Mikiya 2 - Wëël Jwøk

Luum Ajäla Mano Tägi Dëët Jø Wø Caan Jiy

¹ Otïmö ni raac jï jø wø caar gïï mo reyø, jø wø caar tïï gïï mo reyø kany wø enge kwör niine moge. Ni kany wø ruu øwi ka amöölla, gïna caarge wø putge ka tïïc, kiper jïge oløny ni da teek ki man tïïcge gø.

² Geni, cwïnyge døøŋŋø ki pwöth ni macge geni, ni päl cwïnyge ki uudi ni lwørge geni. Geni, jap dhaanhø wø lwørge lwørø ki paac mare, ni lwørge pwöth dhaanhø.

³ Kiper manøgønø, mana caan Wuuö Jwøki beeye en, ena köö, ni «Ka adïëri møn, aani, a cädö ki man känna bäätu ki gïn mo leth, ni uuni bäŋ ŋat mo bøth ki gø; ni ba cäädhu këët ni jiy raŋu piny, kiper kar kaace, piny obëëdö ni raac.

⁴ 'Ba dïcäŋece uuno cäŋ jiyi ki duut, ni duudögø beeye duut mar jwøk keec ec, ni beeye duut mano løøgu ni kööu, ni ‹Waana ränynyö na bäre! Wuuö Jwøk ŋøøp jø powa alwøre, alwøre baŋwa møn, ni cïp pwöth mowa jï jø wø mac paac.› »

⁵ Kiper manøgønø, kanyo duu ŋøøm, otïmö ni bäŋ ŋøøm mo di rømø jïïu dï jø acooŋ Wuuö Jwøk.

⁶ 'Ba nyïïkuk Jwøk mo wø køp luup ki wïthge, ge wø köö ki aani, ni «Kär dwør Jwøk køpï. Kär dee dwør Jwøk mo køpï kiper gïï mo tägö dëëtwa. Bäŋ lään wïc mo ö bäätwa.»

⁷ ?Wui u na nyïïkwaac Jeekap, aŋø, manøgø beeye gïn mo doo caanø, na «?Aŋø, Wuuö Jwøk atïmö ni cwïnye ba cïp piny? ?Teeŋ gïnögø dee tïïö?» 'Ba mar Wuuö Jwøk beeye en, ena köö, ni «Luup 'moa wø beyø kaper jøøa marge thïïŋ.

⁸ 'Ba ki mana täge kany mo cään ennø, u na jiya, dëëtu athïïŋŋu dëëra kaamar nyïïmän. Uuni, abïïe akälu wøk bäät jø wø pöödhi ki jöö mo bäŋ gïn lääŋge, ki bäät jø wø duui ki baŋ leny.

⁹ Uuni, määr jiya ariemu wøk, ni ŋati man nø riemu wøk ka yi paare na met yie ki gø, ni kälu ajiem mara wøk bäät obwöre moge na bäre bäre.

¹⁰ Uuni, u ööa maal ni aayu nou mak ka tøŋ, kiper kany ba tïmö na kar bëëtö maru, kiper mana tïïyu gø ni ba waany ni ränynye, ni tïme kaamar ŋwellø mo bäŋ køny mo joode.

¹¹ Ni näk mo da nyikuŋ Jwøk man wø wïdi ni køpa luup tööt ki luup cwøk, mo köö, ni ‹Køøŋ omøki ki kwøŋ mo keec obëëdö ni thööth jaak,› teeŋ ŋatøgø beeye ni wø met yïthu ki gø.»

Luum Køny Mano Tïïc Wuuö Jwøki Kiper Jiye

¹² 'Ba mana caan Wuuö Jwøki beeye en, ena köö, ni «U na nyïïkwaac Jeekap, u cooŋa kanya ciel u bëët, ni lema uuni, u na jø Icriel moo dööŋ, ni cïba uuni kanya ciel kaamar dïëk mo ena kaal, ni cuuny pinynyi ki jiy.»

¹³ Wuuö Jwøk jöö di jabø ni ci maal nyïm jiye, ni ö jiyi ni cige køøre, ni cørge dhi kiir, ni cige wøk ki yie. Nyeya marge beeye noo cäädhi nyïmge, ni eni na Wuuö Jwøk beeye noo bwödhö maal wïthge.