Milkiya 1 - Wëël Jwøk

¹ Man beeye dwøl mana caan Wuuö Jwøki jï jø Icriel ki dhi nyikuŋŋe ma Milkiya.

Mëër Mar Wuuö Jwøk Ki Jø Icriel

² Wuuö Jwøk aköö, ni «Aana bëëdö naa mëër ki uuni.» 'Ba uuna köö, ni «?Mëër marï iï nyoodhø jïwa nidïï?» Ni kö Wuuö Jwøki, na «?Aŋø, Icøø paa cöök Jeekapi? 'Ba aana bëëdö naa mëër ki Jeekap,

³ ni männa ki Icøø, ni raanynya poge na en bäät kïte, ni wëëga wï poge dööŋŋö jï othööe na näk lääc paap.»

⁴ Kanymør jø Ëdöm köö, ni «Powa oraanynyø; 'ba waano duui ni cäŋwa kwöra no oränynyö geerrø.» 'Ba Wuuö Jwøk, eni na wïth jammi bëët, aköö, ni «Këël ge doo gëëdö, poot nyaa piny. Ni ö jiyi ni cwølge kaace ni po jøøa reyø, ni beege jøøa wëër Wuuö Jwøki ki geni na bäre bäre.

⁵ Gïnögø ojootu ki nyeŋŋu ni putu köö, ni ‹Wuuö Jwøk dwøŋ møn, këël yïth mïëri møga ni patha Icriel keere.› »

Ajäla Mana Caan Jwøki Kiper Dïlämme

⁶ Wuuö Jwøk, eni na wïth jammi bëët, aköö, ni «Nyilaal wänni di wøørø, ni ö ŋat tïïci ni wøør kwäärö mare. Wøp nø; ?ni näk mo aana wääu, age wödö mana nyoothu jïra? ?Ni näk mo aana kwääyu thuwø, age lwär mana nyoothu jïra? Uuni na dïlämme, beeye uuni na taak aani. «'Ba uuna köö, ni ‹?Ï ewa taaø nidïï?›

⁷ «Aana taagu kany wø cïpu ki cam mo raac bäät gïn wø cïp olämme bääte mana näk mara. «'Ba uuna köö, ni ‹?Nyeŋŋï ewa raanynyø nidïï?› «Beeye kiper mana kööu, ni ‹Gïn wø cïp olämme bääte mar Wuuö Jwøk bäŋ gïn mo wøør ree.›

⁸ ?Aŋø, kany wø cïpu lääy ma cööye no olämme, paa gïn mo obøth? ?Ni kany wø cïpu lääy ma ŋööte ki moa näk dëëtge da täwe, paa gïn mo obøth thuwø? Wär pääru ki man cïpu teeŋ lääyöge jï kwäärö maru. ?Aŋø, løny jïre ki man tïm yie ni met ki uuni? ?A løny jïre ki man pänh uuni ni yie met?» Gïnögø caana Wuuö Jwøki, eni na wïth jammi bëët.

⁹ «'Ba kawaane, u na dïlämme, ?aŋø ni ba kwayu Jwøk nø nee yie tïme ni bäth ki waani? ?Aŋø, ki køør teeŋ olämme mo wø cïpu yøø, løny jïre ki man pänh uuni ni yie met?» Gïnögø poot caana Wuuö Jwøki, eni na wïth jammi bëët.

¹⁰ Ni cäŋ köö, «Beerra mana di dhaanhø acielli cøø dëëtu ni cïëk dhøgi mo kal mar Øt Jwøk, kiper nee bäŋe dhaanhø dïïu mo äp maac bäät gïn wø cïp olämme bääte mana näk mara ki gïn mo bäŋ tiere jaak. Bäŋ gïn mo døøc yia mo met ki uuni; olämme moo cïpu jïra ba jïëa.

¹¹ 'Ba nyeŋŋa otïmö ni dwøŋ dï juurre, ni tägi ka jï løø kur tuul-cäŋ këël jï løø kur pänh-cäŋ; ni ö gïn wø jïye ŋwääi ni met ki muuce mo beel moa näk liil ni cïbi jïra ki yi piny bäre, kiper nyeŋŋa otïmö ni dwøŋ dï juurre.» Gïnögø caana Wuuö Jwøki, eni na wïth jammi bëët.

¹² Ni cäŋ Wuuö Jwøki köö, «'Ba nyeŋŋa araanynyu kiper na kööu, ni ‹Gïn wø cïp olämme bääte mar Wuuö Jwøk bäŋ gïn mo wøør ree, ni caammi mo wø cïp bääte beege moa no oränynyö jaak.›

¹³ Ni kööu, ni ‹Tïïc man duua öölö jaak,› ni ŋøllu gø ki laaw.» Gïnögø caana Wuuö Jwøki, eni na wïth jammi bëët. Ni cäŋ köö, na «?Aŋø, kany wø kännu ki lääy mo lwørru ka teek ceŋ jiy, wala lääy ma ŋööte wala mo tuu, ni cïpu geni no olämme, you caarø ni daa jïëö baŋu?

¹⁴ 'Ba acïëni oen bäät ŋata näk jïre da nywø diel mo beer dï pïïth mare, na näk eno kööŋ ki man cïp gø jïra, ni cïp mana raac na kar gø no olämi jïra, ni møta aani, a na Wuuö Jwøk. Kiper aana nyeya mo kare dwøŋ, ni nyeŋŋa di lwäärö dï wïth juurre bëët.» Gïnögø caana Wuuö Jwøki, eni na wïth jammi bëët.