Mathiew 20 - Wëël JwøkLeer Mana Caan Jecu Kiper Jøøa Tïïö Yi Pwödhö 1 «Kiper buya käl maal caala wää pwödhö mo omøøl wøk ka amöölla kuna cääye ki jø tïïö yi pwöthe. 2 'Ba kanya nø jïëc jø tïïci ki man mäkge ki gwel mo kar dïcäŋ aciel, gena wëëk ciin yi pwöthe. 3 'Ba kanya cäŋ døø wøk ki caae abïŋween ka amöölla, jiy møøk acäŋ jootø ni ge cuŋŋö jaak kar ŋïëw. 4 Ni kööe jïge, ‹Uuni thuwø, cou yi pwödhö mara. Aano cïpi jïïu ki gwel mo rømø ki tïïc mano tïïyu.› Køøre gena ci pwödhö. 5 'Ba kanya cäŋ døø wøk ki caae apaar kurriiø ki dhöör, ki caae adäk ki kur abøøya, ena cäŋ jïtö ki jø møøk ni kïth ge yi pwöthe. 6 'Ba kanya cäŋ døø wøk ki caae abïïc ka abøøya, acäŋ jïtö ki jiy møøk mo ge cuŋŋö jaak. Ni kööe jïge, na ‹?Aŋø ni cuŋŋu kany jaak en ki yi cäŋ bäre?› 7 «'Ba adwøkge jïre, ni ‹Beeye kiper bäŋ dhaanhø mo omooc wa ki tïïc.› «Ni kööe jïge, ni ‹Uuni thuwø, cou yi pwödhö mara.› 8 «'Ba kanya tïme na abøøya, wää pwödhö ŋat wø raŋ jø tïïc mare aluumme ni kööe, ni ‹Cwøl jø tïïc ni mëëgï japge geni, niï tägï ka jøøa öö ŋää cään, këël mano këëtï baŋ jøøa öö dïkwøŋ.› 9 «'Ba kanya ö jøøa kïth yi tïïc ki caae abïïc ka abøøya, ŋati man nø rege amooc ki gwel ma kar dïcäŋ aciel. 10 'Ba kanya ö jøøa kwøŋ tägö ki tïïc, ni ege caarø ni gwel moge doo thöötha ge, ŋati man nø rege, atïmö ni joota gwel ma kar dïcäŋ aciel thuwø. 11 «'Ba kanya nø lwørge gwetge, gena tïmö ni ge ŋurö ki nyeŋ wää pwödhö. 12 Ni köge, ni ‹Jøøi na öö ŋää cään ii, ge tïïya yi caa aciel keere, 'ba gena päänynyï ki waani na ööl ki yi cäŋ bäre, yi cäŋ mo kwaar døc.› 13 «'Ba adwøge jï dhaanhø aciel dëëtge, ni ‹Nyawat, bäŋ gïn mo yaa baaø dëërï. ?Aŋø, ï kär jïëy ki dwøra na bëëde niï daa cunnö ki gwel ma kar dïcäŋ aciel? 14 Lwør mana näk marï ni aayï. Kiper a manynya man mooa jøøa öö ŋää cään ki teeŋ mana mëëga ïïni. 15 ?Aŋø, ba løny jïra ki man tïïa gïna manynya ki gïno näk mara? ?Aŋø, cwïnyï ränynyi kaper mana bäth yia?› » 16 Køøre Jecu aköö, ni «Kaawat manøgønø, jiy moa kwörge therø opööth maal, ni ö moa kwörge døøŋŋø ni døøge cään.» Kanya Ö Jecu Na Cäŋ Luum Thøø Mare Caannø Jï Bääge ( Maak 10:32-34 ; Luk 18:31-34 ) 17 'Ba kanya tïŋ Jecu ni eni cøøa Jerucalem, bääŋi na näk apaar kurriiø acwøl kur keerge. 'Ba kanya cääthge jöö ena köö jïge, 18 ni «Neennu, ø cøøa Jerucalem. 