Obeec Dudi 2 - Wëël Jwøk

¹ 'Ba aani a caala jaath jaak mo oŋøøk ni mïërö yi ŋööm Carön, naa caala apiitø mar gool.

Dïcwøø Paaga Omëëye

² Omëëya nëënö dï nyïïakuue kaamar apiitø mo oŋøøk ni mïërö yïthakic koodhi.

Nyakøø Paaga Omëëye

³ Omëëya nëënö dï obwöc cwøw kaamar jaath mo bääte oninøn ki nyïëdi yïthakic jenni mo paap. Aani yia met ki man pïïa piny tïpö mare, ni kany wø cama nyïëdi moe, put dhaa ka jwør ni met.

⁴ Eni aana kïth yi øtø mare kiper atïya mana näk ee jiiŋŋø kipera, ni gïna näk ee tïŋ maal bääta kaamar bëëra, beeye mëër mare ki aani.

⁵ Caam aani ki cam mo dëëra nathïk ki gø. Wëëk dëëra tëënnö ki nyïïjaadho cama, kiper dëëra bëëdö no oööl mëërri.

⁶ Beerra man ö cer caame ni thäänha ki gø, ni ö cer cwïïe ni gääm aani ki gø.

⁷ Wui, u na nyïïakuk Jerucalem, a cäänna uuni, nou kööŋŋu ŋëët aŋeri ki purre mo wø en yi pwöla, nee mëër ba tuuŋŋu nee ö maal këël kanyo pïïc kare.

⁸ Cegu ïthu! Man beeye dwør omëëya ni wïnyi en. Raŋŋu, ena rïŋŋö ki bäät kïte, ni ööi ni pärö ki yïthakic thuuri ni ööa baŋa.

⁹ Omëëya caala aŋer ki thwønh purra mo teek. Raŋŋu, eni cuŋŋö deŋ øtø marwa ni eni rääŋö ki dha awëërnyeŋ ki yïthakic rïwe.

¹⁰ Omëëya acäänö ki aani ni kööe, «Ö maal nø, omëëya, ni ööï baŋa, ni bee ï omëër mara na mïërö.

¹¹ Raŋï, cwiir anø pöödhö, ni ö køthi ni cuŋŋe.

¹² Jenni anø ŋøøk yi ŋööm pøø, ni ö caa man jwöŋ wenynyi yie ni ööe. Dööt akuyi aløny ni wïnyö yi ŋöömö marø.

¹³ Olämmi anø ŋweel ki nyïëdi, ni ö jer omøki moa no oŋøøk ni nø ŋwänyge ni met. Ö maal nø, omëëya, ni ööï baŋa, ni bee ï omëër mara na mïërö.»

Dïcwøø Paaga Omëëye

¹⁴ Wui, omëëya, ï ni caal akuuru mo ena yïth aleye ki yïth kïte, mo ree ee kanø kany mo diiny deŋ kïdi en, beerra man nyoothï täärnyïmï jïra, ni tïïyï dwørï nee wïnynya, kiper dwørï met ni täärnyïmï mïërö.

¹⁵ Magu othööe jïwa, ni beege nyïï othööe moa therø ni wø raany jer omøki, ni beege jer omøki mowa na näk oŋøøk.

Nyakøø Paaga Omëëye

¹⁶ Omëëya beeye mara, ni aana mare; eni dïëk moe wø caame yïth apiite.

¹⁷ Wui, ï no omëër mara, beerra man luuï riï baŋa ni bëëdï ki aani, këël kanyo ruu øwi noo pööth muudhö mar wäär. Beerra man tïmï kaamar aŋer ki nyi purra mo teek mo ena bäät kïte mo gwalli.