Mathiew 25 - Wëël JwøkLeer Mana Caan Jecu Kiper Nyïïakuue Apaar 1 «'Ba buya käl maal doo päärö ki nyïïakuue apaar mo lambae moge ege lwørø ni cige kuna jølge ŋat nywöm. 2 Ki røk nyïïakuue moøgø, abïïc dïge wïthge bäŋ acaara. 'Ba abïïc wïthge leer. 3 Kiper moa wïthge bäŋ acaara na lwørge lambae moge, bäŋ mädhi mo ege käärö. 4 'Ba moa wïthge leer akäädö ki wïlle mo yïthge da mädhi ki lambae moge. 5 'Ba kanya ruu ŋat nywömmi, gena narø ni butge bëët. 6 'Ba na tïme na dï wäär, dwøl awïnyö, mo köö, ni ‹Neennu, ŋat nywöm aöö. Ööu wøk kuna jølu eni.› 7 «Kanyøgø nyïïakuugögø aö maal ni thoothge lambae moge. 8 Ni kö moa wïthge bäŋ acaara jï moa wïthge leer, ni ‹Mooyu wa dëët mädhi mou, kiper lambae mowa manynya thøø.› 9 «'Ba adwøk moa wïthge leer, ni ‹Ba løny; mädhi ba rømi ki øøni bëët. Beerra man cou baŋ jø wø gädhö ki mädhi ni ŋëëmmu dëëtu.› 10 «'Ba kanya cige kuna ŋëëwge, ŋat nywöm aöö. Ni ci jøøa näk rege ege jiiø kar cam nywöm ki eni na aciel. Ni cïëk dhi øtø. 11 «Køøre nyïïakuue møga aluuny öö thuwø, ni cwølge ŋata nyöömmö ni köge, ni ‹Kwäärö, Kwäärö, jap dhi øtø jïwa.› 12 «'Ba aduue jïge, na ‹Adïëri møn, a cäänna uuni, u kuua.› 13 «Kiper manøgønø, kuru, kiper cäŋögø ki caannøgø kuyu karge riet. Leer Kiper Laaŋe Adäk ( Luk 19:11-27 ) 14 «Kiper gïnögø otïmö kaamar nyen mo manynya wääth, ni cwøl laaŋe moe, ni cïp gwete jïge nee tïïge ki geni. 15 Ni cïpe jï dhaanhø aciel ki gwel abïïc, ni mooc maya ki gwel ariiø, ni mooc dääge ki gwelø aciel, ni ŋati man nø mooe ka køør mana no orømø ki eni. Køøre ena aay. 16 Ni ö ŋata mooc ki gwel abïïc ni put aay ni gädhe ki ge, ni duunne ki gwel abïïc møøk. 17 Ni poot caala manøgø thuwø, ŋata mooc ki gwel ariiø agädhö ki ge, ni duunne ki gwel ariiø møøk. 18 'Ba ŋata mooc ki gwelø aciel acøø ni kunye ki buur ni kan gwel kwääye yi gø. 19 «'Ba kanya nø ruu kwääy laaŋe moøgø ki kany mo bäär, ena duuö ni cääp gwel moe ki geni. 20 'Ba ŋata mooc ki gwel abïïc aö nyïm kwääye, ni käädö ki gwel abïïc møøk. Ni kööe, ni ‹Kwäärö, gwel abïïc beege na wëëgï aani. En, aana jïtö ka abïïc møøk.› 21 «Ni kö kwääye jïgø, na ‹Atïïyï na wøp, ïïna laŋŋø mo beer mo di ŋäädhö. Ïïna tïmö niï di ŋäädhö ki jammi mo nøk. 'Ba ennø, jammi mo thööth ocïba cerï. Ööï nee met yi kwääyï bëëde bäätï.› 22 «Ni ö ŋata mooc ki gwel ariiø ni ö nyïm kwääye, ni kööe, ni ‹Kwäärö, gwel ariiø beege na wëëgï aani. En, aana jïtö ki gwel ariiø møøk.› 23 «Ni kö kwääye, na ‹Atïïyï na wøp, ïïna laŋŋø mo beer mo di ŋäädhö. Ïïna tïmö niï di ŋäädhö ki jammi mo nøk. 'Ba ennø, jammi mo thööth ocïba cerï. Ööï nee met yi kwääyï bëëde bäätï.› 24 «'Ba ŋata mooc ki gwelø aciel aö nyïm kwääye thuwø, ni kööe, ni ‹Kwäärö, ï ŋääa ni ïïna dhaanhø mo dwørï teek, niï wø kääö kany mo ï kär kwøŋ pïïdhö yie, ni kääï kany mo ï kär kwøŋ judö yie. 25 Kiper manøgønø, aana lwäyö, ni cøøa ni kana gwellï piny. En, lwør mana näk marï.