Odheea 8 - Wëël Jwøk

Luum Ajäla Mano Jääl Jø Icriel Ki Gø Kiper Mana Lämge Ki Juu Mo Patha Adïëri

¹ 'Ba Wuuö Jwøk aköö, ni «Jek riï ki man koothï tuuŋ! Nyimän aöö kaamar coor nee tïïe ki gïn mo raac dëër ŋöömö mara, a na Wuuö Jwøk, kiper jø Icriel, luumma tuuda ki kwäcge akwierge, ni gëëmge ki ciik 'moa.

² Jø Icriel ge wø jwöŋö dëëra ni köge, ‹Wui, ï na Jwøwa, ï ŋäcwa!›

³ 'Ba jø Icriel, gena kweer ki gïna beer; 'ba køørge oŋwiec nyïïmänni.

⁴ Gena röönyö ki nyeye naa kärge pëënynyö, ni röönyge ki kwääri ni bäŋ gïn mo ŋääa kipere. Gena tïïö ki kït gïï wø lam kiper dëëtge, ni tïïcge ka gwet-bïrö ki warkie moge, 'ba geno put ränynyö ki køør japøgø.

⁵ Wui, jø Cameria, kït gïn wø lam na näk otieŋø na nyirøøa yaa kwierø. Wëër mara liel bäät jiy kaamar maac. ?Aŋø, a këël yi wäne nø noo bëët jiyi ni dëëtge ba tïïcge ni waany?

⁶ Kiper japøgø tïïya jø Icrielli! Ni kït gïno no otïïö kaamar nyirøøa enø patha Jwøk; ena gïn mo tieŋa dhaanhe ma rëëmmö jaak. Ka adïëri møn, eni di tøyø ni put petø na thäŋi.

⁷ Jø Icriel apïïdhö ni tïme kede ge piitha jamø, ni ö gïïa kacge ni tïme kede apwøyaweerø. Beel moa näk cuŋŋö yi pwödhö atïmö na adibøøye, ni bäŋe nyeŋ mo ege joodø. 'Ba këël møøk doo jïtö, jiy mo path puta öö ni thöörge gø.

⁸ «Ennø, jø Icriel anø cam, ni ge ena dï wïth juurre møøk, ni tïmge kaamar gïrpiny mo bäŋ gïn kønye këët.

⁹ Kiper gena nø ci baŋ jø Aciria ni caala arëën mar paap mo thääyö keere jaak; ni ö jø Ipariem ni nø gathge mëër marge wøk.

¹⁰ 'Ba këël na bëëtge ni dëëtge ege gath wøk dï wïth juurre, aani, ge cäŋa ka cooŋ kanya ciel, ni ö geni ni putge gïï mo leth jwør cer nyeya mana teek.

¹¹ «'Ba këël na ö jø Ipariemmi na tïïcge gïï wø cïp olämme bääte mo wëën raay ni thööth, gïïögø atïmö na jap meetge bääyö marge ki ge.

¹² Këël na gööra ciik mo pwöc 'moa mo thööth kiperge, ciik moøgø aneenge kede luup mo path mo bäŋ tietge.

¹³ Geni, gena cïpö ko olämme jïra ni camge rïŋ moge, 'ba a na Wuuö Jwøk, yia kär mïnnö ko olämme moøgø. Ennø, a tïmö naa lääŋŋa gïïa bacge, ni puta ge jääl kiper raay moge. Geni, ge døøa Ijep.

¹⁴ Kiper jø Icriel wïthge awïl ki aani na cwääc geni, ni tïme ni ge geeya mïëri mo døøŋŋø, ni ö jø Juuda ni tïïge ki päänye mo teek mo thööth. 'Ba aani maac ojääŋŋa bäät päänye moge, ni ö maaci ni put uudi moa no ogeerø ni teek thöör.»