Odheea 14 - Wëël Jwøk

Luum Gwïëth Mano Tïïc Wuuö Jwøki Kiper Jø Icriel Ki Køør Mano Løkge Cwïnyge

¹ Wui, u na jø Icriel, duu baŋ Wuuö Jwøk, Jwøk maru, kiper uuna wëëk raayi mou pädhö.

² Duu baŋ Wuuö Jwøk, ni kööu jïre, ni «Wëën raay mowa bëët, ni jïëyï waani ki met ec marï, nee wa cïpwa ki pwøc no olämme.

³ Nyeny Aciria wa ba kønye, wa ba eth bäät okwëëc leny këët; ni jammi moa tïïcwa ki ceŋwa ba cwølwa këët ni ‹Jwøk marwa,› kiper beeye ïïni ni wø nyooth bäth ec marï jï kïïe.»

⁴ Wuuö Jwøk aköö, ni «Jiya 'duua baŋa, ni nyoodha mëër mara jïge ni yia met jaak, kiper wëër mara anø paanya bäätge.

⁵ A tïmö naa caala thööy ki jï jø Icriel, ni ö jø Icrielli ni løthge ni ŋøøkge kaamar apiitø, ni këët lweetge piny kaamar jer lur Libaanø.

⁶ Ni ö bäädi moge moa therø ni løthge ki bäädi møøk, ni tïm mïërö marge ni caala jer wø nyïïge wel na maaw, ni ö ŋwäänyge ni tïme ni met kaamar jer lur Libaanø.

⁷ 'Ba jiy moo bëëdö tïpö marge, ge cäŋa løthø kaamar beel, ni tïmge kaamar jer omøki mo thiiw; ni ö wïny nyeŋ marge ni tïme kaamar kwøk nyïïomøki mo Libaanø.

⁸ ?Wui jø Ipariem, agïnaŋø mør këët nø ni poot manynyu baŋ juuga reyø? Kiper beeye aani noo løk pïëc mou, noo gwøk uuni. Aani, a caala jaath mo bëëdö ni mar mo bøøge moe ba øc piny, ni bee aani noo jïtu ree ki nyïëdi.»

⁹ Ni näk da ŋat mo wïïe leer, beerra man kwany tiet jammi moi; ni näk da ŋat mo tiet luup ŋääe, beerra man ŋäc ge, kiper jïëthe mo Wuuö Jwøk thïïŋ, ni jø wø marge beer wø cäädhö ki yïthge, 'ba jø wø tïïc raay ge pädhö yïthge.