› 26 «'Ba adwøk kwäärö mare jïre, ni ‹Ïïna laŋŋø mo raac mo dëërï leth. Ni näk ŋäyï naa wø kääö kany maa kär kwøŋ pïïdhö yie, ni kääa kany maa kär kwøŋ judö yie, 27 gwel 'moa diï wëëga jø wø gädhö ki jammi, ni kanya daa duuö, mana näk mara daa joodø ni da wïïe. 28 Kiper manøgønø, lwørru gwelløgø cere, ni mëëgu gø ŋata jïre da gwel apaar. 29 Kiper jiy bëët mo wø jïge dagø, møøk ocäŋ cïpö jïge, ni tïm moge ni thööth. 'Ba ŋat wø jïre bäŋgø, këël man wø en jïre di lwørø. 30 Ennø, leeŋu laŋŋø manøgø ni bäŋ gïn kønye enø wøk yi muudhö, kany wø jwöŋ jiyi yie ni ge mööta lakge.› Leer Kiper Luum Ŋøl Luup Mana Näk Aŋuudi 31 «'Ba kanyo ö Wär Dhaanhø ka ajiem mare ki nyïïatwiet maal bëët na aciel, kanyøca eno pï piny ni ena nyeya bäät wäl ajiem mare. 32 Ni ö wïth juurre bëët ni cooŋi nyïme, ni pääŋ geni kaawat man wø ö dïkwääyi ni wø køc rööm ka atëëe. 33 'Ba rööm ocïp bäät cwïïe, ni ö atëëe ni cïp ge bäät caame. 34 Kanyøgø eni na nyeya oköö jï jøøa en bäät cwïïe, ni ‹Ööu, u na näk ogwïëth Wära, nee buya käl maal na näk ojiiŋŋø kiperu ki mana täge ki kanya cwääc piny yie ci jïïu. 35 Kiper aana 'näk käci, ni mooyu aani ki cam. Aana 'näk riewi, ni mooyu a ki pïï. Ni ööa ni aana wëëllö, ni pänhnhu aani. 36 Aana cäädhö ki dëëra, ni mooyu aani ka abïï. Aana tuu, ni lïïmmu baŋa. Aana en øt twöc, ni ööu baŋa.› 37 «Kanyøgø odwøk jøøa marge beer na en bäät cwïïc jïre, ni ‹?Kwäärö, a yi wäne na jootwa ïïni ni riï da käc ni caamwa ïïni, wala riï da riew ni moocwa ïïni ki pïï? 38 ?Na a yi wäne na jootwa ïïni, ni ïïna wëëllö ni pänhwa ïïni, wala ï cäädhi ka riï ni moocwa ïïni ka abïï? 39 ?Na a yi wäne na jootwa ïïni niï tuu, wala ï ena øt twöc ni lïïmwa ïïni?› 40 «'Ba odwøk nyeya jïge, na ‹Adïëri møn, a cäänna uuni, ni gïna tïïyu jï dhaanhø aciel mo thiinhnha kare dï moi na nyïïmera ii, gïnögø tïïyu jïra.› 41 «Kanyøgønø, eno köö jï jøw oen bäät caame, ni ‹Aayu buuta, u na näk ocienø; cou yi maaa näk bäŋ cuŋŋe kar ajäla, na näk ojiiŋŋø kiper anägö ki nyïïatwiete. 42 Kiper aana 'näk käci, ni käru a mooø ki gïn cam. Aana 'näk riewi, ni käru a mooø ki pïï. 43 Ni ööa ni aana wëëllö, ni käru a pänhnhö. Ni cäädha ki dëëra, ni käru a mooø ka abïï. Aana tuu, ni ena øt twöc, ni käru a lïïmö.› 44 «Kanyøgøøni jøøa en bäät caam thuwø marge odwøkge, ni ‹?Kwäärö, a yi wäne na jootwa ïïni ni riï da käc, wala riew, wala ïïna wëëlö, wala ï cäädhi ka riï, wala ï tuu, wala ï ena øt twöc, ni kärwa ï kønyø?› 45 «Kanyøgø odwøge jïge, na ‹Adïëri møn, a cäänna uuni, ni gïna näk käru tïïö jï dhaanhø aciel mo thiinhnha kare dï moi ii, gïnögø käru tïïö jïra thuwø.› 46 «Kanyøgø jøøgø geno ci kar ajäla mo bäŋ cuŋŋe, ni ö jøøa marge beer ni cige kar kwøw mana näk adïëri na bäŋ cuŋŋe.» |
© The Bible Society of Ethiopia
Bible Society of Ethiopia