Odheea 9 - Wëël Jwøk

Ajäla Mano Jääl Jø Icriel Ki Gø

¹ Wui jø Icriel, kär yïthu mïnnö; käru kanynyø kaamar wïth juurre møga. Kiper dëëtu agathu ki käp ni weyu Jwøk maru. Yïthu met ki jap käp mo wø magu yïth laare bëët.

² 'Ba kwör wø dïn beel yïthge ki kwör wø biic nyïïjenni yïthge, u ba jïti ki jäŋ yïthge këët. Kwøk omøki tïmö ni ba jootu caar.

³ U ba bëëdö yi ŋööm Wuuö Jwøk këët; u døøa Ijep, u na jø tuuŋ Ipariem, ni cämu ki caammi mo ba waany ya Aciria.

⁴ U ba kuny piny këët ki muuce mo kwøŋ jï Wuuö Jwøk; olämme mou yi Jwøk ba tïïe ni met. Caammi mo wø cïpu no olämme caala mo wø cïp bäät thøø; ni jiy bëët moo cam ge tïmö ni ba waany. 'Ba caammi mou otïïyu kiperu keeru, ni ba kïthu ge yi Øt Wuuö Jwøk.

⁵ ?Agïnaŋø noo tïïyu yïth cääŋŋe moa no ocïp piny ni wø wøør jï Wuuö Jwøk?

⁶ Uuni, u këël doo päär wøk nou ŋwieya ränynyö, u mak jø Ijepi maa ni gwaarge uuni, ni ö jø Mempici ni putge uuni 'näk ni koonyge uuni. Japa perge leth moa näk tïïc ka gwel-bïrö, bäätge tuy ko oŋöön; ni ö yïth oduŋkaare mou ni tucge ki koodhi.

⁷ Cäŋ ajäla oløny ni öö, cäŋo cool kwör yie dëët jiy kare acäännö; beerra man ŋäyu gïnögø, u na jø Icriel! U köö, ni «Nyikuŋ Jwøk man wïïe bäŋgø; ni ŋati ni dëëre da Jwïëc Jwøk en bøøl;» kiper raay mou atïmö ni thööth døc, ni ö männi maru ni kadhe.

⁸ Jwøk aana jääŋŋe na nyikuŋ Jwøk man koor uuni, u na jø tuuŋ Ipariem. 'Ba ennø, uutjïëthe 'moa bëët you cïŋŋö ka abëëbe kede man wø cek weny. Këël yi Øt Jwøk kiree, jiy atïmö ni män ki aani.

⁹ Uuna døny yïth raay døc, ni caala mana tïïc yi Giba; 'ba Jwøk wïïe opare ki rääö maru, ni jääl uuni kiper raay mou.

¹⁰ Wuuö Jwøk aköö, ni «Kanya kwøŋa jø Icriel joot, caala man wø joot nyïïomøki dïtëën; kanya jooda kwäcge, caala man wø joot nyo olaam mo okwøŋ ŋweelø. 'Ba kanya öge baŋ jwø wø cwøl ni Baal-Pëëgör, ni cïpge dëëtge køør gïn mo wïc laay ki gø, gena put tïmö ni ge määnö kaamar gïna mëërge ki gø.

¹¹ 'Ba ge na jø tuuŋ Ipariem, ajiem marge omääti kaamar wenyø. Ge ba nyöödö këët, ni bäŋ ŋat mo yie jïti ki dhaanhø këët, ni bäŋ jäc këët!

¹² 'Ba ge këël doo jïtö ko obwöre, ge poot nääa nääö, këël mano tïme ni bäŋgø mo dööŋ. 'Ba otïmö ni leth kiperge kanyo wiia geni!»

¹³ 'Ba jø tuuŋ Ipariem ajooda ni ge bëëdö ni tietge okëët piny yi ŋöömö mo beer kaamar jø Tayar. 'Ba ennø, obwöre moge bwöthge wøk kuna nääi.

¹⁴ ?Wui Wuuö Jwøk, agïnaŋø noo ŋølï bäätge? Tïïc geni ni jiy bwönna wøk yïthge, ni wëëgï thurge talø.

¹⁵ 'Ba Wuuö Jwøk aköö, ni «Tïï gïï mo reyø atäkge Gëlgela; ni puta männö ki geni kaace! 'Ba kiper rääö mar japa tïïcge, ge riema wøk yi ŋöömö mara, ni ba mëëya ki geni këët; kwääri moge bëët gena jø ageem.

¹⁶ Jø tuuŋ Ipariem ge caala jaath mo lweedi moe otal. Ge ba jïti këët ko obwöre. 'Ba ge këël doo jïtö ko obwöre, obwöre moge na perge leth jïge nääa nääö.»

¹⁷ 'Ba geni, ge kwier Jwøki mara kwierø, kiper gena kweer ki man cekge ïthge jï gø. 'Ba geno put bëëtö ni ge thääyö yïthakic wïth juurre.