'Ba Wär Dhaanhø ocïp ceŋ kwääc laam ki dïpööye mo ciik Jwøk. 'Ba eno ŋølge yi thøø, 19 ni cïpge gø ceŋ juurre nee buui, ni pwödi, ni nääi bäät jaadha no odëëdö. 'Ba noo tïme na ri dää nïne eno tïŋ maal ki yi thøø.» Kanya Ö Mii Jeemethi Ki Jøøn Na Kwac Jecu ( Maak 10:35-45 ) 20 'Ba kanyøgø mii wäät Dhebedi aö baŋ Jecu ni eni cäädhi ka wääte. Ni këël cøŋŋe piny nyïme, ni pëëny gø ki gïrpiny. 21 Ni kö Jecu jïre, na «?Agïnaŋø ni manynyï?» Ni dwøgi ya nyijøøgø jïgø, ni «Cïpï ki dwøl nee wääta moi na ariiø ii pïge piny bura marï, na aciel ena bäät cwïïï, ni ö maya ni en bäät caamï.» 22 'Ba adwøk Jecu jïge, no «U pëënynya gïn mo kuyu. ?Maara lønyø jïïu ki man mäthu ka athöönhnho mätha ki gø?» Ni köge jïgø, ni «Løny jïwa.» 23 'Ba Jecu aköö jïge, na «Athöönhnha omaathu møn. 'Ba pïïn bäät cwïïa wala bäät caama, cïpe ba en jïra, 'ba cïpe ena jï Wära, ni cïbe jï jøøa jiiŋ gø kiperge.» 24 'Ba kanya wïnynyi ya bääge moa na apaar, gena gootø ki nyïïmëëe moø na ariiø yøø. 25 'Ba ge bëët gena cwøl Jecu baŋe, ni kööe, ni «Ŋäyu ni kwääri mo juurre, dëëtge ege cuumö bäät jiy moge, ni ö jøøa kwörge døøŋŋø dïge ni nyoothge teekge bäät jiy moa en tietge. 26 'Ba u ba doo tïmö na enøgønø. 'Ba ŋat wäro many man tïme ni dwøŋŋa kare dïïu, wär tïme na ŋat mo tïnynya uuni. 27 Ni ŋat wäro many man tïme ni ena nyïm dïïu, wär dëëre døøc ma laŋŋø jïïu, 28 kaawat man bëët Wär Dhaanhø en ni kär öö nee tïnynyi, 'ba eni ööi kaper nee jø møøk tïnynye, ni cïpa jwïëye na wïïdi kiper jiy mo thööth.» Kanya Ö Jecu Na Jap Nyeŋ Cööye Ariiø ( Maak 10:46-52 ; Luk 18:35-43 ) 29 'Ba kanya ö Jecu ki bääge na tïŋge Jerikö, lwaak mo päl aläp køøre. 30 Kanyøgø da jak ma cööye ma ariiø mo opï piny thääŋ jöö. 'Ba kanya wïnyge gø ni beeye Jecu ni pöödhi enø, gena köök ni köge, ni «Wui Kwäärö, Nyikwaar Deebit, køny canwa!» 31 'Ba gena jook lwaaki, ni cäänge geni nee lïŋge. 'Ba beeye mana putge rëëdö døc, ni «Kwäärö, Nyikwaar Deebit, køny canwa!» 32 Ni cuŋ Jecu, ni cwøl geni, ni kööe, na «?Agïnaŋø ni manynyu nee tïïa jïïu?» 33 Ni dwøkge gø jïgø, ni «Kwäärö, jap nyeŋwa.» 34 Ni päth cwïny Jecu kiperge, ni mul nyeŋge. Ni put nyeŋge døø karge, ni putge wääth køør Jecu. |
© The Bible Society of Ethiopia
Bible Society of Ethiopia