Obeec Dudi 8 - Wëël Jwøk

Dhaagø-Thiinh Poot Paaga Cwøre

¹ Wui, doo naa ï caala coka ma dïcwøø mana dhøøth thunh mera; aani ni näk miï yaa joodø wøk, dhiï daa nuumö, ni bäŋ ŋat mo jääl aani.

² Aani, ï daa kälö ni kïtha ïïni yi øt mera na pwöny aani. Aani, ï daa mooø ki køøŋø mo ŋwääi ni met nee maathï, ni beeye køøŋø mo tïïc ka pï nyïï adïkwäle 'moa.

³ Beerra man ö cer caamï ni thäänha ki gø, ni ö cer cwïïï ni gäämï aani ki gø.

⁴ Wui, u na nyïïakuk Jerucalem, a cäänna uuni, nee mëër ba tuuŋŋu nee ö maal këël kanyo pïïc kare.

Luubö Mana Caan Nyïïawäädi

⁵ ?Aŋø, man aŋa ni ööi ki dïtëën en, ni cäädhi ni ree ee nyaaŋ bäät omëër mare en? Aani, mëër mara anyoodha jïrï tier jaath; ni beeye tier jaadha ö meru ni put cäädhö yie ki mäc lwaar, ni put lwaar ki ïïni.

Luubö Mana Caan Dhaagø-Thiinhnhi Jï Cwøre

⁶ Gum aani cwïnyï kaamar ogut lweedø mar ŋïï mo pere leth jïrï, ni tïïyï aani kaamar ogut lweedø mar ŋïï mo ena cerï; kiper mëër teek døc kaamar thøø, ni këëyö mare leth ni caala yi bwörö, ni mëër liel kaamar maac, ni nitära ni caala leep maa Jwøk.

⁷ Pïï mo thööth maa-mëër ba jwöe; ni bäŋe näm mo wëëga gø køøl. Ni näk mo da dhaanhø mo cïpa jap kwärö mo paare bëët kiper nyeŋ mëër, jammi moe bëët di taa.

Luubö Mana Caan Nyïïmii Dhaagø Moa Näk Cwøw

⁸ Waani, jïwa da cöökwa ma nyakøø mo poot thiinh, mo thure poot kär døøŋŋø. ?Agïnaŋø noo tïïcwa kiper cöökwa nø, kiper cäŋ mano pëënynyi yie ki nywöm?

⁹ Doo naa ena kal, dewa gëënnö ki øt koor mo teek mo tïïc ka gwel-bïrö. 'Ba doo naa ena dhi øtø, dewa gëëŋö ko opäp jaadha teek.

Luubö Mana Caan Dhaagø-Thiinhnhi

¹⁰ Aani, a caala kal mo teek, ni ö thunhnhi 'moa ni caalge uut koor moa no ogeer ni ena maal; ni ö omëërri mara ni jïte ki met ec baŋa.

¹¹ Cølöman da pwöth omøki jïre kanya cwøl ni Baal-Amön. 'Ba eni pwöth omøki manøgø ee cïp ceŋ jiy mo gwøga gø jïre, ni ŋati man nø kännö jïre ki gwet-bïrö ma kuma ki røk nyïëdi mo wø gath.

¹² 'Ba pwöth omøki mara beeye kipera; ni gwet-bïrö ma kuma beeye kiperï, ï na Cølöman. 'Ba gwet-bïrö ma dïpe ariiø beeye kiper jøøa gwøk nyïïjenni.

Luubö Mana Caan Dïcwøø Jï Cïïe

¹³ Wui, ï ni en yïth ajïniine, nyïïawääta yïthge ege ciiø ki dwørï; beerra man wïnynya dwørï.

Luubö Mana Caan Dhaagø-Thiinhnhi Jï Cwøre

¹⁴ Wui, omëëya, laar ö baŋa, ni tïmï kaamar purra wala thwønh aŋer mo ena bäät kïte moa näk bäätge da jer wø ŋwääi ni met.