Mathiew 21 - Wëël Jwøk

Kanya Ö Jecu Na Døny Jerucalem Ni Ena Bäät Nya Arëën

¹ 'Ba kanya ö Jecu ki bääge na pïïcge Bethpec bäät Kïn Ølip, kany mo kare cään ki Jerucalem, Jecu bääŋi moe ariiø ajääŋŋe,

² ni kööe, ni «Cou paanø ni en nyïmmu enø. 'Ba uuno jïti ka arëën mo omaa piny, ni nyaare ena buute. Ge wär pätu ni kälu ge baŋa.

³ 'Ba noo näk da ŋat mo cäännö ki uuni, wäru kööu, ni ‹Kwäärö manynya ge.› 'Ba oput ŋatøce wëëk uuni.»

⁴ Manøgø tägi kaper nee gïna caan nyikuŋ Jwøki thur kare, na kööe,

⁵ ni «Køpu jï jø Dhayan, ni ‹Neennu, nyenynyu ni ö baŋu. Eni mwöl, ni eni cäädhi ka bäät arëën, ni beeye nya arëën, nyi lään wø tïët jammi.› »

⁶ Ni ö bääŋi ni cige ni tïïcge gïnögø kaawat mana caani ya Jecu jïge.

⁷ Ni kälge arëën ki nyaare, ni kïthge abïïe moge bäätge. Ni ö Jecu ni pï bäät nya arëën.

⁸ 'Ba päl lwaak bäre abïïe moge apeethge waŋjöö, ni ö møøki ni ŋøtge bäät jenni ni peethge ge waŋjöö.

⁹ Ni ö jiyi moa bwödhö nyïme ki moa cäädhö cään, ni rëëtge, ni «Odhaana! Pwøc en jï Nyikwaar Deebit. Gwïëth en ri ŋat ööi en ki nyeŋ Wuuö Jwøk! Pwøc en jï Jwøk!»

¹⁰ 'Ba kanya ö Jecu na døny Jerucalem, pääny bäre aniïïk, ni köge, ni «?Man aŋa?»

¹¹ Ni kö lwaaki, ni «Man beeye nyikuŋ Jwøk ma Jecu nyï Nadhareth na en Galili.»

Kanya Ö Jecu Na Rïëm Jø Gath Wøk Øt Jwøk

¹² Ni ö Jecu ni døny yi kal mar Øt Jwøk Mana Dwøŋ, ni rïëm jøøa gädhö ki jammi wøk bëët yi øt Jwøk, ki jøøa ŋëëö, ni jaal tharabëëte mo jø wø wïïdö ki gwel, ni jaal köömmi mo jø wø gädhö ka akuyi.

¹³ Ni kööe jïge, no «Ogöörö yi wëël Jwøk ni Jwøk aköö, ni ‹Øda doo cwølø ni øt lam.› 'Ba uuni, atïïyu na kar dïmute.»

¹⁴ Ni ö cööye ki ŋööte baŋe Øt Jwøk Mana Dwøŋ. Ni køny geni.

¹⁵ 'Ba kwääc laam ki dïpööye mo ciik Jwøk cwïnyge aränynyö kanya neenge gïïa näk rëëma ec na tïïc Jecu, no obwöre kwöŋŋö Øt Jwøk Mana Dwøŋ, ni «Odhaana! Pwøc en jï Nyikwaar Deebit,»

¹⁶ ni pëënyge Jecu, na «?Aŋø, gïn car obwöyi ii ba wïnynyï?» Ni dwøgi ya Jecu jïge, na «Awïnynya. ?Aŋø, luubö man käru kwaanø yi wëël Jwøk bäre bäre? Acaan Wëël Jwøki, «ni ‹Ï na Wuuö Jwøk, pwøc man pwøc ï ki gø atïïyï nee thur kare ki køør luup moa car obwöre moa therø këël moa näk poot dhøøth.› »

¹⁷ Ni ö Jecu ni wii ge kaagø, ni aae päänyögø ni ci Bethani, ni but yie.

Kanya Ö Jecu Na Bääp Olaam

¹⁸ 'Ba kanya tïme na amöölla, ni Jecu døøa pääny, ena 'näk käci.

¹⁹ 'Ba na neen olaam thääŋ jöö, ena gaa baŋ gø, ni bäŋe nyïëdi mo ee joodø ri gø, 'ba beeye bøøge keerge na joode. Ni kööe jï olaam, ni «Bäŋ nyïëdi mo cäŋ jootø dëërï këët.» Ni ö olaammi ni put bäbö.

²⁰ 'Ba kanya ö bääŋi na neenge gø, yïthge arëëm, ni köge, na «?Aŋø, olaam olaar bäbö nidïï ennø?»

²¹ 'Ba adwøk Jecu jïge, na «Adïëri møn, a cäänna uuni, ni näk jïïu da ŋäädhe nou ba tääö, paa teeŋ gïna tïïc dëër olaam keere noo tïïyu, 'ba këël u köömma kïdi man, ni ‹Tïŋ riï ni leeŋï riï yi naama dwøŋ›, gïnögø puta tägö.

²² Ni näk mo jïïu da ŋäädhe, gïn wäro pëënynyu ki lam, cøøa jïïu.»

Kanya Pëëny Jecu Kiper Teek Mare

²³ 'Ba Jecu adøny yi kal mar Øt Jwøk Mana Dwøŋ. 'Ba kanya bëëde ni eni pöö kaace, kwääc laam ki jaae gena ö baŋe ni pëënyge eni, na «?A teega ŋø ni wø tïïyï gïïögøøni ki gø? ?Na aŋa na wëëk teegøgø ïïni?»

