Mathiew 8 - Wëël Jwøk

Kanya Ö Jecu Na Køny Ŋat Mo Tuu Ki Dhøøbø

¹ 'Ba kanya ö Jecu na duu piny ki bäät kïdi, lwaak mo dwøŋ aläp køøre.

² Kanyøgønø, ŋat mo ree da dhøøbø aö baŋe, ni këël cøŋŋe piny nyïme, ni kööe, ni «Kwäärö, ni näk ïïno jïëy, dëëra diï dwøga kare.»

³ Ni ö Jecu ni rwaak cere baŋ gø ni mul gø, ni kööe, ni «Aana jïëy; dëërï døø kare.» Ni ö dhøøbe ni put aay dëër gø.

⁴ Ni kö Jecu jïgø, ni «Kär dee gïn caanï jï ŋat mør. 'Ba ciï, ni nyoothï dëërï jï dïlämi, ni cïpï ko olämi mana caan Modhe, ni wø näk ŋïï jï jiy.»

Kanya Ö Jecu Na Køny Ŋat Tïïc Mar Kwääy Tøŋ

⁵ 'Ba kanya ö Jecu na pïïe Kapernaam, kwääy tøŋ man wø käär jiy ma dïpa aö baŋe, ni kwac gø,

⁶ ni kööe, ni «Kwäärö, laŋŋø mara tuu no obäp paac ni baŋŋi døc.»

⁷ 'Ba Jecu aköö jïgø, ni «Aano ö kuna kønya gø.»

⁸ 'Ba adwøk kwääyögø jïgø, ni «Kwäärö, a patha orømø ki man wëëga ïïni ööny paara. 'Ba cäännï ki luubö keere. Køøre nø, laŋŋø mara dëëre ojöönni.

⁹ Kiper aani thuwø, aana dhaanhø mo bëënna teek ŋat mør, ni jïra da jø tøŋ thuwø mo ena cera, maa doo köö ka aciel rege, ni ‹Ciï,› ni dee cøø. Ni kööa jï mør, ni ‹Ööï,› ni dee öö. Ni daa laŋŋø mara cäännö, ni ‹Tïïc gïn,› ni dee gø tïïö.»

¹⁰ 'Ba kanya ö Jecu na wïny mare, yie arëëm, ni kööe jï jøøa cäädhö køøre, na «Adïëri møn, a cäänna uuni, ni teeŋ ŋäädhe ma enøgønø poot kära joodø, këël dï jø Icriel.

¹¹ A cäänna uuni, ni jiy mo thööth oööi ki jï løø kur tuul-cäŋ ki jï løø kur pänh-cäŋ, ni pïge piny lak cam ki Eeberam, ki Aydhak, ki Jeekap yi buya käl maal;

¹² ni ö wäät bura ni leeŋi wøk yi muudhö, kany wø jwöŋ jiyi yie ni ge mööta lakge.»

¹³ Ni kö Jecu jï kwääy tøŋ, ni «Ciï. Otïïc jïrï kaawat mana ŋäädhï.» Ni put dëër laŋŋø jöönnö ki yi caannøce kiree.

Kanya Ö Jecu Na Køny Mii Cï Piter

¹⁴ 'Ba kanya ö Jecu na ci po Piter, mii cï Piter ajoode no obutö ni tuu ka adïrïgi.

¹⁵ Ni ö Jecu ni mul cer gø, ni puti ya adïrïgi wec. Ni ö nyijøøgø maal ni tïny Jecu.

¹⁶ 'Ba na tïme na abøønynyøgø, jiy mo thööth mo dëëtge da anäge akäl baŋe. Ni ö Jecu ni riem juu wøk dëëtge ki dwøre keere, ni køny jøøa tuu bëët.

¹⁷ Ni manøgøøni tïïc kaper nee gïna caan nyikuŋ Jwøki ma Aydheea thur kare, na køp, ni «Ŋwiili 'moø alwøre ni käär täwe moø.»

Kanya Ö Jecu Na Pwöny Jøøa Many Man Cääthge Køøre

¹⁸ 'Ba kanya ö Jecu na neen lwaak mo dwøŋ ni ena buute, ena cïpö ki dwøl nee eni ki bääge cige løøga.

¹⁹ Kanyøgø nyen ma dïpööy mar ciik Jwøk aö baŋe, ni kööe jïgø, ni «Dïpööy, a cäädhö køørï, këël ï doo cøøa kaa.»

²⁰ 'Ba Jecu aköö jïgø, no «Othööe jïge da buri, ni weny jïge da uudi, 'ba Wär Dhaanhø, bäŋ kany mo nyaaŋ thääŋŋe yi gø.»

²¹ Kanyøgø dhaanhø mør dï bääŋi aköö jïgø, ni «Kwäärö, wec aani dïciel, naa cøøa kuna koonya wära.»

²² 'Ba Jecu aköö jïgø, ni «Ö køøra, ni weyï jøøa näk othøw nee dëëtge koonyge keerge.»

Kanya Ö Jecu Na Jook Jamø Ki Puul Galili

²³ 'Ba kanya ö Jecu na ci yi jääy, bääge aeth køøre.

²⁴ Kanyøgø atuunna mo ba thiinh atägö dï Puul Galili, ni tïm jääyi ni läŋŋi ka athaga. 'Ba kar kaagø, Jecu obutö.

²⁵ Ni ö bääge ni cige baŋe ni jiecge gø, ni köge, «Køny wa, Kwäärö. Øøna thøw.»

²⁶ Ni kö Jecu jïge, na «?Aŋø ni lwäyu, u ni ŋäädhe maru thiinh en?» Ni ö maal ni jook jamø ni jook naam. Ni put pinynyi nibäc døc.

²⁷ Ni ö bääge ni rëëm yïthge, ni köge, na «?A teeŋ dhaanhnha ŋø en, ni këëlla jamø ki naam leŋa dwøre?»

Kanya Ö Jecu Na Riem Anäk Wøk Dëët Jak Ma Ariiø

²⁸ 'Ba kanya nø pïïc Jecu løøga po jø Gadarin, ena røømmø ki jak ma ariiø mo wïthge da anäk, mo käla bäät bwör, mo geno gäy døc, ni bäŋ dhaanhø mo løny jïre ki man pöödhe ki jööröce kiperge.

²⁹ Kanyøgø gena put lier døc, na «?Agïnaŋø noo tïïyï ki waani, ï na O Jwøk? ?Aŋø, ï ö kany kiper nee wa caarï ni kanya wäŋŋi poodi?»

³⁰ 'Ba kanyøgø da pïïth othur mo päl mo cämö kany mo bäär mëëth ki geni.

³¹ Ni ö anäki ni kwacge Jecu, ni «Noo näk mo wa riemï wøk, wëëk wa ciin dëër pïïth othur.»

³² Ni kööe jïge, ni «Cou.» Ni öge wøk, ni cige dëët othuri. Kanyøgø pïïth othur bäre aput dhooth ya ageella bäär ni päthge yi Puul Galili, ni thøøge yïth pïï.

³³ Ni ö dïkwääc othuri ni reŋge. 'Ba na pïïcge paac, jammi bëët acaange, ki gïna tägö dëët jøøa wïthge da anäk.

³⁴ Kanyøgø paac bäre ree ajiie ni cige nee røømge ki Jecu. 'Ba kanya jootge eni, ena kwacge nee aae poge.