Odheea 11 - Wëël Jwøk

Luum Mëër Mar Wuuö Jwøk Ki Jø Icriel

¹ «Aani, kanya poot jø Icrielli na wï jur mo thiinh, a mëër ki geni, ni cwöla geni wøk ki Ijep ni caala wääda.

² 'Ba kanya cwøla ge naa manynya geni døc, aputge tïïc ni beeye man wecge aani døc. Geni, ge poot cïpö ko olämme jï juu mo wø cøøri ni Baal, ni ge wääŋö ki gïï wø jïcge ŋwääi ni met jï kït gïï wø lam.

³ 'Ba beeye aani na pwöny geni ki wääth, ge na jø Ipariem, ni beege jø Icriel, ni maaŋŋa ge ki ceŋŋa naa thaaya geni; 'ba kucge ni bee aani na køny geni.

⁴ Gena käära ni ge yaa twöö ki mëër; ni tïma jïge ni beeye ŋata käl tëëra peek wøk göökge, tëër wø caal jaath man wø rïï ŋut dhieŋ ri puur; ni caama geni ni dëëra yaa dwøk piny.

⁵ 'Ba kiper mana kweerge ki man luuge nyïmge baŋa, ge døøa yi laŋ kaawat mana bëëtge yi ŋööm Ijep, ni tïmge ni ge ena tier nyeny Aciria.

⁶ 'Ba leny nakwaar yïth päänye moge, ni ö dïdëëdi mo odhuule mo dhøk kiir marge ni nigenyaŋŋa piny, ni tïm aŋuun jammi bëët moa caarge ni bäŋgø.

⁷ Gena reeth ri man løøge ŋäthge wøk ki aani, 'ba ge këël doo jwöŋö dëëra, a na Jwøa Dwøŋ ni en Maal, ge ba kønya.

⁸ «?Wui jø tuuŋ Ipariem, olønye nidïï ki man cïba uuni ceŋ jø møøk? ?Wui u na jø Icriel, olønye nidïï ki man wiia uuni nou aayu? ?Aŋø, løny ki man raanynya uuni kaamar jø Adama ki jø Dheböym? Cwïnya akweer ki man tïïa gïnögø, ni ö bäth eci mara ni jääny wøk ki mëër.

⁹ U ba jääla këët ki wëër mara ni wø liel kaamar maac. Wïthu ba dïïra këët, u na jø tuuŋ Ipariem. Kiper aana Jwøk, naa patha dhaanhø, ni bee aani na Jwøa en kur keere na en dïïu. A ba ö baŋu këët ki wëër.

¹⁰ 'Ba uuno cäädhi køøra, a na Wuuö Jwøk, ni mära kaamar ŋuu. 'Ba kanyo mära, jiya oput öö ni dëëtge kwanynyi ki kur pänh-cäŋ.

¹¹ Geno ööi ki Ijep kaamar weny, ni öge ki ya Aciria kaamar akuyi; ni ge ööi ni dëëtge kwanynyi. Køøre geno wëëga pïïn piny yïth mïëri moge. Luummögø caana aani, a na Wuuö Jwøk.

Luum Raay Mo Jø Icriel

¹² «Jø tuuŋ Ipariem deŋŋa acielge ki tööt, ni ö jø dhi øt Icrielli ni cielge deŋŋa ki cwøk. 'Ba jø tuuŋ Juuda thuwø wïthge poot känni ki man jïëcge aani, a na Wuuö Jwøk, ni bee aani na Jwøa en kur keere na näk mare adïëri.»