aput cïp ceŋge, ni böötge jiy ma kume apaar kanya cwøl ni Bëdhëk.

⁵ Køøre gena pïï ri nyeya mana cwøl na Adöni-Bëdhëk paare ma Bëdhëk, ni këëtge ki eni, ni böötge jø Keenan ki jø Përec moa en kaace.

⁶ 'Ba Adöni-Bëdhëk areeŋø; ni ö jø tuuŋ Juuda ni ŋwiecge køøre ni makge eni, ni ŋørge lweet ceŋŋe moa døøŋŋø ki lweet tiete moa døøŋŋø.

⁷ Ni ö Adöni-Bëdhëk ni kööe, ni «Nyeye ma pïërabïriiø mo lweet ceŋge moa døøŋŋø ki lweet tietge moa døøŋŋø oŋøørø, ge wø kwänyö ki caammi moa no odhäthö tier tharabëëta mara; 'ba ki køør gïna tïïa dëëtge, Jwøk teeŋ gïnögø acoole dëëra thuwø ennø.» 'Ba Adöni-Bëdhëk aputge käl Jerucalem ni thøø kaace.

⁸ 'Ba kar kaaca, jø tuuŋ Juuda geno nø këëdö ki jø Jerucalem ni macge pääny manøgø ni 'näkge jiy ko opëëlle, ni putge pääny manøgø nyep ki maac.

⁹ 'Ba na tïme na køøre cään, jø tuuŋ Juuda gena ci baŋ leny ki jø Keenan moa näk bëëdö mïëya en bäät kïte ki moa näk bëëdö kanya cwøl ni Nëgëp ki moa näk bëëdö ŋöömma näk ree ee päärö.

¹⁰ Ni ö jø tuuŋ Juuda ni cige baŋ leny ki jø Keenan moa näk bëëdö Keeprön, ni böötge jø tuuŋ Cëëci ki jø tuuŋ Akimen ki jø tuuŋ Thalmay. 'Ba nyeŋ Keeprön mana dïkwøŋ beeye Kiriat-Arba.

¹¹ Køøre jø tuuŋ Juuda acäŋ aay ki kaace, ni cige baŋ leny ki jøøa bëëdö Dabëër. 'Ba nyeŋ Dabëër mana dïkwøŋ beeye Kiriat-Cëëpïr.

¹² 'Ba Kalëp aköö jï jø leny moe, ni «Ŋato këëdi ki jø Kiriat-Cëëpïr ni mac pääny marge, nyaara ma Akca kiree cïba cïbö jïre nee nywøme.»

¹³ 'Ba Götönial nyikwaar jø Kënec, ni beeye owää Kalëp mana thiinh, pääny manøgø amaae; ni ö Kalëp ni cïp nyaare ma Akca jïgø nee nywøme.

¹⁴ Køøre na tïme na ri nywöm, kanya kïth Akca po cwøre ma Götönial, eni na Akca enø yi cwøre acoone nee wänni ma Kalëp pëënynyi ki ŋøøm mo dööŋ jïge. Køøre Akca aput ci baŋ wänni ma Kalëp ni eth piny ki bäät arëën mare; ni kö wänni jïgø, na «?Agïnaŋø ni manynyï?»

¹⁵ 'Ba Akca aköö jïgø, ni «Mooc aani ki muuy mo yia mïnnö ki gø; ennø, kaawat mana nø cïpï ŋøøm mo Nëgëp jïra na näk bäŋ pïï yie, a kwaya ïïni naa mooyï ki jøør mo pïï.» Køøre Kalëp jøør mo pïï moa en yïth ŋøøpøgø, ni beege moa en jï maal ki moa en jï piny, aput cïp jï nyaare ma Akca.

¹⁶ 'Ba wää cï Modhe nyï Këën, nyïïkwaaye aay na aciel ki jø tuuŋ Juuda ni ge tïŋŋi ki päänya näk yie da twöe, ni cige dï paap jø tuuŋ Juuda na en jï løø tier-piny ki paana cwøl na Arat; ni aacge ni putge bëëtö ki jø Icriel na aciel.

¹⁷ 'Ba jø tuuŋ Juuda gena aay na aciel ki nyïïmëëkge ma jø tuuŋ Cimien, ni këëtge ki jø Keenan moa bëëdö pääny mana cwøl ni Dhepath, ni 'näkge geni, ni putge päänyögø raanynyø na bäre bäre. Ni ö nyeŋ pääny manøgø ni puti cwøl ni Örma.

¹⁸ 'Ba jø tuuŋ Juuda, Geedha, ki Ackelön, ka Akarön, ki ŋøøm moa en buutge këël mana këët nyeŋ kee, amacge.

¹⁹ 'Ba Wuuö Jwøk nut dï jø tuuŋ Juuda, ni ö geni ni macge mïëya en bäät kïte. 'Ba geni, jøøa bëëdö ŋöömma näk ree ee päärö kärge riem wøk, kiper jøøgø jïge da jïëthe mo wø tut okwëënyi mo tïïc ka nywïëny.

