Neemiya 4 - Wëël Jwøk

Luum Gïïa Tuut Nyïïmänni

¹ 'Ba kanya ö Cenbalati na wïny gø 'ni wa gëëdö ki kiir, ena put gootø ni wëëre døc ni jøøŋ jø Juuth.

² Ni ö eni ni cääne, ni jøøa näk odwätö ki eni ki jø leny mo Cameria nutö buute, ni kööe, ni «?Jø Juuth moø no onø päth bäät upge yøø, ge tïïcge ŋø? ?Aŋø, geni, ge cäŋa kiir marge dwøk kare jïge? ?Aŋø, løny jïge ki man cïpge ko olämme? ?Ni løny jïge ki man thöörge kiir ki dïcäŋ aciel? ?Aŋø, geni, kïte moa gëëdö ki geni moa näk oniruuth na no oraany maaci, løny jïge ki man cäŋge gëëdö ki ge?»

³ 'Ba kar kaagø Thöbiya nyï Amön ena buut Cenbalat, ni kööe, ni «Kiir manøgø ni geerge enø, këël etha othöö bääte, kïte mo kiir marge manøgø puta øc piny.»

⁴ 'Ba a na Neemiya, aana lämö ni kööa, ni «Wui ï na Jwøk marwa, wïny marwa, kiper wa bëëdö ni waano taak jiyi. Beerra man dwøgï ajøøŋ marge dï wïthge, ni wëëgï geni twier, ni kïth geni yi ŋöömö mør ni ge mak ka tøŋ.

⁵ Ïïni, kär bääyö marge uumï, ni ba gööbï raay moge wøk nyïmï, kiper jø geer ajøøŋge täärnyïm jø geer kiree.»

⁶ 'Ba waani kiir ageerwa, ni ö kiiri bäre ni dööte, no opïï maal thääŋ köör kiir, kiper jiy cwïnyge päl døc ki tïïc.

⁷ 'Ba kanya ö Cenbalati ki Thöbiya, ka Arabe, ki jø Amön, ki jø Acdöt na wïnyge gø ni kiir mar Jerucalem tïïc mare ki man dwøgi kare cäädhö ni beer, ni kwöra ŋammø onø dïïr, geni, gena put wëër døc.

⁸ Ni ö geni bëët ni putge tudö ki luubö nee öge nee këëtge ki jø Jerucalem, ni ge tïïya gø nee Jerucalem bëëde ni yie do okiera.

Kanya Ö Neemiya Na Cïïm Jø Koor Nee Tïï Kiir Ba Cuŋŋe

⁹ 'Ba waani, waana lämö jï Jwøk marwa, ni cïïmwa jiy mo kurö mo neeta geni ki yïth cääŋŋe ki wärre.

¹⁰ 'Ba man beeye mana car jø Juuda, na tïmö kaamar duut, ni «Teek dëël marwa mar tïïc athum, ni kïte moa näk oniruuth poot thööth døc, ni waani, ba løny jïwa ki man geerwa kiir.»

¹¹ 'Ba nyïïmän mowa, gïna näk mo ege caanø beeye en, gena köö, ni «Geni, kanyø poode ni poot kucge, ni ø ba nëëni jïge, ø cøø këël kanyø dønynyø dïge ni nääø geni, nee tïïc marge cuŋŋe.»

¹² 'Ba jø Juuth moa bëëdö kany mo cään ki geni, gena öö, ni caange gø jïwa kwöre mo jïtö ka apaar ni köge, ni «Nyïïmän, ge öö ni tukge øøni yïth kwöro neetu bëët.»

¹³ Kanyøgø aani, jiy aputa cïïmmö ki jï løøa en jï piny deŋ kiir kwöra näk ŋammø ki kwöra leer; ni jiy cïïmma ka køør dhøk uudi moge, ni ceŋge do opëëlle, ki tøøŋi, ka athëëre.

¹⁴ 'Ba kanya nø raŋa bëëtö, aana ö maal ni cääna ki jøøa kwörge døøŋŋø ki jø kööre, ki jiy møga bëët, ni kööa, ni «Käru lwäyö ki geni, 'ba bëëdu nou lääŋŋa Kwäärö Wuuö Jwøk, eni na dwøŋ ni wø kwany dëëlli ki eni, ni këëdu kiper jø pou, kiper wäätu, ki nyïïu, ki määru, kiper uudi mou.»

¹⁵ 'Ba kanya ö nyïïmänni mowa na wïnyge gø 'ni gïna tuutge oløny ni ŋäcwa, na acaara marge onø raany Jwøki ni kär thur kare, wa bëët, waana put døø ri tïï kiir, ni ŋati man nø tïïya kuna näk kure.

¹⁶ 'Ba ki mana täge ki dïcäŋece nø, thäk jiy 'moa gena bëëdö ni ge tïïya tïï kiir, ni ö thäk jiya møga ni bëëtge ni ceŋge da tøøŋi, ki kööt leny, ka athëëre, ni dëëtge ege runynyö ka abïïk nywïëny; ni ö kwääri mo leny ni bëëtge ni rege ege cïïmmö ŋäth jø Juuda bëët

¹⁷ moa näk gëëdö ki kiir. 'Ba jiy moa jwïëk jap tïïc, tïïc marge tïïcge ka ceŋge oceele, ni ceŋge møga da jap leny.

¹⁸ Ni ŋat geer man nø gëëdö no opëëllö mare ee twöö piere, ni ö ŋat wø kooth tuuŋ ni bëëde ni ena buuta.

¹⁹ Køøre aana köö jï jøøa kwörge døøŋŋø, ki jø kööre, ki jiy møga bëët, ni «Ennø, tïïc apëëtö ni dwøŋ, ni øøni, ø bëëdö ni røgø yøø larø dëër kiir, ni jiy moi nø karge bäyö ki jiy møga.

²⁰ Uuni, kanyo enu yie jaak, noo wïnynyu dwør tuuŋ mar leny, uuno put öö ni dwätu ki waani. 'Ba Jwøk marø okëëdi kiperø.»

²¹ 'Ba kar kaagø, waana put bëëdö ni wa tïïö ki mano täge ki kany wø kwäär tiet øwi këël mano nëën ceerri, ni thäk jiy møga ge bëëdö ni ceŋge da tøøŋi.

²² Kar kaagø aana cäänö thuwø ki jiy, ni «Beerra man ö ŋati man nø ki ŋat tïïc mare ni tïme ni ge buuta yi Jerucalem ki wäär kiper nee ge bëëtge ni gena jø koor ki wäär, ni gena jø tïïc ki waŋcäŋ.»

²³ 'Ba aani, ki jø wø käärwa tïïc ki geni, ki jø tïïc 'moa, ki jø koor mo wø bëëdö ki aani, bäŋ ŋat mo obëëdö rewa na abïïe moe ee gööny wøk; ŋati man nø bëëdö ni jap leny moe nut cere, këël noo umme ki pïï.