Obeec Dudi 1 - Wëël Jwøk

¹ Duut man beeye obeec dudi mo Cølöman.

Nyakøø Paaga Omëëye

² Beerra man ööï ni nuumï dhaa ki yi nuum dhøk marï, kiper mëër marï cïpö ki met ec mo kaala køøŋ nyïïomøki.

³ Maar riia mana näk iï wïïrö, ŋwäänynye ec døøye mo met, ni wïny nyeŋ marï caala maaw mo ŋwäänynye met mo oøøc piny ni muulö. Kiper manøgønø, nyïïakuue mëër ki ïïni.

⁴ Nyïï aani buutï, nøø putø aay ennø na aciel! Beerra man ö nyeya mara ni kïth aani yi øtø mare. Wa kanynyø kiperï ni yïthwa omïnnö; mëër marï pwøcwa pwøø ni kaala køøŋ nyïïomøki. Wui, mëër mar nyïïakuue ki ïïni kee kare møn!

⁵ Wui, u na nyïïakuk Jerucalem, aani, aana dhaanhø maa cøl, 'ba kïta mïërö, naa cøl kaamar oduŋkaare mo jø Këdar, naa mïërö kaamar abïïk gëëŋŋe mo øt Cølöman.

⁶ A kär neetu ni nyeŋŋu you këël dëëra kiper cøl mara; kiper aani, dëëra cuula cäŋŋi. Nyïïmera moa näk cwøw gena gootø ki aani, ni tïïcge aani nee pwöth jer omøki koora; 'ba aani pwöth jer omøki mara kära koorø.

⁷ Wui, ï na mëëra ki ïïni, caanï jïra, ?A kaa ŋø ni wø kwaayï dïëk moï yie? ?Na kaa ŋø ni wø wëëgï dïëk moï jwöm yie ki dhöör? Caanï jïra, naa ba tïma kaamar dhaagø mo wïïe ee loobø kaamar kääbi, mo cäädhö yïthakic dïëk mo nyïïawäädi moï.

Dïcwøø Paaga Omëëye

⁸ Wui, ï na dhaagø mo mïërö døc dï mään, ni näk mo kar kwaath kuyï, løp køør tiet dïëk, ni wëëgï nyïï atëëe moï caam deŋ oduŋkaare mo dïkwääc dïëk.

⁹ 'Ba ki baŋa, ï no omëëya, ï caala okweeny ma maath mo ena dï okwëëc leny ma thwönhi mo Peerø.

¹⁰ Täärnyïmï nëëni ni mïërö ki jap mïërö moa näk iï twöö, ni ö cwaagï ni bëëde ni mïërö ki tiik jëëthi moa en yie.

¹¹ 'Ba waani, wa tïïö ki jap mïërö møøk jïrï mo tïïc ka warkey ki gwel-bïrö.

Nyakøø Paaga Omëëye

¹² 'Ba kanya bëët nyeya mara ni ena kar cam mare, maar riia mara na näk ŋwäänynye met aput kadhø ki ŋwääö døc.

¹³ Omëëya bëëdö jïra kaamar dwøø mo ŋwäänynye met mo okwøø yo opïr, ni wø but yïthakic thura.

¹⁴ Omëëya nëëni jïra kaamar jaath mo oŋøøk mo ŋwääö ni met yi pwöth jer omøki mar paana cwøl ni Ayn-Gadi.

Dïcwøø Paaga Omëëye

¹⁵ Omëëya, a teeŋ mïërö mo nyïëdi ni mïërï ki gø! Wui, a teeŋ mïëya ŋø ni en jïrï en! Nyeŋŋï nëëni ni mïërö kaamar akuuru.

Nyakøø Paaga Omëëye

¹⁶ Omëëya, a teeŋ mïërö mo nyïëdi ni mïërï ki gø en! Wui, ec mïnnö ki ï døc! Pëëm marø otïmö ni beeye luum mo pulli.

¹⁷ Ni ö jera perge leth ni tïmge ni beege cööthe mo øtø marø, ni tïm cuge mo øtø marø na teeŋ jera perge leth møga.