²⁰ Køøre jø tuuŋ Juuda pääny mana cwøl ni Keeprön aputge cïp jï Kalëp, kaawat mana nø caani ya Modhe; 'ba Kalëp, jø tuuŋ nyïïkwaac Anak karge dääi aput riem wøk kaace.

²¹ 'Ba jø tuuŋ Benjamen, jø Jeebuc moa bëëdö yi Jerucalem kärge riem wøk; ni ö jø Jeebuc ni putge bëëtö na aciel ki jø tuuŋ Benjamen yi Jerucalem këël dïcäŋi en.

²² 'Ba jø tuuŋ wäät Jocep gena aay nee këëtge ki jø Bëthël, ni Wuuö Jwøk nut dïge.

²³ Ni ö jø tuuŋ wäät Jocep ni jääkge ki jiy mo liew Bëthël. 'Ba nyeŋ Bëthël mana dïkwøŋ beeye Löja.

²⁴ Køøre dïlëëwe ajïtö ki dhaanhø mo oö wøk ki yi kiir, ni köge jïgø, «Nyie nyawat, nyooth dhi kiir jïwa. 'Ba waani, bäth ec marwa onyoothwa jïrï.»

²⁵ Kanyøgønø, ŋatøgø dhi kiir aput nyooth jïge, ni ö jø tuuŋ wäät Jocep ni 'näkge jiy moa en pääny manøgø ko opëëlle; 'ba geni, ŋata nyooth dhi kiir jïge ki jø paare bëët, awecge nee aage kanya manyge jaak.

²⁶ Ni ö ŋatøgø ni ci yi ŋööm jø Këth ni gëëde ki pääny kaace, ni cak nyeŋ gø ni Löja, ni beeye nyeŋ pääny manøgø këël dïcäŋi en.

²⁷ 'Ba jø tuuŋ Maneeca, jø paana cwøl ni Bëëth-Can, ki jø Tanak, ki jø Dör, ki jø Ibleäm, ki jø Megidø ki jøw moa bëëdö yïth atude moa en tiet päänye moøgø, kärge riem wøk; ni ö jø Keenanni ni putge cwïnyge mak ki man bëëtge yïth ŋøøm moøgø.

²⁸ 'Ba kanya tïm jø Icrielli ni ge teek, jø Keenan moøgø akïthge tietge ni kïthge bäätge ki tïïe mo teek; 'ba kärge riem wøk na bäre.

²⁹ Këël jø tuuŋ Ipariem thuwø, jø Keenan moa bëëdö Gëdher kärge riem wøk; ni ö jø Keenanni moøgø ni putge bëëtö dï jø tuuŋ Ipariem.

³⁰ Jø tuuŋ Dhebulan thuwø, jø Keenan moa bëëdö Kitrön, ki moa bëëdö Naalal kärge riem wøk; ni ö jø Keenanni moøgø ni putge bëëtö dï jø tuuŋ Dhebulan; 'ba jø tuuŋ Dhebulan, jø Keenan moøgø akïthge tietge ni kïthge bäätge ki tïïe mo teek.

³¹ Jø tuuŋ Acer, jiy moa bëëdö Akkö, ki jø Caydan, ki jø Alap, ki jø Akdhip, ki jø Ëlba, ki jø Apëk, ki jø Reeyöp, kärge riem wøk.

³² Ni ö jø tuuŋ Acer ni putge bëëtö dï jø Keenan moa bëëdö yi ŋöömmögø, kiper mana kärge geni riem wøk.

³³ Jø tuuŋ Naptali, jø Keenan moa bëëdö paana cwøl ni Bëëth-Camic ki moa bëëdö Bëëth-Anat, kärge riem wøk; 'ba gena put bëëtö dï jø Keenan moøgø ni bëëdö yi ŋöömmögø enø; ni ö jøøa bëëdö Bëëth-Camic, ki moa bëëdö Bëëth-Anat ni tïmge ni ena tiet jø tuuŋ Naptali, ni bäätge okïthö ki tïïe mo teek.

³⁴ 'Ba jø Amör, jø tuuŋ Daan atïïcge ki teek nee bëëtge mïëya en bäät kïte, kiper jø Amör jø tuuŋ Daan amänge nee ba öge yi ŋöömma näk ree ee päärö.

³⁵ 'Ba jø Amör moa en mïëya en bäät kïdi mana cwøl ni Ërë, ki mïëya cøøri ni Ayalön ki Caalbim, cwïnyge aputge mak ni putge bëëtö kwörögø. 'Ba kanya tïm jø tuuŋ wäät Jocep ni teek døc, jø Amör moøgø aputge kïth tietge ni kïthge bäätge ki tïïe mo teek.

³⁶ 'Ba waŋ keew mar jø Amör tägi ka thuur Akirabim, ni etha maal këël mana pöödhe ki kanya cwøl ni Cela.