Neemiya 6 - Wëël Jwøk

Kanya Ö Nyïïmänni Na Manyge Man Raanyge Neemiya

¹ 'Ba kanya caani jï Cenbalat, ki Thöbiya, ki Gëcam nyen ma Araba, ki jï nyïïmän mowa bëët, 'ni aani kiir yaa cäŋ geerrø, ni bäŋ kany mo ŋaam këët dëëre, këël na bëëde kar kaaca ni aani odhuule poot kära kïth dhøk kiir,

² Cenbalat ki Gëcam, gena jääŋ baŋa ki dwøl ni köge, ni «Ööï nee ø røømmø na aciel kanya cwøl ni Kepirim yi ŋöömma näk ree ee päärö na cwøl no Onö.» 'Ba geni marge määnyö ki jöö nee tïïge ki gïn mo leth dëëra.

³ 'Ba aana jääk baŋge ki jiy ni kööa, ni «Aani, bääta da tïïc mo dwøŋ, ni ba løny ki man ööa kunögø. ?Aŋø, aperŋø noo ö tïïci noo cäŋ cuŋŋö këët en kanyo wiia gø noo ööa baŋu kunögø?»

⁴ 'Ba geni, gena bëëdö ni ge jääga baŋa ki dwøl kwöre aŋween ni poot na dwørøgø na aciel enø, ni bëëda naa poot dwøga dwøl aciel jïge thuwø.

⁵ 'Ba kanya tïme na ri bïïge, Cenbalat dhaanhnhe ajääŋŋe baŋa ni poot jääŋŋe ka dwørøgø, ni cer gø ee mooø ki wëëlö mo kär mwönö,

⁶ mo ogöörö na ennø nø: «Man beeye gïn mo owïnyö dï wïth juurre, ni caani ni Gëcammi thuwø, 'ni ïïni ki jø Juuth, maru määnyö ki jöö kiper nou gëëmmu; ni beeye ni tïme ni kiir geerru geerø en. Maya thuwø, ki køør luup moi moa wïnyö, ïïni, ï manynya gø niï tïmï na nyeya marge.

⁷ Ni ïïno nø kwänyö ki nyïïkuk Jwøk kiper nee luum nyec marï gøøge piny yi Jerucalem, ni ‹Da nyeya Juuda.› 'Ba dwøl man di caanø jï nyeya ki køør dööti moi ii. Ennø, beerra man ööï nøø jïtø ka acooŋa na aciel.»

⁸ 'Ba aana jäägö ki dwøl baŋe ni kööa, ni «Teeŋ gïïa carï yøø bäŋgø mo otägö; 'ba gïïögø beege gïïa cøøŋŋï yiï ki ge jaak.»

⁹ 'Ba jøøgø bëët ge päära waani nee wa lwäcwa, ni ge cäänö ki cwïnyge, ni «Geni, ceŋge boo nilwak ri tïïc cøøn nee tïïc ba thume.» 'Ba aana lämö ni kööa, ni «Wui Jwøk, wëëk bääta tëënnö.»

¹⁰ 'Ba dïcäŋ aciel, aana ci øt Cemaya o Delaya nyikwaar Meethabël, kanya bëëde ni eno cïëk yi øde. Køøre ena köö, ni «Beerra man cøø nee ø dwätø yi Øt Jwøk Mana Dwøŋ, ni cïëgø odhuule mo Øt Jwøk bäätø, kiper geni, ge ööa kuna 'näkge ïïni, ni kanyo öge kuna 'näkge ïïni yie beeye wäär.»

¹¹ 'Ba aana köö, na «?Aŋø, ŋat wø reŋi beeye dhaanhø mo caala aani ennø? ?Teeŋ ŋat mo caala aani ennø, beeye ŋat mo doo cøøa Øt Jwøk Mana Dwøŋ ni eni gwøga jwïëy moe? Aani, a ba døny yie.»

¹² 'Ba aani, gïnögø ajooda man näk mo eni ba jääŋŋa Jwøki baŋa; 'ba luup moa købe, købe ni eni maaŋŋa wïïa ki geni, kiper eni, eno ŋeeø ki piny, ni eni ŋeewa Thöbiya ki Cenbalati.

¹³ Ena ŋeew ki piny kiper naa cøøge naa lwäya, nee mana manyge tïïa kiper naa bääya, nee nyeŋŋa raanyge naa päätge.

¹⁴ Wui, ï na Jwøk mara, kär wïïï wïl ki gïï ii na tïïc Thöbiya ki Cenbalati, ni ba wïl wïïï thuwø ki gïïa tïïc Nöadiya, dhaaŋŋa näk nyikuŋ Jwøk ni wø køp luup ki wïïe, ki nyïïkuk Jwøk møøk na caal dhaaŋŋøgø, jøøa päär aani naa lwäya.

Kanya Thum Kiirri Ki Geer

¹⁵ 'Ba kiir bäre athum ki geer ki nïne ma pïërabïïc kurriiø, ni nïr dwää abïciel ni wø cwøl ni Ëlul pïërariiø ka abïïc.

¹⁶ 'Ba kanya ö nyïïmänni mowa bëët na wïnyge gø, ni ö wïth juurre bëët moa en deŋwa na jootge gø, geni bäätge aput pädhö døc ni nyeŋge okwätö, kiper ajootge ni tïïc manøgø beeye Jwøk na wëëk gø thur kare.

¹⁷ 'Ba ki yïth nïröke thuwø, jøøa kwörge døøŋŋø mo Juuda gena bëëdö ni ge jäägö ki weeli baŋ Thöbiya, ni bëët weeli mo Thöbiya thuwø ni ööa baŋge.

¹⁸ Kiper jiy mo thööth yi Juuda okööŋ ki man dwätge ki eni, kiper ena cø nyi Cekaniya wär Araa, ni wääde ma Jöanan beeye na nywøm nyi Meculam o Berekiya.

¹⁹ Maya thuwø, jiy bëëdö ni ge cara gïr tïïe moe moa beyø jïra, ni carge luup 'moa jïre. 'Ba Thöbiya ajääŋ baŋa ki weeli kiper naa lwäya.