²⁴ 'Ba adwøk Jecu jïge, no «U pëënynya pëënynyö ki pïëc aciel thuwø. 'Ba ni näk mo løgu løø jïra, aani, teek man wø tïïa gïïögø ki gø, ocaana jïïu thuwø.»

²⁵ Ni kööe, ni «?Lwøk mana löö Jøønni ki gø na nyuudhi okäla kaa na bëëde? ?Käla maal, wala käla baŋ jiy?» Kanyøgønø, dhøkge aløøŋge yïthakicge keerge ni köge, ni «Noo caanø gø, ni ‹Käla maal,› eni köö jïïø, na ‹?Aŋø nø, na ba jïëyu ni ŋääthu eni?›

²⁶ 'Ba noo caanø gø, ni ‹Käla baŋ jiy›, ø lwäär ki lwaak, kiper jiy bëët ojïëy ni Jøøn beeye nyikuŋ Jwøk.»

²⁷ Kiper manøgønø, aløkge jï Jecu, ni «Kucwa.» Ni kö Jecu jïge, «'Ba aani thuwø, teek man wø tïïa gïïögø ki gø, ba caana jïïu.

Leer Kiper Nyïïmëëe Ariiø

²⁸ «?Agïnaŋø ni caarru? Da dhaanhø mo jïre da wääte ariiø. Ni ci baŋ mana dïkwøŋ, ni kööe, ni ‹Wääda, ciï ni tïïï yi pwödhö dïcäŋi.›

²⁹ Ni dwøgi ya wääde jïre, na ‹A ba cii.› 'Ba køøre cään, wïïe acäŋ caarrø, ni cøøe.

³⁰ 'Ba ena cäŋ ci baŋ wääde maya, ni cään gø thuwø na enønø. Ni dwøgi ya wääde manøgø, na ‹A cøø, Awuuö.› 'Ba eni kär cøø.

³¹ ?A mane nø røk obwöre moø na ariiø yøø na tïïc mana many wänni?» Ni köge, ni «Mana dïkwøŋ.» Ni kö Jecu jïge, na «Adïëri møn a cäänna uuni, ni jø ajwäk ki kääpe oci buc Jwøk nou poodi.

³² Kiper Jøøn aö baŋu ni køpa jöör bëënynyö, ni käru jïëy ki mare. 'Ba mare ajïëc jø ajwäki ki kääpe. 'Ba uuni, këël na neennu gïnögø, cwïnynyu käru løø ni jïëyu mare.»

Leer Kiper Jø Puur Moa Reyø

³³ 'Ba Jecu aköö, ni «Cäŋu luubö mør wïnynyö mo keda leer. Da wää ŋøømmi mo opïïdhö ki jer omøki yi pwöthe, ni ciel gø ki ciel, ni tïïe ki kany wø bii nyïïomøki yie yi pwöthögø, ni gëëde ki øt koor, ni cïp pwöthögø ceŋ jø puur, ni aa paac mør.

³⁴ 'Ba na tïm kar nyïïomøki ni cään ki man ciekge, laaŋe moe ajääŋŋe baŋ jø puur moøgø, nee känge ki nyïïomøki jïre.

³⁵ 'Ba jø puur moøgø laaŋe moe amakge, ni pwötge aciel ni 'näkge maya, ni këërge maya ki kïte.

³⁶ Køøre wää ŋøømmi acäŋ jäägö ki laaŋe møøk mo thöötha ge ki moa dïkwøŋ. Ni cäŋge teeŋ gïïa dïkwøŋ tïïyö dëët laaŋe moøgø.

³⁷ Køøre wää ŋøømmi wääde ajääŋŋe baŋge, ni kööe, ni ‹Wääda wøørge wøørø.›

³⁸ 'Ba kanya ö jø puurri na jootge wääde, gena cäänö yïthakicge keerge ni köge, ni ‹Man beeye lwiidhø. Beerra man nääø gø, nee jape ci jïïø.›

³⁹ Ni makge gø, ni leeŋge gø wøk ŋää pwödhö, ni 'näkge gø.

⁴⁰ ?'Ba kanyo ö wää pwöthögø, agïnaŋø noo tïïe ki jø puur moøgø?»

⁴¹ Ni dwøkge gø jïre, ni «Jø puur moøgø ni reyø yøø, nääe nääö ki 'näk mo raac døc, ni cïp pwöthögø ceŋ jø puur møøk mo cïpö jïre ki nyïïomøki kany wø ciekge yie.»

⁴² Kanyøgø Jecu aköö jïge, na «?Aŋø, luubö man käru kwaanø yi wëël Jwøk? Acaan wëël Jwøki, «ni ‹Kïdi mana kwier dïgëëte, atïmö na kïn gøøt mana pere letha eni na mak øtø. Ni gïnögø tïïya Wuuö Jwøki, ni beeye gïn mo rëëma ec ki nyeŋŋø.›

⁴³ Kiper manøgø nø, a cäänna uuni, ni buc Jwøk okäl wøk ceŋŋu ni wëëgi jø paac mør mo bëëdö ka bëëtö mo orømø ki bëët buc Jwøk.»

⁴⁴ ['Ba ŋato päth bäät kïnnögø opøti ni tïme na thäŋi. 'Ba noo näk mo pätha bäät dhaanhø, ŋatøca oŋiidhe.]

⁴⁵ 'Ba kanya ö kwääc laam ki jø Paricith na wïnyge luup Jecu moø ni keda leere yøø, ajootge ki cwïnyge ni Jecu geela geni.

⁴⁶ 'Ba kanya tïmge ni ge manynya man makge Jecu, gena lwäyö ki lwaak, kiper ojïëc lwaaki ni Jecu beeye nyikuŋ Jwøk.