Odheea 13 - Wëël Jwøk

Luum Wëër Mar Wuuö Jwøk Ki Jø Icriel

¹ 'Ba kanya wara cään jø dhi øt Ipariem, jiy dëëtge puta tïmö ni kwanynyi; ni ge bëëdö no owøørø dï Icriel. 'Ba gena bääyö ki køør mana lamge jwøa cwøl ni Baal, ni ö thøø bäätge.

² 'Ba ennø, jø dhi øt Ipariem raay atïmö ni meetge bäätge; geni, ge tïïö ki kït gïï wø lam kiper dëëtge, ni tïïcge ka gwel-bïrö, ni tïïya rëëmmö ki jöör riek waŋ. Ni ö luubö man ni caani kiperge na ennø nø, ni «Geni, ge jëëtö ki dhaanhø man cïp olämme, ni nuumge kït gïï wø lam moøgø na no otïïö ni caala nyïïrøøe.»

³ Kiper manøgønø, ge caala rwöc mar amöölla, ni ge caala thööy ni wø laar rwäänyö, ni ge caala lethø ni wø laar jamø køøl kar dïn beel, ni ge caala jïrö ni wø duny wøk ki dha awëërnyeŋ.

⁴ «'Ba bee aani na Wuuö Jwøk, na bëëdö na Jwøk maru, ki mana täge ki mana enu yi ŋööm Ijep. 'Ba uuni, u doo bëëdö ni bäŋ Jwøk mør mo ŋäyu këët, ni näk mo paa aani keera, kiper bäŋ pïëmi mør këët, 'ba bee aani keera.

⁵ Aana bëëdö nou yaa gwøø kanya enu dï paap, yi ŋöömma no otal.

⁶ Kanya caama uuni, uuna jäŋ. 'Ba kanya jäŋŋu, cwïnynyu ajïtö ka atöör; køøre nø wïthu aput wïlö ki aani.

⁷ 'Ba ennø, aani, a tïmö kaamar ŋuu jïïu; ni tïma kaamar kwac mo omøør piny thääŋ jöö.

⁸ Aani, a päära bäätu kaamar cwieny mo nyïïe okälö, ni puta u cöötö ki kööthu. U cama camø ni puta u thöör, kaawat man wø tïïc ŋuuwi ma maath, ni puta u cöötö kaawat man wø tïïc cwienynyi.

⁹ «Wui, jø Icriel, man bee ränynyö maru, kiper uuna tïmö nou gëëmö ki aani, a na kunyi maru.

¹⁰ ?Age nyeya maru ennø, mo løny jïre ki man piem uuni? ?Age dïbwöthe mou moa en yïth päänye mou bëët, na cäänu ki geni ni kööu, ni ‹Wa röönynyi ki nyeya ki kwääri›?

¹¹ Aana cïpö jïïu ki nyeya ni aano wëër, ni lwøra gø ki køør wëër mara.

¹² «Gïïa reyø na bac dhi øt Ipariem anø göör piny, ni ö wëëlö mana gööri yie ni nø kani kar kän.

¹³ Rääm mo leth mo caala man wø lwaarø ki nyilaal atägö dëër Ipariem. 'Ba eni caala nyilaal mo wïïe ba leer. Kiper kanya pïïc kar lwaar mare man lwaarø ki gø, wïïe käre nyuuth wøk.

¹⁴ ?Aŋø, a na Wuuö Jwøk, jø dhi øt Ipariem ge daa wïïla wøk cer teek thøø? ?Aŋø, ge daa käl wøk ki yi thøø? ?Wui, ï na thøø, age teek aranya marï? ?Wui, ï na thøø, age teek gïna leth ni wø tïïyï? Aani, cwïnya ba cïba piny këët.

¹⁵ «'Ba jø dhi øt Ipariem këël doo bëëdö ni jammi bëët päŋ jïge dï nyïïmëëkge, jamø man wø ööi ki kur tuul-cäŋ jääŋŋa jääŋŋö bäätge, a na Wuuö Jwøk, ni kwönne ki dïtëën; ni ö jøør moge ni putge niŋul, ni ö aguule moge ni putge talø. Ni ö gïïa perge leth na en kwör kän moge ni puti twier bëët.

¹⁶ Jø Cameria ajäla marge døøa wïthge, kiper gena gëëmö ki aani, a na Jwøk marge. Geni, ge di nääö ko opëëllö. Obwöre moge moa therø di gøyø ki røk kïte ni petge, ni ö määrge moa näk yïthge da jiy ni riet yïthge.»