Odheea 5 - Wëël Jwøk

Luum Ajäla Mano Jääl Jø Icriel Ki Gø

¹ Wuuö Jwøk aköö, ni «U na dïlämme, wïnynyu gïn! U na jø Icriel, cegu ïthu! U na jø paan dwøŋ, cegu ïthu! Ajäla man bee maru, kiper u caala abëëbe bäät jø Micpa, ni bëëdu kaamar ajääpi mo opeerø bäät Kïn Tabör.

² Ni jøøa reyø tïï näk ege kaadhø, 'ba geni bëët, ge jääla jäälö.

³ Aani bëët Ipariem ŋääa bäre, ni jø Icriel rege ba løny ki man kange gø ki aani; ennø, u na jø Ipariem, røgu anø løøu køør käp, ni ö Icrielli ni raany dëëre.

⁴ Gena män tïïe moge na reyø ki man duuge baŋ Jwøk marge. 'Ba kiper mana näk yïth cwïnyge päŋ ki jwïëc käp, gena put tïmö ni bäŋ kwänynyö man ŋäcge Wuuö Jwøk ki gø.

⁵ 'Ba atöör mar jø Icriel adøø rege; jø Icriel ki jø Ipariem ge pädhö yïth raay moge, ni ö jø Juuda thuwø ni putge pädhö ki geni ciel.

⁶ 'Ba këël ge doo aay ni ge käädö ki dïëk ki dhäk, ni ge manynya Wuuö Jwøk, eni ba jootge, kiper ree ee nø paany dïge.

⁷ Gena tïmö ni ge tïïö ki riek waŋ dëër Wuuö Jwøk, ni ge nyöödö ko obwöre ma nyïïkwaalle. 'Ba geni ki pwöth moge geno ränynyi ki køør wödö man wø wøørge päär mar dwääy ki gø.

⁸ «Koothu tuuŋ bäät jø Giba, ni koothu tuuŋ bäät jø Reema! Köögu nee wïny jø Bëëth-Awëën! Wui, jø tuuŋ Benjamen, tïŋŋu leny!

⁹ 'Ba kanyo tïme na dïcäŋ ajäla, Ipariem ränynyö. Aani, a caana gïn ma adïëri yïthakic wïth tuŋi mo Icriel.

¹⁰ Dïbwöthe mo Juuda atïmö kaamar jiy mo kïn keew ege daaø; 'ba wëër mara kønynya bäätge kaamar man wø pänh jwïïö.

¹¹ Jø Ipariem adwøk piny ni ränyge ki køør ajäla, kiper mana bëëtge ni ge lama gïï mo oballe jaak.

¹² Aana tïmö kaamar alweela ki baŋ jø Ipariem, ni tïma kaamar atwøda mo odheeth dëët jø Juuda.

¹³ 'Ba kanya ö jø Ipariemmi ki jø Juuda na jootge gø ni gïï mo leth opïï dëëtge, jø Ipariem nyïmge aløøge baŋ Aciria, ni jääkge baŋe, eni na nyeya mana dwøŋ kiper nee jïtge ki køny. 'Ba ba løny jï nyeny Aciria ki man køny ge ki gïïa leth na en bäätge.

¹⁴ Kiper aani, a tïmö kaamar cïgïï ŋuu ki jï jø Ipariem, ni tïma thuwø kaamar ŋuu mo teek ki jï jø Juuda. Geni, ge peta petø ni thenh thenh ni puta aay; ge käla kälö ni bäŋ ŋat piem ge cera.

¹⁵ Køøre a aay ni døøa kar bëëtö mara, këël kanyo ŋäcge gïïa reyø na tïïcge, ni duuge ni manyge täärnyïma. Kanyo enge yïth gïï mo leth, aano manyge døc.