Neeyam 2 - Wëël Jwøk

Luum Ränynyö Mar Nineba

¹ Wui Nineba, ŋat mo keetha ïïni ööa baŋï! Koor kar gwøk røk, ni neetï nyeŋ jïëthe, ni twöyï riï, ni cooŋï jø leny moï!

² Wuuö Jwøk ajiem mar jø Juuda dwøge kare, kaawat mano dwøk ajiem mar jø Icriel kare, këël na bëëtge ni geno twier dïtwïëte, kaawat man wø tïïc dïlïm omøki ni nyïëdi jaaŋge jaaŋŋø.

³ Jø leny moe käädö ki kööt leny mo kwayø, ni geno ruyö ka abïïe mo kwayø. Jïëth leny moge mo wø tut okwëënyi nagaaŋ kaamar maac kanyo rwänhge baŋ leny, ni ge wuyö ni tøøŋi moge ena ceŋge.

⁴ Jïëth leny moøgø mo wø tut okwëënyi rïïŋi ka ŋwïëc bøøl uutjïëthe, ni bëëtge ni ge reŋŋa løøi ki løøi yïth kwöra laac dï paac, ni ge nikwiil kaamar ameethi, ni ge nimal kaamar agaackøth.

⁵ 'Ba wïth jø leny moe ocwøle ni bëëtge ni ge päänhnhö kanyo cäänhge baŋ leny. 'Ba jøw tuk geni ge laara läät dëër kiir, ni peerge gëëŋi bäät gïno toor kiir piny ki gø.

⁶ Ni ö dhøk adïïre mo waŋ naam ni tucge, ni ö lwär mo dwøŋ ni täge paan dwøŋ.

⁷ Ni ö gwanynyø ni loonyi ni maai ki tøŋ, ni ö määr tïïci moe ni jwöŋge kaamar atuuy, ni ge pööta kööthge.

⁸ Nineba jiye thuma wøk, kaawat man wø ö pï puulli wø thumge wøk ki yi øøl. Këël jiy doo rëëdö, ni «Cuŋŋu! Cuŋŋu!» bäŋ ŋat mo løk ŋääe.

⁹ Twierru gwel-bïrö mare, ni twierru warkey mare, kiper teeŋ jammi moa perge leth ki teeŋ jap kwärö ba thum.

¹⁰ Nineba di twierø ni ränynye ni neeruuth, ni ö cwïny jiy ni bwøkge, ni ö nyeŋ cøŋge ni pöötge rege, ni ö pëët jiy ni nigelway, ni ö täärnyïmge bëët ni nigiduk.

¹¹ ?Ennø, age pääny Nineba na caal kar bëët ŋuuwe, na kany wø bëët ŋuuwe yie mo ogäy, na kany wø bëët cïgïï ŋuuwi yie ki maath ŋuu, na kany wø bëët nyïïge yie no ogwøø?

¹² Cïgïï ŋuu wø dwar, ni nääe ki mo orømø jï nyïïe ni jeec møøk jï cïïe, ni pääŋ buur kar bëëtö marge ki dëët gïïa dware.

¹³ Neennu, mana caan Wuuö Jwøki, eni na wïth jammi bëët, bee en, ena köö, ni «Aani, a tïïö dëëtu ki gïrpiny. Aani jïëth leny mou mo wø tut okwëënyi waaŋa waaŋø ki maac, ni ö tøŋŋi ni thöör jø leny moï na caal ŋuuwe mo ogäy, ni tïïa japa twierru ni bäŋgø yi paac, ni bäŋe dööt jø wø jääŋŋi mo wïnynyi këët.»