Obeec Dudi 4 - Wëël Jwøk

Dïcwøø Paaga Cïïe

¹ Omëëya, a teeŋ mïëyaŋø ni mïërï ki gø en! Wui, a teeŋ mïëyaŋø ni baŋï en! Nyeŋŋï nëëni ni mïërö kaamar akuuru tier abïï mana näk iï loop wïïï; ni jïëyï nëëni kaamar pïïth atëëe mo kööla piny ki bäät Kïn Gelät.

² Lagï nëëni ni tar kaamar pïïth rööm mo jïëcge onyaarø mo ge ööi ki baŋ lwøk, ni gena cïp-jwøk, ni bäŋgø rege mo bëëdö na eni keere.

³ Buny dhiï ree atwøde ni kwaar kaamar waarø mo ocwääö na baap; ni dhiï nëëni ni mïërö. Pïtï nëënö tier abïï mana näk iï loop wïïï kaamar nya adikwala mo opääŋŋö na thäŋi ariiø.

⁴ Ŋutï bäär kaamar øt koor mar Deebit, na näk ogeerø ni mïërö; ni kööt leny ma kuma olïër yie, ni beege kööde bëët mo jø leny moa teek.

⁵ Thurï moø na ariiø yøø mïërö ni caala nyïï purre ariiø ma cïp-jwøk, mo ge cämö yïthakic apiite.

⁶ A bëëdö bäät kïnna näk bääte da dwøk, ni beeye bäät thuura näk bääte da jer wø ŋwääi ni met, këël kanyo ruu øwi, noo pööth muudhö mar wäär.

⁷ Wui, omëëya, dëërï mïërö bäre, ni bäŋ kany mo jøøŋŋi riï.

⁸ Wui, ï na dhaagø-thiinh mara, cøø piny na aciel ki bäät Kïn Libaanø. Wui, cøø piny na aciel ki bäät Kïn Libaanø. Løøyø piny ki bäät Kïn Amana, ni løøyø piny ki bäät Kïn Canër ki Armön, ni beege kwör bëëte mo ŋuuwe, na kïte mo wø bëët kwäänynye bäätge.

⁹ Wui coka, ni bee ï dhaagø-thiinh mara, cwïnya atïmö ni pärö døc kiperï! Cwïnya atïmö ni pärö døc møn kiperï ki yi räŋŋö aciel mana raŋï jïra ki nyeŋŋï, ki tiin-jeth aciel mana jooda cwaagï.

¹⁰ Wui coka, ni bee ï dhaagø-thiinh mara, a teeŋ met ec mo nyïëdi na jooda ki køør mëër marï! Wui, mëër marï ko opöödhö ki met ni kaala køøŋ nyïïomøki, ni ö maar wïïr marï ni ŋwääe ni met ni kaala teeŋ gïï wø ŋwääi ni met møga bëët.

¹¹ Wui, ï na dhaagø-thiinh mara, buny dhiï ŋweeth ni caala maar kïc; ni beege caak ki maar kïc ni en tier leebï. Abïïe moï ŋwääö ni met døc ni kaala ŋwääny jer wø ŋwääi ni met yi Lur Libaanø.

¹² Wui coka, ni bee ï dhaagø-thiinh mara, ï caala ajïniina mo dhee odëëdö, ni beeye ajïniina mo kal mare othørø ki kïte, niï caala iith mo dhee odëëdö.

¹³ Ïïna ajïniina mo yie da jer adïkwäle mo oŋweel ki nyïëdi mo beyø, ki teeŋ jer wø ŋwääi ni met ni wø tïïc na mäth wïïr;

¹⁴ ki teeŋ jer wø tïïc na mäth wïïr ki booya ma abäga, ki jer wø ŋwääi ni met ni wø kïth yi kadø, ki jaath man wø tïïc na maar wïïr, ki teeŋ jenni møøk mo ŋwääö ni met, ki jer dwøk, ki teeŋ jenni møøk thuwø mo perge leth mo ŋwääö ni met.

¹⁵ Ïïni, ï caala jøøro mo ena ya ajïniina, niï caala iith mo pïïe met, niï bëëdö kaamar waŋ naam mo kwönni ka yi Kïn Libaanø.

Luubö Mana Caan Dhaagø-Thiinh

¹⁶ Wui, ï na jam wø ööi ki jï løø wï-piny, ö maal! Wui, ï na jam wø ööi ki jï løø tier-piny, ööï! Ööu ni kwötu dëër ajïniina mara, nee ŋwäänynye na näk met nee kwöt kany mo bäär. Beerra man ö omëërri mara ni døny ya ajïniina mare, ni cam nyïïjenni na beyø na en yie.