Neemiya 2 - Wëël Jwøk

Kanya Ö Neemiya Na Døø Jerucalem

¹ 'Ba na tïme na køør dwäde aŋween, ni poot na ri cwiiri moø ni pïërariiø yøø, moa beet Arthëkcici ni ena nyeya, yi dwääy mana cwøl ni Nican, kanya käl køøŋø jï nyeya, aani køøŋø alwøra ni gaba gø jï nyeya. 'Ba ki mana bëëda cøøn, a käre joodø nyïme ni cwïnya opädhö.

² Køøre nyeya aana pëënynye, na «Aperŋø ni bëët täärnyïmï no oniduk en, këël na bëëdï niï ba tuu? Manøgø bäŋ gïn mør, 'ba beeye pänh cwïny.» Køøre aana lwäyö døc,

³ ni kööa, ni «Wui Nyeya, ïïno bëëdö na bäre bäre. ?Aani, cwïnya ba pädhe nidïï këët ni pääny kanya en bwöc kwäcwa yie oränynyö, ni dhøgi mo kiir mare othöör maaci?»

⁴ 'Ba nyeya aköö jïra, na «?Agïnaŋø ni manynyï?» Køøre aana lämö jï Jwø maal.

⁵ 'Ba kanya lønya ki lam, aana köö jï nyeya, ni «Nyeya, ni näk mo beeye gïn mo beer ki jïrï, ni a na dhaanhnhï, a bëëdö ni mara beer nyïmï, beerra man weyï aani naa døøa Juuda naa cøøa pääny mana en bwöc kwäcwa yie nee cäŋa geerrø.»

⁶ 'Ba mana løk nyeya jïra, ni gwanynyø opï piny buute, beeye en, ena köö, ni «Wääth marï ïïno bëëdï ki kany mo nyïëdi? Na yi wäne noo duuï?» 'Ba nyeya yie amïnnö ki man wec aani naa aa. Kanyøgø aani, nïne akwaana jï nyeya.

⁷ Køøre aana cäŋ köö, ni «Nyeya, ni näk mo beeye gïn mo beer ki jïrï thuwø, beerra man göönnï aani ki weeli nee cïba jï kwääri mo wø bëëdö paac man wø cwøl ni Løø Naam Upareeti Løøga, naa wecge ki man cøra dï poge këël mano pïïa Juuda.

⁸ Aani, a wär göönni thuwø ki wëëlö nee cïba jï Acaap, ŋat wø koor lul mar nyeya, kiper nee eni cïpe jïra ki jenni mo dhøgi mo kiir mo kar gwøk røk na en buut Øt Jwøk, ki jenni mo kiir mar pääny, ki jenni mo øtø mano bëëda yie.» 'Ba nyeya gïïa pëënynya acïbe jïra, kiper Jwøk mara cere na beer ena bääta.

⁹ Kanyøgø aana put aay ni cøøa baŋ kwääri mo wø bëëdö paac man wø cwøl ni Løø Naam Upareeti Løøga, ni cïba weeli jïge moa göör nyeya. 'Ba kar kaagø nyeya da kwääc leny ki jø leny mo wø cäädhi ki bäät okwëënyi mo ee cïbö nee cääthge ki aani ciel.

¹⁰ 'Ba kanya ö Cenbalati nyen ma nyï Örönaim, ki Thöbiya nyen ma ŋat köör ma nyï Amön, na wïnyge gø ni da ŋat mo oöö mo manynya bëënynyö mar jø Icriel, geni, cwïnyge aput tïmö ni raac.

Kanya ö Neemiya Na Caath Deŋ Kiir

¹¹ Køøre aana ö Jerucalem; 'ba kanya nø jwöma raa ki nïne adäk,

¹² aana ö maal ki wäär, aani ki jiy mo nøk. Ni aani, gïna näk onø cïp Jwøki mara cwïnya nee tïïa kiper Jerucalem bäŋ ŋat mo yaa gø caanø jïre. 'Ba kanyøgø bäŋ lääy mo wø cäädhö ki bäätge mo nut, 'ba beeye mana cäädha ki bääte keere na nut.

¹³ 'Ba kar kaagø ki dï wäär aana ci wøk naa cøra dhi kiir man wø cwøl ni Dhi Kiir Agäm Kïdi, jï løøa en iithi yie man wø cwøl ni Iith Thwöl, jï kuna en dhi kiiri yie man wø cwøl ni Dhi Kiir Wï Thur, kiper nee kiir mana näk oränynyö mar Jerucalem raŋa ki dhøgi mo kiir mare moa näk othöör maaci.

¹⁴ Køøre aana aay ni pöötha dhi kiir man wø cwøl ni Dhi Kiir Jøøro, ki bäät puul man wø cwøl ni Puul Mar Nyeya; 'ba bäŋ kany mo pööth lääyi ki yie mana cäädha ki bääte.

¹⁵ Kiper manøgø nø, aana aay ki wäär naa cøra waŋ Naam Kidaran naa raŋŋa kiir. Køøre ka aŋuudi raa aløøa ni duua ni cäŋa cur dhi kiir man wø cwøl ni Dhi Kiir Agäm Kïdi.

¹⁶ 'Ba jø kööre bäŋ gïn mo ŋäcge kiper kanya cøøa yie wala gïna tïïa; kiper aani, poot bäŋ gïn mo yaa caanø jï jø Juuth ki jï dïlämme moge, ki jøøa kwörge døøŋŋø moge, ki jø kööre moge, ki jï jiy møga bëët moo tïïc tïïc.

Kanya Caan Luum Kiir Ki Man Geeri

¹⁷ Køøre aana cäänö ki geni ni kööa, ni «Uuni, bëëtö man ni raac ni enø yie en nëënö jïïu, ni Jerucalem bëëdö no oränynyö, ni dhøgi mo kiir mare owaaŋø ki maac. Uuni, beerra man ööu ni cäŋø kiir mar Jerucalem geerrø, kiper nee ø ba bëëdø këët ni ø di jøøŋŋø.»

¹⁸ Køøre aani jöö mana bëët Jwøki mara ni cere na beer ena bääta acaana jïge, ki luup nyeya moa caane jïra. Ni putge köö, ni «Beerra man ööø maal ni tägø ki geer.» Køøre gena put tägö ki man kïthge ceŋge ri tïïögø na beer.

¹⁹ 'Ba kanya ö Cenbalati nyï Örönaim, ki Thöbiya ŋat köör ma nyï Amön, ki Gëcam nyen ma Araba, na wïnyge luum gïno tïïcwa, waana putge buuö ni ŋeethge bäätwa ni köge, ni «?Gïnö ni tïïyu enø agïnaŋø? ?Aŋø, uuni, maru ageem ki nyeya?»

²⁰ 'Ba aløøa jïge ni kööa, ni «Jwø maal tïïc marwa wëëge thur kare; kiper manøgø nø, wa na jiye, wa ööa maal ni putwa gëëdö møn. 'Ba uuni, bäŋ karu kany, ni bäŋ gïn mou cäänö kipere; uuni, bäŋ gïn mo ŋäc kiperu Jerucalem kany.»