Obeec Dudi 3 - Wëël Jwøk

¹ 'Ba kanya ena kar niine mara, wäär bäre athööra naa cädö naa manynya ŋata mëëra ki gø ki cwïnya; aana bëëdö naa manynya gø, 'ba eni kära joodø.

² 'Ba ennø, a ööa maal naa cøøa nyeŋ jïëthe mo pääny, ka agääk jïëthe. Aani, a cøøa kuna manynya ŋata mëëra ki gø ki cwïnya. 'Ba kanya nø cøøa ni manynya gø, eni kära joodø.

³ 'Ba jø wø kurö ni ge wïdö dï pääny, aana jootge; ni puta ge pëënynyö ni kööa, ni «?Ŋata mëëra ki gø ki cwïnya ajootu?»

⁴ 'Ba kanya pöödha ki buutge mo thiinh, ŋata mëëra ki gø ki cwïnya aputa joot, ni puta gø mak ni mäna gø ki wääth, ni kïtha gø po mera, yi øtø mare, eni na nywøl aani.

⁵ Wui! u na nyïïakuk Jerucalem, a cäänna uuni, nou kööŋŋu ŋëët aŋeri ki purre mo wø en yi pwöla, nee mëër ba tuuŋŋu nee ö maal këël kanyo pïïc kare.

⁶ Wui! ?Man aŋøøni ni ööi ki dï paap, ni ree wenyø kaamar jïrö en, ni ŋwäänynye met kaamar teeŋ jer wø jïcge ŋwääi ni met ni wø jääp dïgäthe?

⁷ Ka adïëri møn, beeye pëëm man wø käär wälu ki gø mar Cølöman, no okoor jø lenynyi moa teek ma pïërabïciel røk jø leny moa teek mo Icriel.

⁸ Ni ge bëët ceŋge do opëëlle, ni geno kwänynyö døc ki leny; no opëëlle moge ege twöö ŋäthge, ni rege ege jiiŋŋø kiper gïn mo leth mo tägö ki wäär.

⁹ Pëëm mana tïïc nyeya ma Cølömanni kiper dëëre, tïïe ka jaath mo käla yi lur Libaanø.

¹⁰ Ni tïïc tiet abïla mar pëëm manøgø ki gwel-bïrö, ni tïïc kany wø jääŋ røk ki gø ki warkey, ni kïth kany wø pï yie ka abïï ma dïmuur, ni jammi moa tïïc nyïïakuk Jerucalemmi ki mëër marge opeeth dïëre.

¹¹ Wui! u na nyïïakuk Jerucalem, ööu wøk, ni neennu nyeya ma Cølöman ni wïïe okïthö ka aduda en, ni beeye adun nywöm mana kïth menni wïïe dïcäŋa nyöömme, ni beeye dïcäŋa näk cäŋ met ec mare.