Mathiew 6 - Wëël Jwøk

Pwöc Mar Jecu Kiper Jöör Cïp Jammi Jï Jøøa Can

¹ «Gwøgu rou nee tïïc mo beer ba tïïyu nyïm jiy kiper nee neenge. Kiper ni näk ma enøgønø, bäŋ gïn mo jootu baŋ Wääu ni en maal.

² «Kiper manøgønø, kanyo wäro cïpï ki jammi jï jøøa can, kär kunhnhï ki tuuŋ, kaawat man wø tïïc jø atade yïth uut acook lam ki uutjïëthe, kiper nee ge pwøc jiyi. Adïëri møn, a caana gø jïïu, ni mana doo ci jïge, anø jootge.

³ 'Ba kanyo wäro cïpï ki jammi jï jøøa can, kär niï wëëga cer caamï ŋäc gïno tïïc cer cwïïï,

⁴ kiper nee japa cïpï bëëde ni kuc. 'Ba Wäru ni en maal, ni wø neet gïn mo kuc, ïïno ŋade.

Pwöc Mar Jecu Kiper Lam

⁵ «Ni kanyo wäro lämu, käru tïmö nou caala jø atade. Kiper yïthge met ki lam ni ge cuŋŋö uut acook lam ka agääk jïëthe, kiper nee ge neen jiyi. Adïëri møn a caana gø jïïu, ni gïna doo ci jïge, anø jootge.

⁶ 'Ba kanyo wäro lämï, ci yi ødï ni cïëgï odhuulu bäätï ni lämï jï Wäru ni en maal ni wø ba neen. 'Ba Wäru ni en maal, ni wø neet gïn mo kuc, ïïno ŋade.

⁷ «'Ba kany wø lämu, kär lam maru cwaatu ki luup mo oballe jaak kaawat man wø tïïc juurre. Kiper ege caarø ni marge di wïnynyö kiper luup moa carge na thööth.

⁸ Käru tïmö kaamarge. Kiper Wääu ni en maal gïn wø cannu ki gø ŋääe ni eni poot käru pëënynyö.

⁹ Kiper manøgønø, wäru wø lämu na ennønø, «ni ‹Wääwa ni en maal, nyeŋŋï wøør,

¹⁰ buyï ööe. Beerra man tïm mana manynyï ni di tïïö bäät piny kaawat man bëëde ni di tïïö maal enø.

¹¹ Mëëk wa caapwa waŋcäŋi,

¹² ni weyï moa bacwa, keda man wø wecwa mo wø bac jø møøki dëëtwa.

¹³ Kär wa bwøth kany mo wa di päänynyö yie, 'ba piem wa cer ŋata raac.›

¹⁴ «'Ba ni näk moa bac jiyi weyu wiiø, Wääu ni en maal thuwø moa bayu wiie wiiø.

¹⁵ 'Ba ni näk moa bac jiyi ba weyu, Wääu ni en maal thuwø, moa bayu ba wiie.

Pwöc Kiper Jöö Man Wödö Ki Cam

¹⁶ «'Ba kanyo wäro lämu ki lam-wödö, kär nyeŋŋu døøyu mo can kaawat man wø tïïc jø atade. Kiper geni dëëtge wø wecge wiiø no ocweer nee wödö marge joot jiyi. Adïëri møn, a caana gø jïïu, ni mana doo ci jïge, anø jootge.

¹⁷ 'Ba kany wø wödï, lwøk nyeŋŋï ni wïïrï wïïï ki maaw,

¹⁸ nee wödö marï ba joot jiyi, 'ba beeye Wäru ni en maal ni wø neet gïn mo kuc, noo joot gø. 'Ba Wäru ni en maal, ni wø neet gïn mo kuc, ïïno ŋade.

Pwöc Kiper Man Kän Dëël Ki Jammi Maalø

¹⁹ «Kär dëëtu kännu ki jammi bäät pinyi en, ni da alweela ki nyal mo raanynya ge, ki kuuwe mo turö ki uudi mo kwädö.

²⁰ 'Ba kännu dëëtu ki jammi maalø, kanya näk yie bäŋ alweela ki nyal mo räänyö, ni bäŋ kuuwe mo turö ki uudi mo kwädö.

²¹ Kiper kanyo kanï japï yie, cwïnyï oen yie thuwø.

Pwöc Kiper Tar Mar Dëël

²² «Waŋ beeye lamba mar dëël. Kiper manøgønø, ni näk waŋï tøŋ, dëërï bäre orømø ki tar.

²³ 'Ba ni näk waŋï ba tøŋ, dëërï bäre orømø ki muudhö. ?'Ba ni näk tar mana en dëërï cøl, a teeŋ cøl mo nyïëdi noo cøle ki gø?

Pwöc Kiper Man Ba Tïny Kwääri Ariiø

²⁴ «Bäŋ dhaanhø mo løny jïre ki man tïny kwääri ariiø. Kiper eni løny ki man männe ka aciel ni mëëre ki maya. Wala cwïnye wëëge aciel, ni jøøŋ maya. Kiper ba løny jïïu ki man tïnynyu Jwøk ni tïnynyu jap piny.

Pwöc Kiper Man Ba Lääŋ Jap Piny

²⁵ «Kiper manøgønø, a cäänna uuni, ni kär dee gïn lääŋŋu kiper jwïëyu, ki gïïo cammu, wala gïïo maathu, wala gïïo røøu dëëtu. ?Aŋø, ba letha per jwïëy ki cam, ni leth per dëëlli ka abïïe?

²⁶ Raŋŋu wec maal mø. Ge ba pïïdhö, ni ge ba kääö, ni ge ba cuŋ yïth odïï. 'Ba Wääu ni en maal ge wø poot caame caamø. ?Aŋø, ba letha peru ki geni?

²⁷ ?Na aŋa dïïu ni løny jïre ki man meet nïr kwøw moe ki mo thenh keerge kiper mano lääŋ gø?

²⁸ ?Na aŋø nø, ni lääŋŋu abïïe? Caarru pïth mar apiite mo ena yi pwöla, ni wø ba ööl dëëtge ni ge ba cwääö ka abïïe kiper dëëtge.

²⁹ 'Ba a cäänna uuni, ni këël Cølöman ka ajieme bäre, mïërö mar abïïe moe ba caal mïëy aciel dï gïïögø.

³⁰ ?'Ba ni näk Jwøk luum mo ena yi pwöla ee døøc mo mïërö, ni bëëdö ni mar dïcäŋi ni diøø leeŋa maac, a uuni, u bäŋ dee gwøø ni kaala manøgø, u ni ŋäädhe maru thiinh en?

³¹ Kiper manøgønø, kär dee gïn lääŋŋu, nou köö, na ‹?Agïnaŋø noo camø?› Nou köö, na ‹?Agïnaŋø noo maadhø?› Nou köö, na ‹?Agïnaŋø noo røø dëëtø?›

³² Kiper gïïögø bëët cac juurre cayø. 'Ba Wääu ni en maal ŋääe nou can ki gïïögø bëët.

³³ 'Ba kwøŋu buc Jwøk ki beeny Jwøk cayø. Køøre nø, gïïögø bëët owëëk uuni thuwø.

³⁴ «Kiper manøgønø, kär dee gïn lääŋŋu kiper diøø. Kiper diøø dëëre olääŋŋe keere. Cäŋ man nø da moe.