Odheea 12 - Wëël Jwøk

¹ Jø tuuŋ Ipariem ge ŋwieya køør jamø, ni ge rïïŋö cooth køør jam wø ööi ki kur tuul-cäŋ; ni tööt ki tïïc gïï mo reyø ege kaadhø. Ni geno tudö thuwø ki luubö ki jø Aciria, ni ge jwëëga Ijep ki mädhi mo wø cam.

² Wuuö Jwøk ena bäät man lööe ki jø Juuda, eni nyïïkwaac Jeekap di jäälö ki køør uutjïëthe moge, ni cool kwör dëëtge ki køør tïïe moge.

³ Geni kwarge ma Jeekap kanya en ec, opuny tier coki amaae; 'ba kanya nywøli na døøŋŋe, ena ŋäbö ki Wuuö Jwøk.

⁴ Ena ŋäbö ki nyïïatwiel maal ni bööt gø, ni kwac gø nee met ec nyooth jïre. 'Ba Wuuö Jwøk ajoode Bëthël, ni beeye kaace thuwø na cään Wuuö Jwøki yie ki øøni.

⁵ ni beeye Wuuö Jwøk, eni na wïth jammi bëët, na näk nyeŋŋe beeye Wuuö Jwøk.

⁶ Kiper manøgønø, duu baŋ Jwøk maru; ni bëëdu nou tïïya mëër ki ŋøl luup na adïëri, nou koora Jwøk maru cooth.

⁷ ŋat gath man wø rumö ki gïr røm mo patha kare, yie met ki møt jiy.

⁸ Jø tuuŋ Ipariem ge töödö ni ge köö, ni «Waana jiy mo okwär; waana jïtö ki jammi kiper dëëtwa. 'Ba jammi bëët moa jootwa ki køør öölö marwa, bäŋ gïn mo nyoothge bäätwa ni waana jø raay.»

⁹ Wuuö Jwøk aköö, ni «Aana Wuuö Jwøk, Jwøk maru, na käl uuni wøk ki Ijep; u tïïa tïïö nou cäŋu bëëtö yïth oduŋkaare, kaawat mana wara wøørru ajwöm mou.

¹⁰ Aani nyïïkuk Jwøk acäänna, ni nyuunhnha geni ki luup mo thööth mo wø nyooth ki yi wïc, ni cääna ki rege ki luup mo keda leere.»

¹¹ 'Ba pääny Gelät yie da raay; ka adïëri møn, jiy moe atïmö ni bäŋ karge. Ki yi Gëlgela dhäk moa näk rwädhe di cïbö no olämme. 'Ba gïï wø cïp olämme moge bäätge otïmö kaamar kïte mo ocooŋ yi pwödhö.

¹² Kwarø ma Jeekap apäär wøk ni ci yi ŋööm jø Aram. 'Ba eni na Icriel nee nyöömme ki dhaagø, ena tïïc ni kwaaya dïëk na kar gwel moa dee køølø.

¹³ 'Ba jiy moa öö ki ree, ni beege jø Icriel, gena käl Wuuö Jwøki wøk ki Ijep ki ri nyikuŋ Jwøk. Gena gwøk Wuuö Jwøki ki ri nyikuŋ Jwøk.

¹⁴ 'Ba jø tuuŋ Ipariem, ni poot na jø Icriel, Kwäärö Wuuö Jwøk atïïcge nee goote ki geni døc. Kiper manøgønø, kwör rem jiy moa kønyge piny odwøk Kwäärö Wuuö Jwøki bäätge; ni ö ajøøŋ mana tïïcge ni dwøgi wïthge.